Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 6 | |
6:1 См.: 🔗Суд. 3:12 🔗Чис. 25:17 | И сотвориша сынове Израилевы злое пред Господем, и предаде их Господь в руку Мадиамлю седмь лет. |
6:2 См.: 🔗2Цар. 17:9 | И укрепися рука Мадиамля на Израиля: и сотвориша себе сынове Израилевы от лица Мадиамля ограды в горах и в пещерах и в твердынех. |
6:3 См.: 🔗Втор. 28:33 🔗Суд. 8:11 | И бысть егда сеяше муж Израилев, и восхождаше Мадиам и Амалик и сынове восточнии, и восхождаху на него, |
6:4 | и ополчахуся на них, и разоряху плоды земныя, дондеже внити в Газу: и не оставляху бытия жизненнаго во Израили, и стад и телца и осла: |
6:5 См.: 🔗Суд. 7:12 | яко сами и скоти их восхождаху, и кущы их преношаху, и прихождаху яко прузи множеством, и самем и велблюдом их не бяше числа: и прихождаху на землю Израилеву разорити ю. |
6:6 | И обнища Израиль зело от лица Мадиамля. |
6:7 См.: 🔗Суд. 3:9 | И возопиша сынове Израилевы ко Господу: и бысть егда возопиша сынове Израилевы ко Господу Мадиама ради, |
6:8 | и посла Господь мужа пророка к сыном Израилевым, и рече им: сия глаголет Господь Бог Израилев: Аз есмь изведый вас из Египта, и изведох вас из дому работы: |
6:9 | и избавих вас от руки Египетския и от руки всех стужающих вам: и изгнах я от лица вашего, и дах вам землю их, |
6:10 См.: 🔗4Цар. 17:35 | и рекох вам: Аз есмь Господь Бог ваш, не убойтеся богов Аморрейских, в нихже вы живете в земли их: и не послушасте гласа Моего. |
6:11 | И прииде Ангел Господень, и седе под дубом, иже есть во Ефрафе, иже бысть Иоаса отца Езри. И Гедеон сын его млачаше пшеницу на гумне его, бежати от лица Мадиамля. |
6:12 | И явися ему Ангел Господень и рече к нему: Господь с тобою, сильный крепостию. |
6:13 См.: 🔗Пс. 12:2 | И рече к нему Гедеон: во мне, Господи мой: и аще есть Господь с нами, и вскую обретоша ны вся злая сия? И где суть вся чудеса Его, елика поведаша нам отцы наши, глаголюще: не из Египта ли изведе нас Господь? И ныне отверже нас Господь и предаде нас в руку Мадиамлю. |
6:14 См.: 🔗1Цар. 12:11 | И воззре на него Ангел Господень и рече ему: иди в крепости твоей сей, и спасеши Израиля от руки Мадиамли: и се, послах тя. |
6:15 См.: 🔗Исх. 4:10 🔗1Цар. 9:21 | И рече к нему Гедеон: во мне, Господи, в чесом спасу Израиля? Се, тысяща моя хуждша в Манассии, и аз есмь мний в дому отца моего. |
6:16 См.: 🔗Исх. 3:12 🔗Чис. 14:15 | И рече к нему Господь: понеже Аз буду с тобою, и избиеши Мадиама яко мужа единаго. |
6:17 См.: 🔗Лк. 2:12 | И рече к Нему Гедеон: и аще обретох благодать пред очима Твоима, и да сотвориши мне днесь знамение, яко Ты глаголеши со мною: |
6:18 См.: 🔗Суд. 13:15 | не отиди отсюду, дондеже приити мне к Тебе, и принесу жертву мою, и пожру пред Тобою. И рече: Аз есмь, премедлю, дондеже обратишися ты. |
6:19 | И Гедеон вниде, и сотвори козлище от коз, и четверть ифи муки опресноков, и мяса вложи в кошницу, и юху влия в горнец: и изнесе к Нему под дуб, и поклонися. |
6:20 | И рече к нему Ангел Господень: возми мяса и хлебы пресныя, и положи у камене онаго, и юху близ излий. И сотвори тако. |
