Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 20 | |
20:1 | И рече Господь к Моисею, глаголя: |
20:2 См.: 🔗Лев. 18:21 🔗4Цар. 23:10 | рцы сыном Израилевым, глаголя: аще кто от сынов Израилевых, или от прибывших пришелцев во Израили, иже аще даст от семене своего Молоху, смертию да умрет: людие земли да побиют его камением: |
20:3 | и Аз утвержу лице Мое на человека того и погублю его от людий его, яко от семене своего даде Молоху, да осквернит святыню Мою и осквернит имя освященных Мне. |
20:4 | Аще же презрением презрят туземцы земли очима своима от человека того, внегда дати ему от семене своего Молоху, еже не убити его: |
20:5 | и утвержу лице Мое на человека того и на сродники его, и погублю его и всех единомыслящих с ним, еже соблуждати ему со идолы от людий своих. |
20:6 См.: 🔗Лев. 19:31 | И душа яже аще последует утробным баснем или волхвом, яко соблудити вслед их, утвержу лице Мое на душу ту и погублю ю от людий ея. |
20:7 | И будете святи, яко Аз свят Господь Бог ваш. |
20:8 | И сохраните повеления Моя и сотворите я: Аз Господь освящаяй вас. |
20:9 | Человек человек, иже аше зло речет отцу своему или матери своей, смертию да умрет: отцу своему или матери своей зле рече, повинен будет. |
20:10 См.: 🔗Втор. 22:22 🔗Ин. 8:4 | Человек человек, иже аще прелюбы содеет с мужнею женою, или кто прелюбы содеет с женою ближняго своего, смертию да умрут прелюбодей и прелюбодейца. |
20:11 См.: 🔗Быт. 35:22 | И иже аще пребудет с женою отца своего, срамоту отца своего открыл есть, смертию да умрут оба, повинни суть. |
20:12 См.: 🔗Быт. 38:16 🔗1Кор. 6:9 | И аще кто будет с невесткою своею, смертию да умрут оба, нечествоваша бо, повинни суть. |
20:13 | И аще кто будет с мужеским полом ложем женским, гнусность сотвориша оба, смертию да умрут, повинни суть: |
20:14 См.: 🔗Лев. 18:17 | иже аще поймет жену и матерь ея, беззаконие есть, огнем да сожгут его и оныя, и не будет беззаконие в вас. |
20:15 См.: 🔗Лев. 18:23 | И иже аще даст ложе свое четвероножному, смертию да умрет, четвероножное же убиете. |
20:16 | И жена яже аше приступит ко всякому скоту, еже быти с ним, да убиете жену и скот, смертию да умрут, повинни суть. |
20:17 См.: 🔗Лев. 18:9 | Иже аще поймет сестру свою от отца своего или от матере своея, и увидит срамоту ея, и она увидит срамоту его, укоризна есть, да потребятся пред сыны рода их: срамоту сестры своея откры, грех приимут. |
20:18 См.: 🔗Лев. 15:24 🔗Иез. 18:6 | И муж иже будет с женою сквернавою и открыет срамоту ея, течение ея откры, и она откры течение крове своея, да потребятся оба от рода их. |
20:19 См.: 🔗Лев. 18:12 | И срамоту сестры отца твоего и сестры матере твоея да не открыеши: ужичество бо откры, грех понесут. |
20:20 См.: 🔗Ос. 9:11 | Иже аще будет со сродницею своею, срамоту сродства своего откры, безчадни измрут. |
20:21 См.: 🔗Лев. 18:16 🔗Мк. 6:18 | И человек иже аще поймет жену брата своего, нечистота есть: срамоту брата своего открыл есть, безчадни измрут. |
20:22 См.: 🔗Лев. 18:28 | И сохраните вся повеления Моя и вся судбы Моя и сотворите я, и не вознегодует на вас земля, в нюже Аз введу вы тамо вселитися на ней. |
20:23 См.: 🔗Лев. 18:24 🔗Втор. 9:5 | И не ходите в законы языческия, ихже Аз изгоню от вас: яко сия вся сотвориша, и возгнушахся ими. |
20:24 См.: 🔗Исх. 3:8 🔗Исх. 13:5 | И рех к вам: вы наследите землю их, и Аз дам вам ю в притяжание, землю текущую медом и млеком, Аз Господь Бог ваш, отлучивый вас от всех язык. |
20:25 См.: 🔗Втор. 14:4 | И отлучите себе между скоты чистыми и между скоты нечистыми, и между птицами чистыми и нечистыми: и не оскверните душ ваших в скотех и в птицах и во всех гадех земных, яже Аз отлучих вам в нечистоте, |
20:26 | и будете Ми святи, яко Аз свят есмь Господь Бог ваш, отлучивый вас от всех язык быти Моими. |
20:27 См.: 🔗Втор. 18:11 🔗1Цар. 28:7 | И муж или жена иже аще будет от них чревобасник или волшебник, смертию да умрут оба: камением да побиете их, повинни суть. |