Книга пророка Иеремии, глава 51

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 51
51:1 См.: 🔗Ис. 13:1 🔗Иер. 4:11	Тако глаголет Господь: се, Аз воздвигну на Вавилон и на живущыя Халдеи ветр зноен губителный:
51:2 См.: 🔗Ис. 27:12	и послю на Вавилон ругатели, и студно поругаются ему и истлят землю его: понеже горе на Вавилон окрест в день озлобления его.
51:3	Да наляцает наляцаяй лук свой, и да облечется в броня своя, и не пощадите юнош его, и побийте все воинство его.
51:4	И падут избиеннии в земли Халдейстей и язвеннии во странах ея.
51:5 См.: 🔗Ин. 14:18	Понеже не овдове Израиль и Иуда от Бога Своего, от Господа Вседержителя, яко земля их наполнися неправды от Святых Израилевых.
51:6 См.: 🔗Иер. 50:8	Бежите от среды Вавилона и спасите кийждо душу свою и не погибнете в неправде его, зане время отмщения его есть от Господа, воздаяние Той воздаст ему.
51:7 См.: 🔗Иер. 25:27	Чаша златая Вавилон в руце Господни, напаяющи всю землю, от вина его пиша (вси) языцы, сего ради потрясошася.
51:8 См.: 🔗Ис. 21:9 🔗Отк. 14:8 🔗Отк. 18:2	Внезапу паде Вавилон и сокрушися: плачите по нем, возмите масти к болезни его, да изцелится.
51:9 См.: 🔗Отк. 16:19 🔗Отк. 18:5	Врачевахом Вавилона, и не изцеле: оставим его и отидем кийждо в землю свою, взыде бо к небеси суд его и воздвижеся даже до звезд.
51:10 См.: 🔗Мих. 7:9	Изнесе Господь суд Свой: приидите и возвестим в Сионе дела Господа Бога нашего.
51:11 См.: 🔗Иер. 46:4 🔗Иер. 50:28 🔗Ис. 13:17	Наострите стрелы, наполните тулы: воздвиже Господь дух царей Мидских, яко противу Вавилона гнев Его, да погубит и, понеже отмщение Господне есть, отмщение людий Его.
51:12	На стенах Вавилонских воздвигните знамя, поставите стражи, уготовите стражей, уготовите оружие: яко умысли Господь, и сотворит, яже рече на живущыя в Вавилоне,
51:13 См.: 🔗Отк. 17:2	живый над водами многими и богат в сокровищих своих: прииде конец твой истинно во утробы твоя.
51:14 См.: 🔗Ам. 6:8	Клятся бо Господь Сил мышцею Своею, яко наполню тебе людьми, якоже акридами, и возгласят над тобою низходящии.
51:15 См.: 🔗Быт. 1:6 🔗Иер. 10:12	Господь сотворивый землю в силе Своей и устроивый вселенную в мудрости Своей, и разумением Своим распростре небеса,
51:16 См.: 🔗Пс. 134:7	егда Он даст глас, умножатся воды на небеси, воздвизаяй облаки от конец земли, молнию в дождь сотвори, изводяй свет от сокровищ Своих.
51:17 См.: 🔗Иер. 10:14 🔗Ис. 44:9	Обуя всяк человек от разума, посрамися всяк слиятель от изваяний своих, яко ложная слияния его, и несть духа в них:
51:18	суетна суть дела и смеху достойна, в час посещения своего погибнут.
51:19 См.: 🔗Иер. 10:16	Не такова часть Иаковля, яко Сотворивый всяческая Той есть, (а Израиль) жезл достояния Его, Господь Вседержитель имя Его.
51:20 См.: 🔗Иер. 50:23	Сокрушаеши ты Мне сосуды бранныя, и Аз сокрушу в тебе языки и погублю в тебе царствия:
51:21	и избию в тебе кони и всадники их, и избию в тебе колесницы и вседающих на них:
51:22	и избию в тебе мужа и жену, и избию в тебе стара и отрока, и избию в тебе юношу и деву:
51:23	и избию в тебе пастыря и стада его, и избию в тебе орюща и работна скота его, и избию в тебе воеводы и правители.
51:24 См.: 🔗Иер. 30:16 🔗Иер. 50:29 🔗2Фес. 1:6	И воздам Вавилону и всем жителем Халдейским вся злобы их, яже сотвориша над Сионом пред очима вашима, глаголет Господь.
51:25 См.: 🔗Иов. 9:5 🔗Отк. 8:8	Се, Аз на тя, горо смертоносная, глаголет Господь, растлевающая всю землю, и простру руку Мою на тя и извергу тя из каменей, и дам тя в гору сожженую:
51:26	и не возмут от тебе камене во угл и камене во основание, яко потребишися во веки, глаголет Господь.
51:27 См.: 🔗Иер. 6:4 🔗Быт. 8:4 🔗Ис. 37:38	Воздвигните знамя на земли, вострубите трубою во языцех, освятите нань языки, возвестите нань царствам Араратским от Мене и Асханазеом: утвердите над ним стрельницы, возведите нань кони, яко акридов множество.
51:28	Возведите нань языки, царя Мидска и всея земли, воевод его и всех воев его и всея земли области его.
51:29	И потрясеся земля и смутися, зане воста на Вавилон умышление Господне, еже положити землю Вавилонску пусту и ненаселену.
51:30 См.: 🔗Иер. 50:37	Оскудеша крепцыи Вавилонстии еже ратовати: сядут тамо во ограде, погибе храбрость их, и быша яко жены: пожжена суть селения, сотрены заворы его.
