Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 3 | |
3:1 | Вкупе же Петр и Иоанн восхождаста во святилище на молитву в час девятый. |
3:2 | И некий муж, хром от чрева матере своея сый, носимь бываше, егоже полагаху по вся дни пред дверьми церковными, рекомыми Красными, просити милостыни от входящих в церковь: |
3:3 | иже видев Петра и Иоанна хотящыя внити в церковь, прошаше милостыни. |
3:4 | Воззрев же Петр нань со Иоанном, рече: воззри на ны. |
3:5 | Он же прилежаше има, мня нечто от нею прияти. |
3:6 | Рече же Петр: сребра и злата несть у мене, но еже имам, сие ти даю: во имя Иисуса Христа Назореа востани и ходи. |
3:7 | И емь его за десную руку воздвиже: абие же утвердистеся его плесне и глезне, |
3:8 См.: 🔗Ис. 35:6 | и вскочив ста и хождаше, и вниде с нима в церковь, ходя и скачя и хваля Бога. |
3:9 | И видеша его вси людие ходяща и хваляща Бога, |
3:10 | знаху же его, яко сей бяше, иже милостыни ради седяше при Красных дверех церковных: и исполнишася чуда и ужаса о приключившемся ему. |
3:11 См.: 🔗3Цар. 6:3 | Держащужеся исцелевшему хромому Петра и Иоанна, притекоша к нима вси людие в притвор, нарицаемый Соломонов, ужасни. |
3:12 | Видев же Петр отвещаваше к людем: мужие Израилтяне, что чудитеся о сем, или на ны что взираете, яко своею ли силою или благочестием сотворихом его ходити? |
3:13 См.: 🔗Деян. 5:31 🔗Флп. 2:9 | Бог Авраамов и Исааков и Иаковль, Бог отец наших, прослави Отрока Своего Иисуса, Егоже вы предасте, и отвергостеся Его пред лицем Пилатовым, суждьшу Оному пустити: |
3:14 | вы же Святаго и Праведнаго отвергостеся, и испросисте мужа убийцу дати вам, |
3:15 | Началника же жизни убисте: Егоже Бог воскреси от мертвых, емуже мы свидетелие есмы. |
3:16 | И о вере имене Его, сего, егоже видите и знаете, утверди имя Его: и вера, яже Его ради, даде ему всю целость сию пред всеми вами. |
3:17 | И ныне, братие, вем, яко по неведению сие сотвористе, якоже и князи ваши: |
3:18 См.: 🔗Лк. 24:27 🔗Деян. 26:22 | Бог же, яже предвозвести усты всех пророк Своих пострадати Христу, исполни тако. |
3:19 | Покайтеся убо и обратитеся, да очиститеся от грех ваших, |
3:20 См.: 🔗Ис. 49:10 | яко да приидут времена прохладна от лица Господня, и послет пронареченнаго вам Христа Иисуса, |
3:21 | Егоже подобает небеси убо прияти даже до лет устроения всех, яже глагола Бог усты всех святых Своих пророк от века. |
3:22 См.: 🔗Мф. 17:5 🔗Деян. 7:37 | Моисей убо ко отцем рече: яко Пророка вам воздвигнет Господь Бог ваш от братии вашея, яко мене: Того послушайте по всему, елика аще речет к вам: |
3:23 См.: 🔗Втор. 18:15 | будет же, всяка душа, яже аще не послушает Пророка онаго, потребится от людий. |
3:24 | И вси же пророцы от Самуила и иже по сих, елицы глаголаша, такожде предвозвестиша дни сия. |
3:25 | Вы есте сынове пророк и завета, егоже завеща Бог ко отцем вашым, глаголя ко Аврааму: и о семени твоем возблагословятся вся отечествия земная. |
3:26 См.: 🔗Мф. 10:6 🔗Деян. 13:46 | Вам первее Бог, воздвигий Отрока Своего Иисуса, посла Его благословяща вас, во еже отвратитися вам комуждо от злоб ваших. |