Книга пророка Иеремии, глава 22

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 22
22:1	Сия рече Господь: иди и вниди в дом царя Иудина и рцы тамо слово сие,
22:2	и речеши: слыши слово Господне, царю Иудин, иже седиши на престоле Давидове, ты и дом твой, и раби твои и людие твои и входящии дверьми сими:
22:3 См.: 🔗Иер. 21:12 🔗Исх. 22:21	сия глаголет Господь: творите суд и правду, и избавите силою угнетена от руку обидящаго и, и пришелца и сира и вдовицы не оскорбляйте, не угнетайте беззаконно, и крове неповинныя не изливайте на месте сем.
22:4 См.: 🔗Иер. 17:25	Аще бо творяще сотворите слово сие, то внидут вратами дому сего царие седящии на престоле Давидове и вседающии на колесницы и на кони, тии и раби их и людие их.
22:5 См.: 🔗Мф. 23:38	Аще же не послушаете словес сих, Сам Собою закляхся, рече Господь, яко в пустыню будет дом сей.
22:6	Понеже тако глаголет Господь на дом царя Иудина: Галаад ты Мне, глава Ливанская, аще не поставлю тебе в пустыню, во грады необитанны,
22:7 См.: 🔗Иер. 21:14 🔗Ис. 13:3 🔗Ис. 37:24	и наведу на тя убивающа мужа и секиру его, и посекут избранныя кедры твоя и вергут на огнь.
22:8 См.: 🔗Втор. 29:24 🔗3Цар. 9:8	И пройдут языцы мнози сквозе град сей, и речет кийждо искреннему своему: вскую сотвори Господь тако граду сему великому?
22:9	И отвещают: сего ради, яко оставиша завет Господа Бога своего и поклонишася богом чуждим и послужиша им.
22:10	Не плачите мертваго, ниже рыдайте о нем: плачите плачем о исходящем, яко не возвратится ктому, ниже увидит земли рождения своего.
22:11 См.: 🔗4Цар. 23:31	Понеже сия рече Господь к Селлиму сыну Иосиину царю Иудину царствующему вместо Иосии отца своего, иже изшел есть от места сего: не возвратится ктому семо,
22:12 См.: 🔗4Цар. 23:34	но на месте том, аможе преведох его, тамо умрет и земли сея не узрит ктому.
22:13 См.: 🔗Лев. 19:13	Горе созидающему дом свой с неправдою и горницы своя не в суде, у негоже ближний его делает туне, и мзды его не воздаст ему:
22:14	иже рече: созижду себе дом пространен, и горницы широки со отверстыми окнами и своды кедровыми, и расписаны червленцем.
22:15	Еда царствовати будеши, яко ты поощряешися о ахазе отце твоем? Не ядят, ниже пиют: лучше тебе было творити суд и правду благу.
22:16 См.: 🔗Иер. 9:24 🔗1Ин. 2:4	Не познаша, не судиша суда смиренных, ниже суда нища: не сие ли тебе есть, еже не знати тебе Мене, рече Господь?
22:17 См.: 🔗Иер. 26:23	Се, не суть очи твои, ниже сердце твое благо, но к сребролюбию твоему и крове неповинныя пролиянию, и ко обидам и ко убийству, еже творити я.
22:18 См.: 🔗Иер. 16:6 🔗3Цар. 13:30	Сего ради сия рече Господь ко Иоакиму сыну Иосиину царю Иудину: горе мужу сему, не оплачут его: горе, брате! Ниже возрыдают о нем: увы мне, господине!
22:19 См.: 🔗Иер. 36:30	Погребением ослим погребется, влачимь извержен будет вне врат Иерусалима.
22:20 См.: 🔗Иер. 14:18 🔗Иер. 30:14	Взыди на Ливан и возопий, и в Васан даждь глас твой, и возопий на он пол моря, яко сотрени суть вси любовнии твои.
22:21 См.: 🔗Иер. 2:20 🔗Иер. 5:23 🔗Иер. 11:7	Глаголах к тебе в падении твоем, и рекл еси: не услышу. Сей путь твой от юности твоея, яко не послушал еси гласа Моего.
22:22 См.: 🔗Ос. 12:1	Всех пастырей твоих упасет ветр, и любовнии твои во пленение пойдут, и тогда постыдишися и посрамишися от всех любящих тя:
22:23 См.: 🔗Иер. 4:31 🔗Иер. 22:14 🔗Сир. 48:21	иже седиши в Ливане и гнездишися в кедрех, возстенеши, егда приидут к тебе болезни, яко раждающия.
22:24 См.: 🔗4Цар. 24:6 🔗Песн. 8:6 🔗Аг. 2:23	Живу Аз, рече Господь, аще будет Иехониа сын Иоакима царь Иудин, перстень на руце десней Моей, оттуду исторгну тя
22:25	и предам тя в руки ищущих души твоея и в руки, ихже ты боишися лица, и в руки Навуходоносора царя Вавилонска и в руки Халдеом,
22:26 См.: 🔗4Цар. 24:12	и отвергу тя и матерь твою, яже роди тя, в землю чужду, в нейже несте рождени, и тамо умрете:
22:27 См.: 🔗Иер. 44:14	а в землю, в нюже тии желают душами своими возвратитися, не возвратятся.
22:28 См.: 🔗Ос. 8:8 🔗4Цар. 24:15	Обезчестися Иехониа, аки сосуд непотребен, яко отриновен бысть той и семя его, и извержен в землю, еяже не ведяше.
22:29	Земле, земле, земле, слыши слово Господне!
22:30	Сия рече Господь: напиши мужа сего отвержена, мужа, иже во днех своих не предуспеет: ниже бо будет от семене его муж, иже сядет на престоле Давидове, и власть имеяй ктому во Иуде.