Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 10 | |
10:1 См.: 🔗1Кор. 3:18 | Мухи умершыя згнояют елеа сладость: честно малое мудрости паче славы велики безумия. |
10:2 | Сердце мудраго одесную его, сердце же безумнаго ошуюю его: |
10:3 | и в путь егда безумный идет, сердце его лишается, и яже помышляет, вся безумие суть. |
10:4 См.: 🔗Пс. 37:2 | Аще дух владеющаго взыдет на тя, места твоего не остави: яко изцеление утолит грехи велики. |
10:5 | Есть лукавство, еже видех под солнцем, аки невольно изыде от лица владеющаго: |
10:6 | вдан безумный в высоты велики, а богатии во смиренных сядут: |
10:7 | видех рабов на конех, и князей идущих яко рабов на земли. |
10:8 | Копаяй яму впадет в ню, и разоряющаго ограду угрызнет его змий. |
10:9 | Иземляй камение поболит от них, разсецаяй дрова беду приимет в них: |
10:10 | аще спадет сечиво, и сам лицем смятется: и силы укрепит, и изюбилие мужу мудрость. |
10:11 | Аще угрызнет змий не в шепте, и несть излишества обавающему. |
10:12 | Словеса уст премудраго благодать, устне же безумнаго потопят его: |
10:13 | начало словес уст его безумие, и последняя уст его прелесть лукава. |
10:14 См.: 🔗Еккл. 8:7 | Безумный умножает словеса: не разуме человек, что бывшее и что будущее, что созади его, (и) кто возвестит ему? |
10:15 | Труд безумных озлобит их, иже не разуме ити во град. |
10:16 См.: 🔗Ис. 3:4 | Горе тебе, граде, в немже царь твой юн, и князи твои рано ядят. |
10:17 | Блаженна ты, земле, еяже царь твой сын свободных, и князи твои во время ядят в силе и не постыдятся. |
10:18 | В леностех смирится строп, и в празднестве рук прокаплет храмина. |
10:19 | Во смех творят хлеб и вино и елей, еже веселитися живущым: и сребра со смирением послушают всяческая. |
10:20 См.: 🔗Исх. 22:28 | И в совести убо твоей не клени царя, и в клети ложницы твоея не клени богатаго: яко птица небесная донесет глас твой, и имеяй криле возвестит слово твое. |