51:31	Гоняй во сретение текуща постигнет, и вестник сретит посла, да возвестит царю Вавилонску, яко взят бысть град его.
51:32 См.: 🔗Иер. 50:38	От края прехождений его яти быша, и твердыни его зажжены огнем, и мужие его воинстии исходят.
51:33 См.: 🔗Мих. 4:12 🔗Отк. 14:15	Тако бо глаголет Господь Вседержитель, Бог Израилев: домове царя Вавилонскаго яко гумно зрело измлачени будут: еще мало, и приидет жатва его.
51:34	Снеде мя, раздроби мя, прият мя тма тонка, Навуходоносор царь Вавилонский пожре мя, яко змий наполни чрево свое сладостию моею: и извергоша мя.
51:35	Труды мои и беды моя на Вавилон, речет живущая в Сионе, и кровь моя на живущыя в Халдеех, речет Иерусалим.
51:36	Сего ради тако глаголет Господь: се, Аз судити буду соперника твоего и отмщу отмщение твое, и пусто сотворю море его и изсушу потоки его.
51:37 См.: 🔗Иер. 50:13 🔗Отк. 18:2	И будет Вавилон в запустение, жилище змием, в чудо и позвиздание, понеже не будет живущаго.
51:38 См.: 🔗Ис. 5:29	Вкупе аки львы востанут и аки скимни львов.
51:39 См.: 🔗Ис. 29:10	В горячести их дам питие им и упою я, да спят и уснут сном вечным и не востанут, глаголет Господь.
51:40	И низведу я яко агнцы на заклание и яко овны с козлы.
51:41 См.: 🔗Иер. 25:26	Како взяся Сесах, и ята слава всея земли? Како бысть во удивление Вавилон во языцех?
51:42 См.: 🔗Ис. 8:7 🔗Иез. 26:3	Взыде на Вавилон море в шуме волн своих, и покрыся.
51:43	Быша гради его в запустение, земля безводна и пуста, земля, в нейже никтоже поживет, и ниже будет витати в нем сын человечь.
51:44	И посещу на Вила в Вавилоне, и извергу то, еже поглоти, от уст его, и не соберутся вящше к нему языцы, зане и стены Вавилонския падут.
51:45 См.: 🔗Иер. 51:6	Изыдите от среды его, людие Мои, да спасет кийждо душу свою от гнева ярости Господни.
51:46	Да не когда умягчится сердце ваше, и убоитеся ради слуха, иже услышится на земли, и приидет в лето слышание, и по лете слышание, бедность и неправда на землю, и властелин на властелина.
51:47	Сего ради, се, дние грядут, и посещу на изваяныя Вавилона: и вся земля его посрамится, и вси язвении его падут посреде его.
51:48 См.: 🔗Отк. 18:20	И возвеселятся над Вавилоном небеса и земля и вся сущая в них: от полунощи бо приидут нань всегубителие, глаголет Господь:
51:49	и якоже сотвори Вавилон падати язвеным во Израили, тако в Вавилоне падут язвении всея земли.
51:50	Избегшии меча, идите, не стойте: иже издалече, помяните Господа, и Иерусалим да взыдет на сердце ваше.
51:51	Посрамихомся, зане слышахом ругание наше, покры срамота лице наше, яко приидоша чуждии во святая наша в дом Господень.
51:52 См.: 🔗Иез. 26:15	Сего ради, се, дние грядут глаголет Господь, и посещу на изваяния его, и по всей земли его падут язвении.
51:53 См.: 🔗Пс. 138:8 🔗Ам. 9:2 🔗Авд. 1:4	Яко аще взыдет Вавилон на небо и аще утвердит на высоте крепость свою, от Мене приидут губителие его, глаголет Господь.
51:54	Глас вопля Вавилонска, и сотрение велико в земли Халдейстей:
51:55	яко погуби Господь Вавилона и сотре от него глас велий шумящь яко воды многи, даде в пагубу глас его:
51:56 См.: 🔗Втор. 32:35 🔗Рим. 12:19 🔗Евр. 10:30	яко прииде на Вавилон хищник, яти быша сильнии его, увяде лук их, яко Бог воздает им,
51:57	Господь воздает ему воздаяние: и упоит князи его и мудрыя его, и воеводы его и вои его и сильныя его, и уснут сном вечным и не возбудятся, глаголет Царь, Господь Вседержитель имя Его.
51:58 См.: 🔗Ис. 2:15	Тако глаголет Господь Вседержитель: стена Вавилонска сия преширока, подкопанием подкопана будет, и врата его высока огнем сожжена будут, и будут трудитися людие вотще, и языцы в начале погибнут.
51:59	Слово, еже заповеда Господь Иеремии пророку, рещи Сарею сыну Нириину, сына Маассеова, егда иде от Седекии царя Иудина в Вавилон, в четвертое лето царства его: Сарей же бе началник даров.
51:60 См.: 🔗Иер. 36:7	И написа Иеремиа вся злая, яже имяху приити на Вавилон, во едину книгу вся словеса сия, яже писана суть на Вавилон. И рече Иеремиа к Сарею:
51:61	егда внидеши в Вавилон, и узриши и прочтеши вся словеса сия, и речеши:
51:62	Господи, Ты рекл еси противу места сего погубити е, и да не будет живяй в нем от человека и до скота, и да будет в вечную пустыню:
51:63	и будет, егда прочтеши книгу сию, привяжи к ней камень и вверзи ю посреде Евфрата и рцы:
51:64 См.: 🔗Отк. 18:21	тако потопится Вавилон и не востанет от лица зол, яже Аз наведу нань, и разорится. Даже до зде словеса Иеремиина.