Второе Соборное послание апостола Иоанна Богослова, глава 1

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 1
1:1	Старец избранней госпоже и чадом ея, ихже аз люблю воистинну, и не аз точию, но и вси разумевшии истину.
1:2 См.: 🔗Ин. 14:17	За истину пребывающую в нас, и с нами будет во веки.
1:3	Да будет с вами благть, милость, мир от Бога Отца, и от Господа Иисуса Христа, Сына Отча, во истине и любви.
1:4	Возрадовахся зело, яко обретох от чад твоих ходящих во истине, якоже заповедь прияхом от Отца.
1:5 См.: 🔗Ин. 13:34 🔗1Ин. 3:11	И ныне молю тя, госпоже, не яко заповедь пишу тебе нову, но юже имамы исперва, да любим друг друга.
1:6 См.: 🔗Ин. 14:15 🔗1Ин. 2:5	И сия есть любы, да ходим по заповедем Его. Сия есть заповедь, якоже слышасте исперва, да в ней ходите:
1:7 См.: 🔗1Ин. 4:1	зане мнози лестцы внидоша в мир, не исповедающе Иисуса Христа пришедша во плоти, сей есть льстец и антихрист.
1:8	Блюдите себе, да не погубите яже деласте добрая, но да мзду совершенну восприимете.
1:9	Всяк преступаяй и не пребываяй во учении Христове, Бога не имать: пребываяй же во учении Христове, сей и Отца и Сына имать.
1:10 См.: 🔗Рим. 16:17 🔗1Кор. 5:11 🔗Тит. 3:10	Аще кто приходит к вам, и сего учения не приносит, не приемлите его в дом, и радоватися ему не глаголите.
1:11	Глаголяи бо ему радоватися, сообщается делом его злым.
1:12 См.: 🔗1Ин. 1:4	Многа имех писати вам, и не восхотех хартиею и чернилом, но надеюся приити к вам и усты ко устом глаголати, да радость ваша будет исполнена.
1:13	Целуют тя чада сестры твоея избранныя. Аминь.