Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 17 | |
17:1 См.: 🔗2Цар. 7:2 | И бысть егда обиташе Давид в дому своем, и рече Давид к Нафану пророку: се, аз живу в дому кедрове, кивот же завета Господня под кожами. |
17:2 См.: 🔗2Цар. 7:3 | И рече Нафан к Давиду: все еже в сердцы твоем твори, яко Бог с тобою есть. |
17:3 См.: 🔗2Цар. 7:4 | И бысть нощи тоя, и бысть слово Господне к Нафану, глаголя: |
17:4 См.: 🔗3Цар. 8:19 | иди и рцы Давиду рабу Моему: сия рече Господь: не созиждеши ты Мне дому, еже обитати Ми в нем: |
17:5 См.: 🔗Исх. 7:5 | яко не обитах в дому от дне, в оньже изведох Израиля (от земли Египетския), даже до дне сего, но бых в скинии и в шатре: |
17:6 | во всех аможе ходих со всем Израилем, аще глаголя глаголах коему колену Израилеву, имже повелех да пасут люди Моя, глаголя: чесо ради не создасте Мне дому кедрова? |
17:7 См.: 🔗1Цар. 16:12 | И ныне тако рцы рабу Моему Давиду: сия рече Господь Вседержитель: Аз изях тя от паствы, егда последовал еси стаду, еже быти тебе вождем над людьми Моими Израилем, |
17:8 | и бых с тобою во всех, идеже ходил еси, и потребих вся враги твоя от лица твоего, и сотворих тебе имя якоже имя великих, иже на земли: |
17:9 См.: 🔗2Цар. 7:10 | и дах место людем Моим Израилю, и насадих я, и обитают в нем, и не возскорбят ктому: ни сынове беззакония приложат смирити их якоже от начала |
17:10 См.: 🔗Пс. 17:48 | и от дний, в няже дах судии людем Моим Израилю, и смирих вся враги твоя, и возращу тя, и дом созиждет ти Господь: |
17:11 | и будет егда исполнятся дние твои и почиеши со отцы твоими, и воздвигну семя твое по тебе, еже будет от чрева твоего, и возставлю царство его: |
17:12 | той созиждет Мне дом, и укреплю престол его даже до века: |
17:13 См.: 🔗2Цар. 7:14 | Аз буду ему во отца, и той будет Мне в сына: и милость Мою не отиму от него, якоже отях от бывших прежде тебе: |
17:14 | и уверю его в дому Моем и во царствии его даже до века, и престол его будет исправлен до века. |
17:15 См.: 🔗2Цар. 7:17 | По всем словесем сим и по всему видению сему тако глаголал есть Нафан к Давиду. |
17:16 См.: 🔗2Цар. 7:18 | И прииде царь Давид, и седе пред Господем, и рече: кто есмь аз, Господи Боже мой? И что дом мой, яко возлюбил мя еси до века? |
17:17 См.: 🔗2Цар. 7:19 | И сия мала суть пред Тобою, Боже, и глаголал еси на дом раба Твоего (еще) издалеча, и призрел еси на мя яко видение человека, и возвысил мя еси, Господи Боже: |
17:18 См.: 🔗Пс. 138:1 | что приложит еще Давид к Тебе еже прославити? И ты раба Твоего веси: |
17:19 | Господи, раба Твоего ради сотворил еси все величие сие и по сердцу Твоему, еже знаема сотворити вся величия Твоя: |
17:20 См.: 🔗2Цар. 7:22 | Господи, несть подобен Тебе, и несть Бога разве Тебе, по всем елика слышахом ушима нашима, |
17:21 См.: 🔗Втор. 4:7 | и несть, якоже людие Твои Израиль, язык еще на земли, яко пойде Бог избавити люди Себе, еже положити имя Себе велие и славное, еже изгнати от лица людий Твоих, ихже избавил еси от Египта, языки: |
17:22 | и дал еси люди Твоя Израиля Тебе в люди даже до века, и Ты, Господи, был еси им в Бога: |
17:23 См.: 🔗2Цар. 7:25 | и ныне, Господи, слово Твое, еже глаголал еси рабу Твоему и на дом его, да уверится до века: и сотвори якоже глаголал еси, |
17:24 | и да уверится и возвеличится имя Твое даже до века, глаголющих: Господи, Господи Вседержителю, Боже Израилев, и дом Давида раба Твоего да будет исправлен пред Тобою: |
17:25 См.: 🔗2Цар. 7:27 | Ты бо, Господи Боже мой, отверзл еси ухо раба Твоего создати ему дом, сего ради обрете раб Твой (дерзновение) молитися пред лицем Твоим: |
17:26 | и ныне, Господи, Ты еси Сам Бог, и глаголал еси к рабу Твоему благая сия: |
17:27 См.: 🔗2Цар. 7:29 | и ныне начни благословити дом раба Твоего, да будет во веки пред Тобою: яко Ты, Господи, благословил еси, и благослови во веки. |