Книга Исход, глава 25

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 25
25:1	И рече Господь к Моисею, глаголя:
25:2 См.: 🔗Исх. 35:5	рцы сыном Израилевым, и да возмут Ми начатки от всех, яже угодна будут сердцу их, да возмете начатки Моя.
25:3	Сей же есть начаток, егоже возмете от них: злато и сребро и медь,
25:4	и синету и багряницу, и червленицу сугубу (пряденую), и виссон сканый, и власы козия,
25:5	и кожы овни очервленены, и кожы сини, и древа негниющая,
25:6	и елей в свещение, фимиам во елей помазания и в сложение фимиама,
25:7	и камени Сардийския, и камени в ваяние на епомиду и подир.
25:8	И да сотвориши Ми освящение, и явлюся в вас:
25:9 См.: 🔗Исх. 26:30	и сотвориши ми по всему, елика Аз покажу тебе на горе, образ скинии и образ всех сосудов ея: сице да сотвориши.
25:10	И сотвориши кивот свидения от древ негниющих, двою лактий и пол в долготу, и лактя и пол в широту, и лактя и пол в высоту:
25:11	и позлатиши его златом чистым, внутрьуду и внеуду позлатиши его, и сотвориши верху его венец злат витый окрест:
25:12	и слиеши ему четыри колца злата, и возложиши на четыри страны его, два колца на едину страну, и два на другую страну.
25:13	Сотвориши же носила от древа негниюща и позлатиши я златом чистым:
25:14	и вложиши носила в колца, яже на странах кивота, носити ими кивот:
25:15	в колцах кивота да будут носила не зыблющеся:
25:16 См.: 🔗Исх. 16:34 🔗Евр. 9:4	и вложиши в кивот свидения, яже дам тебе.
25:17 См.: 🔗Исх. 37:6	И да сотвориши очистилище покров от злата чиста, двою лактий и пол в долготу, лактя же и пол в широту:
25:18	и сотвориши два херувима злата изваянна, и возложиши я от обоих стран очистилища:
25:19	да сотворятся херувими, един от страны сея и другий от страны другия очистилища, и сотвориши два херувима на обоих странах:
25:20 См.: 🔗Евр. 9:5	да будут херувими распростирающе крила верху, соосеняюще крилами своими над очистилищем, и лица их ко другъдругу, на очистилище будут лица херувимска:
25:21 См.: 🔗Исх. 26:34 🔗Втор. 10:2	и да возложиши очистилище на кивот верху, и в кивот да вложиши свидения, яже дам тебе.
25:22 См.: 🔗Исх. 29:42	И познан буду тебе оттуду, и возглаголю тебе с верху очистилища между двема херувимы, иже суть над кивотом свидения, и по всем, елика аще заповем тебе к сыном Израилевым.
25:23 См.: 🔗Исх. 35:13 🔗Евр. 9:2	И сотвориши трапезу от древ негниющих, двою лактий в долготу, и лактя в широту, и лактя и пол в высоту:
25:24	и позлатиши ю златом чистым, и сотвориши ей витое обложение златое окрест, и сотвориши ей венец длани окрест,
25:25	и сотвориши витое обложение венцу окрест.
25:26	И сотвориши четыри колца злата, и возложиши четыри колца на четыри страны ног ея под венец:
25:27	и да будут колца на влагалища носилам, яко воздвизати ими трапезу.
25:28	И сотвориши носила ея от древ негниющих, и позлатиши я златом чистым, и воздвизатися будет на них трапеза.
25:29	И сотвориши блюда ея и фимиамники, и возливалники и чашы, имиже возливати будеши: от злата чиста да сотвориши я.
25:30 См.: 🔗Лев. 24:6 🔗1Цар. 21:6 🔗3Цар. 7:48	И возлагати будеши на трапезу хлебы предложения предо Мною присно.
25:31 См.: 🔗Исх. 35:14 🔗Чис. 8:4	И да сотвориши светилник от злата чиста, изваян да сотвориши светилник: стебль его и ветви, и чашы и крузи и крины от него да будут:
25:32	шесть же ветвий исходящих от стран, три ветви светилника от страны его единыя и три ветви светилника от страны вторыя:
25:33 См.: 🔗Зах. 4:2	и три чашы во образ ореха, на единей ветви круг и крин: тако шести ветвам исходящым от светилника:
25:34	и на светилнике четыри чашы во образ ореха, на единей ветви крузи и крины его:
25:35	круг под двема ветвми от него, и круг под четырми ветвми от него: тако шести ветвам исходящым от светилника: и на светилнике четыри чашы во образ ореха:
25:36	крузи и ветви от него да будут: весь изваян от единаго злата чиста.
25:37 См.: 🔗Чис. 8:2	И да сотвориши светил его седмь, и поставиши светила его, и светити будут от единаго лица его:
25:38	и щипцы его, и подставы его от злата чиста сотвориши:
25:39	талантом злата чиста да сотвориши вся сосуды сия.
25:40 См.: 🔗Деян. 7:44 🔗Евр. 8:5	Виждь, да сотвориши по образу показанному тебе на горе.