Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 2 | |
2:1 | В лето второе царства Навуходоносорова, соние виде Навуходоносор, и ужасеся дух его, и сон его отступи от него: |
2:2 См.: 🔗Дан. 4:3 | и рече царь призвати обаятелей и волхвов, и чародеев и Халдеев, еже возвестити царю сон его. И приидоша и сташа пред царем. |
2:3 | И рече им царь: видех сон, и ужасеся дух мой, еже уразумети сон. |
2:4 | И глаголаше Халдее сирски цареви: царю, во веки живи: ты повеждь сон рабом твоим, и сказание его возвестим ти. |
2:5 | Отвеща же царь Халдеом и рече: слово отступило есть от мене: аще убо не возвестите ми сна и сказания его, в пагубу будете, и домове ваши разграбятся: |
2:6 См.: 🔗Дан. 5:7 | аще же сон и сказание его возвестите мне, даяния и дары и честь многу приимете от мене: точию сон и сказание его возвестите мне. |
2:7 | И отвещаша второе и реша: царь да повесть сон рабом своим, и сказание его возвестим ему. |
2:8 | И отвеща царь и рече: поистинне вем аз, яко время вы (точию) искупуете, понеже видите, яко отступило есть слово от мене: |
2:9 | аще убо сна не возвестите мне, вем, яко слово ложно и растленно совещастеся рещи предо мною, дондеже время минет: сон мой поведите мне, и увем, яко и сказание его возвестите мне. |
2:10 См.: 🔗Быт. 41:8 | Отвещаша же паки Халдее пред царем и реша: несть человека на земли, иже слово царево возможет возвестити, яко всяк царь великий и князь не вопрошает ссиеваго словесе обаятеля, волхва и Халдеа: |
2:11 | понеже слово, егоже вопрошает царь, тяжко, и несть другаго, иже возвестит е пред царем, но точию бози, ихже несть житие со всякою плотию. |
2:12 | Тогда царь в ярости и во гневе мнозе рече погубити вся мудрыя Ваввилонския. |
2:13 | И изыде повеление, и мудрии убивахуся: и взыскаша Даниила и другов его убити я. |
2:14 | Тогда Даниил отвеща совет и разум Ариоху архимагиру царску, иже изыде убити мудрых Вавилонских, |
2:15 | и вопрошаше и глаголя: княже царев, о чесом изыде изречение безстудное от лица царева? Возвести же Ариох слово Даниилу. |
2:16 | Даниил же вниде и моли царя, яко да время даст ему, и сказание его возвестит царю. |
2:17 | И вниде Даниил в дом свой и возвести слово Анании и Азарии и Мисаилу, другом своим: |
2:18 См.: 🔗Пс. 144:19 | и щедрот прошаху у Бога небеснаго отайне сей, яко да не погибнут Даниил и друзие его со прочиими мудрыми Вавилонскими. |
2:19 См.: 🔗Иоил. 2:28 | Тогда Даниилу во сне нощию тайна открыся: и благослови Даниил Бога небеснаго |
2:20 См.: 🔗Пс. 112:2 | и рече: буди имя Господа Бога благословено от века и до века, яко премудрость и смысл и крепость Его есть, |
2:21 | и Той пременяет времена и лета, поставляет цари и преставляет, даяй премудрость мудрым и разум ведущым смышление: |
2:22 | Той открывает глубокая и сокровенная, сведый сущая во тме и свет с Ним есть: |
2:23 | Тебе, Боже отцев моих, исповедаюся и хвалю, яко премудрость и силу дал ми еси и возвестил ми еси, яже просихом у Тебе, и видение царево возвестил ми еси. |
2:24 | И прииде Даниил ко Ариоху егоже пристави царь погубити мудрыя Вавилонския, и рече ему: мудрых Вавилонских не погубляй, но введи мя пред царя, и сказание сна возвешу ему. |
2:25 | Тогда Ариох с потщанием введе Даниила пред царя и рече ему: обретох мужа от пленник жидовских, иже сказание царю возвестит. |
2:26 См.: 🔗Дан. 1:17 | И отвеща царь и рече Даниилу, емуже имя Валтасар: можеши ли ми возвестити сон, егоже видех, и сказание его? |