6:21 См.: 🔗Лев. 9:24 | И простре Ангел Господень конец жезла, иже в руце его, и прикоснуся мясом и хлебом пресным: и возгореся огнь из камене, и пояде мяса и опресноки: и Ангел Господень отиде от очей его. |
6:22 См.: 🔗Быт. 16:13 🔗Исх. 19:21 | И виде Гедеон, яко Ангел есть Господень, и рече Гедеон: увы мне, Господи, Господи, яко видех Ангела Господня лицем к лицу. |
6:23 См.: 🔗Суд. 19:20 🔗1Цар. 25:6 | И рече ему Господь: мир тебе, и не бойся, не умреши. |
6:24 | И созда тамо Гедеон жертвенник Господу, и назва его Мир Господень, даже до дне сего, еще сущу ему во Ефрафе отца Езри. |
6:25 См.: 🔗Втор. 7:5 | И бысть в ту нощь, и рече ему Господь: возми телца упитаннаго (от скотов) отца твоего, и телца втораго седми лет, и разориши олтарь Ваалов, иже есть отца твоего, и дубраву, яже у него, да посечеши: |
6:26 | и да соградиши олтарь Господеви Богу твоему явившемуся тебе на верху (горы) маози во предчинии: и да поймеши телца втораго и вознесеши всесожжения на древех дубравы, юже посечеши. |
6:27 | И поя Гедеон десять мужей от рабов своих, и сотвори, якоже заповеда ему Господь. И бысть яко убояся дому отца своего и мужей града, еже сотворити во дни, и сотвори нощию. |
6:28 | И обутреневаша мужие градстии заутра: и се, раскопан олтарь Ваалов, и дубрава яже у него посечена, и видеша телца втораго вознесена на всесожжение на олтарь новосогражденный. |
6:29 См.: 🔗Суд. 15:6 | И рече муж к ближнему своему: кто сотвори вещь сию? И вопрошаху и искаху, и познаша, яко Гедеон сын Иоасов сотвори вещь сию. |
6:30 | И рекоша мужие градстии ко Иоасу: изведи сына твоего, и да умрет, яко раскопа олтарь Ваалов и яко посече дубраву яже над ним. |
6:31 См.: 🔗3Цар. 18:21 | И рече Иоас к мужем воставшым на него: еда вы ныне суд глаголете о Ваале? Или вы его спасете? Иже аще кто сотвори обиду, да умрет до заутрия: аще Бог есть, да мстит себе, яко раскопа олтарь его. |
6:32 | И прозва его в той день Иероваалом, глаголя: да отмстит на нем Ваал, яко раскопа олтарь его. |
6:33 См.: 🔗Ос. 1:5 | И весь Мадиам и Амалик и сынове востоков снидошася вкупе, и преидоша (реку), и ополчишася в долине Иезраель. |
6:34 См.: 🔗Суд. 11:29 🔗1Цар. 16:13 | И Дух Божий укрепи Гедеона, и воструби рогом, и возопи Авиезер вслед его. |
6:35 | И посла послы ко всему Манассию, и созвася и сей вслед его. Посем посла послы во Асир и в Завулон и в Неффалим, и взыдоша во сретение им. |
6:36 | И рече Гедеон к Богу: аще Ты спасаеши рукою моею Израиля, якоже глаголал еси, |
6:37 См.: 🔗Пс. 71:6 | се, аз положу руно овчее на гумне: и аще будет роса на руне точию, и по всей земли суша, уразумею, яко спасеши рукою моею Израиля, якоже глаголал еси. |
6:38 | И бысть тако: и урани Гедеон наутрие, и исцеди руно, и истече роса из руна, исполнен окрин воды. |
6:39 См.: 🔗Быт. 18:32 | И рече Гедеон к Богу: да не разгневается ярость Твоя на мя, и возглаголю еще единою, и искушу еще единою руном: да будет суша на руне токмо, и по всей земли да будет роса. |
6:40 | И сотвори Бог тако в нощи той: и бысть суша на руне токмо, и по всей земли бысть роса. |