Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 6 | |
6:1 См.: 🔗Иак. 1:22 | И сия заповеди и оправдания и суды, елика заповеда Господь Бог ваш научити вас творити тако на земли, в нюже вы входите тамо, наследити ю: |
6:2 См.: 🔗Втор. 4:40 | да боитеся Господа Бога вашего, хранити вся оправдания Его и заповеди Его, яже аз заповедаю тебе днесь, ты и сынове твои, и сыны сынов твоих, во вся дни живота твоего, да многи дни пребудете. |
6:3 | И послушай, Израилю, и снабди творити, да благо ти будет, и да умножитеся зело, якоже глагола Господь Бог отец ваших, дати тебе землю кипящую млеком и медом. И сия оправдания и суды, елика заповеда Господь (Бог) сыном Израилевым в пустыни, изшедшым им из земли Египетския. |
6:4 См.: 🔗Мк. 12:29 | Слыши, Израилю: Господь Бог наш Господь един есть. |
6:5 | И возлюбиши Господа Бога твоего от всего сердца твоего и от всея души твоея и от всея силы твоея. |
6:6 См.: 🔗Втор. 4:9 | И да будут словеса сия, яже Аз заповедаю тебе днесь, в сердцы твоем и в души твоей, |
6:7 См.: 🔗Втор. 30:19 🔗Пс. 77:5 | и да накажеши ими сыны твоя, и да возглаголеши о них седяй в дому и идый путем, и лежа и востая: |
6:8 | и навяжеши я в знамение на руку твою, и да будут непоколеблема пред очима твоима: |
6:9 | и да напишете я на празех храмине ваших и врат ваших. |
6:10 См.: 🔗Быт. 50:24 🔗Исх. 33:1 | И будет егда введет тя Господь Бог твой в землю, еюже клятся отцем твоим, Аврааму и Исааку и Иакову, дати тебе грады велики и добры, ихже не создал еси, |
6:11 См.: 🔗Втор. 8:10 | домы полны всяких благ, ихже не наполнил еси, потоки ископаны, ихже не ископал еси, винограды и маслины, ихже не насадил еси: и ядый и насытився, |
6:12 | вонми себе, да не разширится сердце твое, да не забудеши Господа Бога твоего, изведшаго тебе из земли Египетския, от дому работы. |
6:13 | Господа Бога твоего да убоишися, и тому единому послужиши, и к Нему прилепишися, и именем Его кленешися. |
6:14 См.: 🔗Исх. 20:2 | Да не ходите вслед богов иных, богов языческих, иже окрест вас: |
6:15 | яко Бог ревнив Господь Бог твой посреде тебе: да не разгневався яростию Господь Бог твой на тя, потребит тя от лица земли. |
6:16 | Да не искусиши Господа Бога твоего, якоже искушасте во Искушении. |
6:17 | Храня да сохраниши заповеди Господа Бога твоего, свидения Его и оправдания Его, елика заповеда тебе: |
6:18 См.: 🔗Быт. 12:7 🔗Быт. 13:15 | и да сотвориши угодное и благое пред Господем Богом твоим, да благо будет тебе, и внидеши и наследиши землю благую, еюже клятся Господь отцем вашым, |
6:19 См.: 🔗Исх. 23:27 | отгнати вся враги твоя от лица твоего, якоже глагола Господь. |
6:20 См.: 🔗Исх. 12:26 | И будет егда вопросит тя сын твой утре, глаголя: что суть свидения и оправдания и суды, елика заповеда Господь Бог наш нам? |
6:21 | И речеши сыну твоему: раби бехом фараону в земли Египетстей, и изведе нас Господь Бог оттуду рукою крепкою и мышцею высокою: |
6:22 | и даде Господь (Бог) знамения и чудеса велика и зла во Египте на фараона и на дом его и на силу его пред нами, |
6:23 | и нас изведе Господь Бог наш оттуду, да введет нас дати нам землю сию, еюже клятся Господь Бог наш отцем нашым, дати ю нам: |
6:24 См.: 🔗Пс. 66:7 | и заповеда нам Господь творити вся оправдания сия, боятися Господа Бога нашего, да благо будет нам во вся дни, да живем, якоже и днесь, |
6:25 | и милосердие будет нам, аще сохраним творити вся заповеди закона сего пред Господем Богом нашим, якоже заповеда нам. |