2:27 | И отвеща Даниил пред царем и рече: тайны, еяже царь вопрошает, несть мудрых, волхвов, ниже обаятелей газаринов (сила) возвестити царю: |
2:28 | но есть Бог на небеси открываяй тайны и возвести царю Навуходоносору, имже подобает быти в последния дни. Сон твой и видение главы твоея на ложи твоем сие есть, царю: |
2:29 См.: 🔗Ам. 3:7 | помышления твоя на ложи твоем взыдоша, чесому подобает быти по сих, и Открываяй тайны яви тебе, имже подобает быти: |
2:30 См.: 🔗Дан. 5:12 | и мне не премудростию сущею во мне паче всех живущих тайна сия открыся, но ради того, яко да возвещу сказание царю, да уразумееши размышления сердца твоего. |
2:31 | Ты, царю видел еси: и се, тело едино, велие тело оно, и обличие его высоко, стоящо пред лицем твоим, и образ его страшен: |
2:32 | тело, егоже глава от злата чиста, руце и перси и мышцы его сребряны, чрево и стегна медяна, |
2:33 | голени железны, нозе, часть убо некая железна и часть некая скудельна: |
2:34 См.: 🔗Мф. 21:44 🔗Лк. 20:18 | видел еси, дондеже отторжеся камень от горы без рук, и удари тело в нозе железны и скудельны, и истни их до конца: |
2:35 | тогда сотрошася вкупе скудель, железо, медь, сребро и злато, и бысть яко прах от гумна летня: и взят я премногий ветр, и место не обретеся им: камень же поразивый тело бысть гора велика и наполни всю землю. |
2:36 | Сей есть сон, а сказание его речем пред царем. |
2:37 См.: 🔗Дан. 5:18 | Ты, царю, царь царей, емуже Бог небесный царство даде крепко и державно и честно: |
2:38 | во всяцем месте, идеже живут сынове человечи и зверие польстии, и птицы небесныя и рыбы морския дал есть в руку твою и поставил тя властелина всем: ты еси глава златая. |
2:39 | И последи тебе востанет царство другое меншее тебе, еже есть сребро, царство же третие, еже есть медь, еже соодолеет всей земли, |
2:40 | и царство четвертое, еже будет крепко аки железо: якоже железо стончевает и умягчает вся, такожде и то истончит и истнит вся. |
2:41 | А яко видел еси нозе и персты, часть убо некую железну, часть же некую глиняну, царство разделено будет, и от корене железна будет в нем, якоже видел еси железо смешено с глиною: |
2:42 | и персты ножнии, часть убо некая железна, часть же некая глиняна, часть некая царства будет крепка и от него будет сокрушена. |
2:43 См.: 🔗Дан. 11:17 | Яко видел еси железо смешено со глиною, смешены будут во племени человечи, и не будут прилепляющеся сей к сему, якоже железо не смешается со глиною. |
2:44 | И во днех царей тех возставит Бог небесный царство, еже во веки не разсыплется, и царство Его людем инем не останется, истнит и развеет вся царства, тое же станет во веки, |
2:45 | якоже видел еси, яко отсечеся от горы камень без рук и истни глину, железо, медь, сребро, злато. Бог великий возвести царю, имже подобает быти по сих: и истинен сон, и верно сказание его. |
2:46 См.: 🔗Деян. 14:13 | Тогда царь Навуходоносор паде на лице и поклонися Даниилу, и рече дары и благовония возлияти ему. |
2:47 См.: 🔗Дан. 4:6 | И отвещав царь рече Даниилу: поистинне Бог ваш Той есть Бог богов и Господь господей и Царь царей, открываяй тайны, понеже возмогл еси открыти тайну сию. |
2:48 | И возвеличи царь Даниила, и дары велики и многи даде ему, и постави его над всею страною Вавилонскою и князя воеводам, над всеми мудрыми Вавилонскими. |
2:49 | И Даниил проси у царя и пристави над делы страны Вавилонския Седраха, Мисаха и Авденаго. Даниил же бяше во дворе цареве. |