Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 7 | |
7:1 | А о нихже писасте ми, добро человеку жене не прикасатися. |
7:2 | Но блудодеяния ради кийждо свою жену да имать, и каяждо (жена) своего мужа да имать. |
7:3 См.: 🔗1Пет. 3:7 | Жене муж должную любовь да воздает: такожде и жена мужу. |
7:4 | Жена своим телом не владеет, но муж: такожде и муж своим телом не владеет, но жена. |
7:5 См.: 🔗Иоил. 2:16 | Не лишайте себе друг друга, точию по согласию до времене, да пребываете в посте и молитве, и паки вкупе собирайтеся, да не искушает вас сатана невоздержанием вашим. |
7:6 | Сие же глаголю по совету, (а) не по повелению. |
7:7 См.: 🔗Мф. 19:12 | Хощу бо, да вси человецы будут, якоже и аз: но кийждо свое дарование имать от Бога, ов убо сице, ов же сице. |
7:8 | Глаголю же безбрачным и вдовицам: добро им есть, аще пребудут якоже и аз: |
7:9 См.: 🔗1Тим. 5:14 | аще ли не удержатся, да посягают: лучше бо есть женитися, нежели разжизатися. |
7:10 | А оженившымся завещаваю не аз, но Господь: жене от мужа не разлучатися: |
7:11 | аще ли же и разлучится, да пребывает безбрачна, или да смирится с мужем (своим): и мужу жены не отпущати. |
7:12 | Прочым же аз глаголю, (а) не Господь: аще который брат жену имать неверну, и та благоволит жити с ним, да не оставляет ея: |
7:13 | и жена аще имать мужа неверна, и той благоволит жити с нею, да не оставляет его: |
7:14 | святится бо муж неверен о жене верне, и святится жена неверна о мужи верне: иначе бо чада ваша нечиста были бы, ныне же свята суть. |
7:15 См.: 🔗Рим. 12:18 🔗1Кор. 14:33 | Аще ли неверный отлучается, да разлучится: не поработися (бо) брат или сестра в таковых: в мир бо призва нас (Господь) Бог. |
7:16 | Что бо веси, жено, аще мужа спасеши? Или что веси, мужу, аще жену спасеши? |
7:17 См.: 🔗Деян. 15:28 🔗Еф. 4:1 | Точию коемуждо якоже разделил есть Бог, кийждо якоже призван бысть Господем, тако да ходит: и тако во всех церквах повелеваю. |
7:18 См.: 🔗1Мак. 1:15 | Во обрезании ли кто призван бысть? Да не отторгнется: в необрезании ли кто призван бысть? Да не обрезуется. |
7:19 См.: 🔗Гал. 5:6 | Обрезание ничтоже есть, и необрезание ничтоже есть, но соблюдение заповедий Божиих. |
7:20 См.: 🔗1Фес. 2:12 | Кийждо в звании, в немже призван бысть, в том да пребывает. |
7:21 | Раб ли призван был еси? Да не нерадиши: но аще и можеши свободен быти, болше поработи себе. |
7:22 См.: 🔗Ин. 8:36 🔗Рим. 6:22 | Призванный бо о Господе раб, свободник Господень есть: такожде и призванный свободник, раб есть Христов. |
7:23 См.: 🔗1Кор. 6:20 | Ценою куплени есте: не будите раби человеком. |
7:24 | Кийждо, в немже призван бысть, братие, в том да пребывает пред Богом. |
7:25 См.: 🔗2Кор. 2:17 | О девах же повеления Господня не имам, совет же даю, яко помилован от Господа верен быти. |
7:26 | Мню убо сие добро быти за настоящую нужду, яко добро человеку тако быти. |
7:27 | Привязался ли еси жене? Не ищи разрешения. Отрешился ли еси жены? Не ищи жены. |
7:28 | Аще ли же и оженишися, не согрешил еси: и аще посягнет дева, не согрешила есть. Скорбь же плоти имети будут таковии: аз же вы щажду. |
7:29 | Сие же глаголю, братие, яко время прекращено есть прочее, да и имущии жены, якоже не имущии будут: |
7:30 | и плачущиися, якоже не плачущии: и радующиися, якоже не радующеся: и купующии, яко не содержаще: |
7:31 | и требующии мира сего, яко не требующе: преходит бо образ мира сего. |
7:32 | Хощу же вас безпечальных быти. Не оженивыйся печется о Господних, како угодити Господеви: |
7:33 | а оженивыйся печется о мирских, како угодити жене. Разделися жена и дева: |
7:34 | непосягшая печется о Господних, како угодити Господеви, да будет свята и телом и духом: а посягшая печется о мирских, како угодити мужу. |
7:35 | Сие же на пользу вам самем глаголю: не да сило вам наложу, но к благообразию и благоприступанию Господеви безмолвну. |
7:36 | Аще ли же кто безобразити о деве своей непщует, аще есть превозрастна, и тако должна есть быти: еже хощет, да творит: не согрешает, аще посягнет. |
7:37 | А иже стоит твердо сердцем, не имый нужды, власть же имать о своей воли, и се разсудил есть в сердцы своем блюсти деву свою, добре творит. |
7:38 | Темже и вдаяй браку свою деву добре творит: и не вдаяй лучше творит. |
7:39 См.: 🔗Рим. 7:2 | Жена привязана есть законом, в елико время живет муж ея: аще же умрет муж ея, свободна есть, за негоже хощет, посягнути, точию о Господе. |
7:40 | Блаженнейша же есть, аще тако пребудет, по моему совету: мнюся бо и аз Духа Божия имети. |