Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 3 | |
3:1 | Сыне, моих законов не забывай, глаголы же моя да соблюдает твое сердце: |
3:2 См.: 🔗Втор. 8:1 🔗Втор. 30:16 | долготу бо жития и лета жизни и мир приложат тебе. |
3:3 | Милостыни и вера да не оскудевают тебе: обложи же я на твоей выи и напиши я на скрижали сердца твоего: и обрящеши благодать. |
3:4 См.: 🔗Рим. 12:17 | И промышляй добрая пред Господем (Богом) и человеки. |
3:5 См.: 🔗Иер. 9:23 🔗4Цар. 18:5 | Буди уповая всем сердцем на Бога, о твоей же премудрости не возносися: |
3:6 | во всех путех твоих познавай ю, да исправляет пути твоя. |
3:7 См.: 🔗Рим. 12:16 🔗Еккл. 7:17 | Не буди мудр о себе: бойся же Бога и уклоняйся от всякаго зла: |
3:8 | тогда изцеление будет телу твоему и уврачевание костем твоим. |
3:9 | Чти Господа от праведных твоих трудов и начатки давай ему от твоих плодов правды: |
3:10 | да исполнятся житницы твоя множеством пшеницы, вино же точила твоя да источают. |
3:11 | Сыне, не пренебрегай наказания Господня, ниже ослабевай от Него обличаемь: |
3:12 | егоже бо любит Господь, наказует, биет же всякаго сына, егоже приемлет. |
3:13 | Блажен человек, иже обрете премудрость, и смертен, иже уведе разум. |
3:14 См.: 🔗Иов. 28:15 🔗Прит. 8:11 | Лучше бо сию куповати, нежели злата и сребра сокровища: |
3:15 | честнейша же есть камений многоценных: не сопротивляется ей ничтоже лукаво, благознатна есть всем приближающымся ей: всяко же честное недостойно ея есть. |
3:16 См.: 🔗Прит. 4:10 🔗Прит. 9:11 | Долгота бо жития и лета жизни в деснице ея, в шуйце же ея богатство и слава: от уст ея исходит правда, закон же и милость на языце носит. |
3:17 | Путие ея путие добри, и вся стези ея мирны. |
3:18 См.: 🔗Прит. 11:30 🔗Прит. 15:4 | Древо живота есть всем держащымся ея, и воскланяющымся на ню, яко на Господа, тверда. |
3:19 См.: 🔗Пс. 32:6 | Бог премудростию основа землю, уготова же небеса разумом: |
3:20 | в чувстве Его бездны разверзошася, облацы же источиша росу. |
3:21 | Сыне, да не преминеши, соблюди же мой совет и мысль: |
3:22 | да жива будет душа твоя, и благодать будет на твоей выи: (будет же изцеление плотем твоим и уврачевание костем твоим:) |
3:23 См.: 🔗Пс. 36:24 | да ходиши надеяся в мире во всех путех твоих, нога же твоя не поткнется. |
3:24 | Аще бо сядеши, безбоязнен будеши, аще же поспиши, сладостно поспиши. |
3:25 См.: 🔗Пс. 111:7 | И не убоишися страха нашедшаго, ниже устремления нечестивых находящаго: |
3:26 | Господь бо будет на всех путех твоих и утвердит ногу твою, да не поползнешися. |
3:27 См.: 🔗Сир. 4:2 | Не отрецыся благотворити требующему, егда имать рука твоя помогати. |
3:28 См.: 🔗1Пет. 4:10 🔗2Кор. 8:12 | Не рцы: отшед возвратися, и заутра дам, сильну ти сущу благотворити: не веси бо, что породит день находяй. |
3:29 | Не соплетай на друга твоего зла, пришелца суща и уповающа на тя. |
3:30 | Не враждуй на человека туне, да не что на тя содеет злое. |
3:31 | Не стяжи злых мужей поношения, ни возревнуй путем их. |
3:32 | Нечист бо пред Господем всяк законопреступник и с праведными не сочетавается. |
3:33 См.: 🔗Втор. 28:15 🔗Мал. 2:2 | Клятва Господня в домех нечестивых, дворы же праведных благословляются. |
3:34 См.: 🔗Иак. 4:6 🔗1Пет. 5:5 | Господь гордым противится, смиренным же дает благодать. |
3:35 | Славу премудрии наследят, нечестивии же вознесоша безчестие. |