Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 6 | |
6:1 | Споспешствующе же и молим, не вотще благодать Божию прияти вам. |
6:2 | Глаголет бо: во время приятно послушах тебе, и в день спасения помогох ти. Се ныне время благоприятно, се ныне день спасения. |
6:3 | Ни едино ни в чемже дающе претыкание, да служение безпорочно будет, |
6:4 См.: 🔗1Кор. 4:1 🔗2Кор. 12:10 | но во всем представляюще себе якоже Божия слуги, в терпении мнозе, в скорбех, в бедах, в теснотах, |
6:5 | в ранах, в темницах, в нестроениих, в трудех, во бдениих, в пощениих, |
6:6 | во очищении, в разуме, в долготерпении, в благости, в Дусе Святе, в любви нелицемерне, |
6:7 | в словеси истины, в силе Божией, оружии правды десными и шуими, |
6:8 | славою и безчестием, гаждением и благохвалением: яко лестцы, и истинни: |
6:9 | яко незнаеми, и познаваеми: яко умирающе, и се живи есмы: яко наказуеми, а не умерщвляеми: |
6:10 См.: 🔗Прит. 13:7 | яко скорбяще, присно же радующеся: яко нищи, а многи богатяще: яко ничтоже имуще, а вся содержаще. |
6:11 | Уста наша отверзошася к вам, Коринфяне, сердце наше распространися. |
6:12 | Не тесно вмещаетеся в нас, утесняетеся же во утробах ваших. |
6:13 | Тожде же возмездие, якоже чадом глаголю, распространитеся и вы. |
6:14 | Не бывайте удобь преложни ко иному ярму, якоже невернии. Кое бо причастие правде к беззаконию? Или кое общение свету ко тьме? |
6:15 См.: 🔗3Цар. 18:21 🔗Сир. 13:21 | Кое же согласие Христови с Велиаром? Или кая часть верну с неверным? |
6:16 | Или кое сложение церкви Божией со идолы? Вы бо есте церкви Бога жива, якоже рече Бог: яко вселюся в них и похожду, и буду им Бог, и тии будут Мне людие. |
6:17 | Темже изыдите от среды их и отлучитеся, глаголет Господь, и нечистоте не прикасайтеся, и Аз прииму вы: |
6:18 См.: 🔗Иер. 3:19 🔗Ос. 1:10 | и буду вам во Отца, и вы будете Мне в сыны и дщери, глаголет Господь Вседержитель. |