Книга пророка Иезекииля, глава 17

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 17
17:1	И бысть слово Господне ко мне глаголя:
17:2 См.: 🔗Иез. 20:49	сыне человечь, повеждь повесть и рцы притчу на дом Израилев,
17:3 См.: 🔗Дан. 7:4 🔗Ос. 8:1 🔗Иез. 31:3	и речеши: сия глаголет Адонаи Господь: орел великий, великокрилый, долгий протяжением, исполнь ногтей, иже имать повеление внити в Ливан, и взя избранныя кедра,
17:4	и верхи мягкости острога, и принесе я в землю Хананейску, во граде огражденнем положи я:
17:5	и взя от семене земнаго и даде е на поли плодне, (да утвердит корение) над водами многими, видено учини е:
17:6	и прозябе и бысть в виноград немощен и мал величеством, еже являтися лозию его на нем, и корение его под ним бяше: и бысть в виноград, и сотвори розги, и простре отрасли своя.
17:7	И бысть орел другий велик, великокрилный, мног ногтьми, и се, виноград сей оплетаяся об нем: и корение его к нему, и лозие свое испусти ему, еже напаяти себе со грудием сада своего.
17:8	На поли добре, на воде мнозе питается той, еже сотворити прозябения и приносити плод, еже быти в виноград велик.
17:9	Сего ради рцы: сия глаголет Адонаи Господь: еда исправится? Не корение ли мягкоты его и плод изгниет? И изсхнут вся леторасли его, и не мышцею ли великою, ни людьми многими еже исторгнути его из корения его?
17:10 См.: 🔗Иез. 27:26	И се, тыет: еда успеет? Не абие ли, егда коснется ему ветр знойный, посхнет сухотою? Со грудием прозябения своего изсхнет.
17:11	И бысть слово Господне ко мне глаголя:
17:12 См.: 🔗4Цар. 24:10 🔗2Пар. 36:10	сыне человечь, рцы ко дому прогневляющему мя: не весте ли, что суть сия? Рцы им: се, грядет царь Вавилонск на Иерусалим, и возмет царя его и князя его, и отведет я к себе в Вавилон:
17:13 См.: 🔗Иер. 34:19	и поймет от племене царска, и завещает с ним завет, и введет его в клятве, и старейшины земли возмет,
17:14	еже быти в царство немощно, еже весьма не возноситися, (но) хранити завет его и стояти в нем:
17:15 См.: 🔗4Цар. 24:20 🔗Ис. 30:2	и отвержется от него посылая послы своя во Египет дати ему кони и люди многи: еда исправит? Спасется ли творяй сопротивная? И преступаяй завет спасется ли?
17:16 См.: 🔗4Цар. 24:17 🔗Иер. 34:3	Живу Аз, глаголет Адонаи Господь, аще не на месте, идеже царь воцаривый его, иже похули клятву Мою и иже преступи завет Мой, с ним среде Вавилона скончается.
17:17 См.: 🔗4Цар. 25:1 🔗Ис. 29:3 🔗Иез. 4:2	И не в силе велицей, ниже в народе мнозе сотворит с ним фараон брань во острозе и в сограждении стрельниц, еже изяти душы многи.
17:18 См.: 🔗1Езд. 10:19	И похули клятву, еже преступити завет, и се, даде руку свою и вся сия сотвори ему: не спасется.
17:19 См.: 🔗Иез. 9:10	Сего ради рцы: сия глаголет Адонаи Господь: живу Аз, аще не клятву Мою, юже похули, и завет Мой, егоже преступи, дам на главу его:
17:20 См.: 🔗Иез. 12:13 🔗Иез. 32:3	и простру мрежу Мою нань, и ят будет во одержании ея: и приведу его в Вавилон и разсуждуся с ним тамо о неправде его, еюже неправдова ко Мне:
17:21 См.: 🔗Иез. 12:14	и вси избегшии его и вси избраннии со всеми ополчении его мечем падут, и вся оставшая их разсею по всему ветру, и увесте, яко Аз Господь глаголах.
17:22 См.: 🔗Иез. 31:3	Сего ради сия глаголет Адонаи Господь: и возму Аз от избранных кедра высокаго от верха и дам от главы отраслей его, сердца их остружу и насажду аз на горе высоце:
17:23 См.: 🔗Дан. 4:9	и повешу и в горе высоце Израилеве и насажду и, и прорастит отрасль и сотворит плод и будет в кедр велик: и почиет под ним всяк зверь, и под сению его почиет всяка птица, и лозие его паки устроятся:
17:24 См.: 🔗Иез. 36:36 🔗Иез. 37:14	и увесть всяко древо полевое, яко Аз Господь смиряяй древо высокое и возносяй древо смиренное, и изсушаяй древо зеленое и проращаяй древо сухое: Аз Господь глаголах и сотворю.