Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 29 | |
29:1 См.: 🔗Втор. 5:2 | Сия словеса завета, яже завеща Господь Моисею уставити сыном Израилевым в земли Моавли, кроме завета, егоже завеща им в Хориве. |
29:2 См.: 🔗Исх. 19:4 | И призва Моисей вся сыны Израилевы и рече к ним: вы видесте вся, елика сотвори Господь в земли Египетстей пред вами фараону и всем слугам его и всей земли его, |
29:3 См.: 🔗Втор. 4:34 🔗Втор. 7:15 | искушения великая, яже видеста очи твои, знамения и чудеса великая оная, руку крепкую и мышцу высокую: |
29:4 | и не даде Господь Бог вам сердца разумети и очес видети и ушес слышати, даже до дне сего: |
29:5 См.: 🔗Втор. 8:2 | и водил вас четыредесять лет по пустыни: не обетшаша ризы вашя, и сапози ваши не сотрошася на ногах ваших: |
29:6 | хлеба не ядосте, вина и сикера не писте, да познаете, яко Сей Господь Бог ваш: |
29:7 См.: 🔗Втор. 3:1 🔗Чис. 21:33 | и приидосте до сего места: и изыде Сион царь Есевонский и Ог царь Васанский во сретение нам на брань, |
29:8 | и поразихом их на брани, и прияхом землю их: и дах ю во жребий Рувиму и Гаду и полуплемени Манассиину. |
29:9 | И сохраните творити вся словеса завета сего творити я, да разумеете вся, елика сотворите. |
29:10 | Вы стасте вси днесь пред Господем Богом вашим, племеноначалницы ваши и старейшины ваши, и судии ваши и писмовводители ваши, всяк муж Израилтеск, |
29:11 См.: 🔗Нав. 9:27 | и жены вашя и чада ваша, пришлец иже посреде полка вашего, от древосечца вашего даже до водоносца вашего, |
29:12 | еже прейти в завет Господа Бога вашего и в клятвы Его, елика завещает Господь Бог твой к тебе днесь: |
29:13 | да поставит тя Себе в люди, и Той будет тебе Бог, якоже тебе рече и якоже клятся отцем твоим, Аврааму и Исааку и Иакову. |
29:14 См.: 🔗Втор. 5:3 🔗Нав. 24:25 | И не вам единем аз завет сей и клятву сию завещаваю, |
29:15 См.: 🔗Деян. 2:39 | но и зде сущым с вами днесь, пред Господем Богом вашим, и не сущым с вами зде днесь. |
29:16 | Яко вы весте, како жихом в земли Египетстей и како проидохом посреде языков, ихже преидосте, |
29:17 | и видесте мерзости их и кумиры их, древо и камение, сребро и злато, яже суть у них. |
29:18 См.: 🔗Евр. 12:15 | Еда кто есть в вас муж или жена, или отечество или племя, егоже сердце уклонися от Господа Бога вашего, ити еже служити богом языков оных? Еда кий есть в вас корень горе прорастающь в желчи и горести? |
29:19 | И будет аще услышит словеса клятвы сея и похвалится в сердцы своем, глаголя: преподобно мне да будет, яко в прельщении сердца моего пойду, да не погубит грешник безгрешнаго (с собою): |
29:20 | не восхощет Бог милостив быти ему, но тогда разгорится гнев Господень и ревность Его на человека того: и прилепятся ему вся клятвы завета сего, писанныя в книзе закона сего: и потребит Господь имя его от поднебесныя, |
29:21 | и отлучит его Господь на злая от всех сынов Израилевых, по всем клятвам завета написаннаго в книзе закона сего. |
29:22 | И речет род ин, сынове ваши, иже востанут по вас, и чуждый иже приидет от земли далекия, и узрят язвы земли оныя и недуги ея, яже посла Господь на ню, |
29:23 См.: 🔗Быт. 19:25 | жупел и соль сожженную: вся земля ея не насеется, ни прозябнет, ниже возникнет на ней всяк злак: якоже опровержеся Содом и Гоморр, Адама и Севоим, яже опроверже Господь в ярости и гневе Своем. |
29:24 См.: 🔗3Цар. 9:8 🔗Иер. 22:8 | И рекут вси языцы: почто сотвори Господь сице земли сей? Кая ярость гнева великая сия? |
29:25 | И рекут: яко оставиша завет Господа Бога отец своих, егоже завеща отцем их, егда изведе их от земли Египетския, |
29:26 См.: 🔗Нав. 24:20 | и шедше послужиша богом иным, и поклонишася им, ихже не ведяху, и не даде им ничтоже ни един: |
29:27 | и разгневася яростию Господь на землю ту, еже навести на ню по всем клятвам завета, писанным в книгах закона сего: |
29:28 | и изят их Господь от земли их яростию и гневом, и прогневанием великим зело, и изверже их в землю ину якоже ныне. |
29:29 См.: 🔗1Тим. 3:16 🔗Пс. 24:14 | Тайная Господеви Богу нашему, нам же явленная и чадом нашым во веки, творити вся словеса закона сего. |