Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 2 | |
2:1 См.: 🔗Лев. 19:15 | Братие моя, не на лица зряще имейте веру Господа нашего Иисуса Христа славы. |
2:2 | Аще бо внидет в сонмище ваше муж, злат перстень нося, в ризе светле, внидет же и нищь в худе одежди, |
2:3 | и воззрите на носящаго ризу светлу, и речете ему: ты сяди зде добре: и нищему речете: ты стани тамо, или сяди зде на подножии моем: |
2:4 | и не разсмотристе в себе, и бысте судии помышлений злых. |
2:5 См.: 🔗Исх. 20:6 🔗Мф. 5:3 | Слышите, братие моя возлюбленная, не Бог ли избра нищыя мира сего богаты в вере и наследники Царствия, еже обеща любящым Его? |
2:6 | Вы же укористе нищаго. Не богатии ли насилуют вам, и тии влекут вы на судища? |
2:7 | Не тии ли хулят доброе имя нареченное на вас? |
2:8 См.: 🔗Лев. 19:18 🔗Мф. 5:43 | Аще убо закон совершаете царский, по Писанию: возлюбиши искренняго своего якоже себе самаго, добре творите: |
2:9 См.: 🔗Лев. 19:15 | аще же на лица зрите, то грех содеваете, обличаеми от закона якоже преступницы. |
2:10 См.: 🔗Мф. 5:19 | Иже бо весь закон соблюдет, согрешит же во единем, бысть всем повинен. |
2:11 См.: 🔗Исх. 20:13 🔗Мф. 19:18 | Рекий бо: не прелюбы сотвориши, рекл есть и: не убиеши. Аще же не прелюбы сотвориши, убиеши же, был еси преступник закона. |
2:12 | Тако глаголите и тако творите, яко законом свободным имущии суд прияти. |
2:13 См.: 🔗Прит. 21:13 🔗Мф. 6:15 | Суд бо без милости не сотворшему милости: и хвалится милость на суде. |
2:14 См.: 🔗Мф. 7:26 | Кая польза, братие моя, аще веру глаголет кто имети, дел же не имать? Еда может вера спасти его? |
2:15 См.: 🔗Лк. 3:11 🔗1Ин. 3:17 | Аще же брат или сестра нага будета и лишена будета дневныя пищи, |
2:16 | речет же има кто от вас: идита с миром, грейтася и насыщайтася? Не даст же има требования телеснаго: кая польза? |
2:17 | Такожде и вера, аще дел не имать, мертва есть о себе. |
2:18 | Но речет кто: ты веру имаши, аз же дела имам: покажи ми веру твою от дел твоих, и аз тебе покажу от дел моих веру мою. |
2:19 | Ты веруеши, яко Бог един есть: добре твориши: и беси веруют, и трепещут. |
2:20 | Хощеши же ли разумети, о, человече суетне, яко вера без дел мертва есть? |
2:21 См.: 🔗Быт. 22:9 🔗Евр. 11:17 | Авраам отец наш не от дел ли оправдася, вознес Исаака сына своего на жертвенник? |
2:22 | Видиши ли, яко вера поспешествоваше делом его, и от дел совершися вера? |
2:23 | И совершися Писание глаголющее: верова же Авраам Богови, и вменися ему в правду, и друг Божий наречеся. |
2:24 | Зрите ли убо, яко от дел оправдается человек, а не от веры единыя? |
2:25 См.: 🔗Нав. 2:1 🔗Евр. 11:31 | Такожде же и Раав блудница не от дел ли оправдася, приемши сходники и иным путем изведши их? |
2:26 | Якоже бо тело без духа мертво есть, тако и вера без дел мертва есть. |