Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 20 | |
20:1 См.: 🔗Иов. 11:1 | Отвещав же Софар Минейский, рече: |
20:2 | не тако мнех сия тебе рещи противу, и не разумеете паче нежели и аз. |
20:3 | Наказание срамления моего услышу, и дух от разума отвещавает ми. |
20:4 | Еда сих не уразумел еси от века, отнележе положен человек бысть на земли? |
20:5 См.: 🔗Евр. 11:25 | Веселие бо нечестивых падение страшно, обрадование же беззаконных пагуба. |
20:6 | Аще взыдут на небо дары его, жертва же его облаков коснется: |
20:7 См.: 🔗1Фес. 5:3 🔗Пс. 36:36 | егда бо мнится уже утвержден быти, тогда в конец погибнет. Видевшии же его рекут: где есть? |
20:8 См.: 🔗Пс. 72:19 🔗Ис. 29:7 | Якоже сон отлетевый не обрящется, отлете же аки мечтание нощное. |
20:9 См.: 🔗Пс. 36:10 🔗Пс. 102:16 | Око призре, и не приложит, и ктому не познает его место его. |
20:10 См.: 🔗Иов. 21:19 🔗Иов. 27:14 | Сынов его да погубят меншии, и руце его возжгут болезни. |
20:11 | Кости его наполнишася грехов юности его и с ним на персти уснут. |
20:12 См.: 🔗Пс. 54:22 | Аще усладится во устех его злоба, скрыет ю под языком своим: |
20:13 | не пощадит ея, и не оставит ея, и соберет ю посреде гортани своего, |
20:14 | и не возможет помощи себе: желчь аспидов во чреве его. |
20:15 | Богатство неправедно собираемо изблюется, из храмины его извлечет его Ангел. |
20:16 | Ярость же змиеву да ссет, да убиет же его язык змиин. |
20:17 | Да не узрит отдоения скотов, ниже прибытка меда и масла кравия. |
20:18 См.: 🔗Иер. 12:13 | Вотще и всуе трудися, богатство, от негоже не вкусит, якоже клоки не сожваемы и не поглощаемы. |
20:19 См.: 🔗Ис. 5:8 | Многих бо немощных домы сокруши, жилище же разграби и не постави. |
20:20 | Несть спасения имению его, в вожделении своем не спасется. |
20:21 | Несть останка брашну его, сего ради не процветут ему благая. |
20:22 | Егда же мнит уже исполнь быти, оскорбится, всяка же беда нань приидет. |
20:23 См.: 🔗Чис. 11:33 | Аще како либо исполнит чрево свое, напустит нань ярость гнева, одождит на него болезни: |
20:24 См.: 🔗Ис. 24:18 🔗Иер. 48:44 | и не спасется от руки железа, да устрелит его лук медян, |
20:25 См.: 🔗Пс. 7:13 🔗Иез. 21:10 | и да пройдет сквозе тело его стрела: звезды же в жилищих его: да приидут нань страси, |
20:26 | и всяка тма на нем да пребудет: да пояст его огнь нераздеженый, да озлобит же пришлец дом его: |
20:27 | и да открыет небо беззакония его, и земля да востанет нань: |
20:28 | да извлечет дом его пагуба до конца, день гнева да приидет нань. |
20:29 См.: 🔗Иов. 18:21 🔗Иов. 27:13 | Сия часть человека нечестиваго от Господа и стяжание имений его от Надзирателя. |