Книга пророка Иезекииля, глава 36

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 36
36:1 См.: 🔗Иез. 6:2	И ты, сыне человечь, прорцы на горы Израилевы и рцы:
36:2 См.: 🔗Иез. 25:3 🔗Иез. 26:2 🔗Авд. 1:12	горы Израилевы, слышите слово Господне, сия глаголет Адонаи Господь: понеже рече враг на вы: благоже, пустыня вечная во одержание нам бысть:
36:3	того ради прорцы и рцы: тако глаголет Адонаи Господь: зане быти вам погубленым и безчестным и возненавиденым от язык окрестных вам, еже быти вам во одержание прочым языком, и взыдосте и бысте в поношение устен и во укоризну странам:
36:4	сего ради, горы Израилевы, слышите слово Господне, сия глаголет Адонаи Господь горам и холмом, и потоком и дебрем, и полянам и опустошеным, и разореным и градом оставленым, иже быша в пленение и в попрание оставшым языком окрестным.
36:5	Того ради сия глаголет Адонаи Господь: аще не во огни рвения Моего глаголах на прочыя языки и на Идумею всю, яко даша землю Мою себе во одержание со веселием (от всего сердца), обезчестивше душы, еже потребити повоеванием:
36:6 См.: 🔗Иез. 39:25 🔗Иоил. 2:18	того ради прорцы на землю Израилеву и рцы горам и холмом, и полянам и дебрем: сия глаголет Адонаи Господь: се, Аз во рвении Моем и в ярости Моей глаголах, за укоризну, юже приясте от язык.
36:7	Того ради сия глаголет Адонаи Господь: се, Аз воздвигну руку Мою на языки, иже окрест вас, тии безчестие свое приимут.
36:8 См.: 🔗Иер. 31:4	Ваше же гроздие и плод ваш, горы Израилевы, поядят людие Мои, яко надеются приити.
36:9 См.: 🔗Зах. 8:12 🔗Зах. 10:8	Яко се, Аз к вам, и призрю на вы, и возделаете и насеете:
36:10	и умножу в вас человеки, весь дом Израилев до конца, и населятся гради, и пустыни оградятся:
36:11 См.: 🔗Втор. 30:3	и умножу вас людьми и скотом, и умножатся и возрастут, и вселю вас якоже прежде, и благо сотворю вам якоже бывшым прежде вас, и уразумеете, яко Аз есмь Господь:
36:12	и нарожду в вас человеки люди Моя Израиля, и наследят вас, и будете им во одержание, и не приложите ктому безчадни быти от них.
36:13 См.: 🔗Лев. 26:38	Сия глаголет Адонаи Господь: понеже глаголаша тебе: земля поядающая человеки ты еси, и безчадная от языка твоего была еси:
36:14	того ради человеков ктому не пояси и языка твоего не обезчадиши ктому, глаголет Адонаи Господь.
36:15 См.: 🔗Ис. 25:8	И не услышится в вас ктому безчестие языков, и укоризны людий не приимете ктому, и язык твой не будет без чад ктому, глаголет Адонаи Господь.
36:16	И бысть слово Господне ко мне глаголя:
36:17 См.: 🔗Ис. 64:6	сыне человечь, дом Израилев вселися на земли своей, и оскверниша ю путем своим и кумирми своими и нечистотами своими, и по нечистоте месячная имущия бысть путь их пред лицем Моим:
36:18	и излиях ярость Мою на ня, крови ради, юже пролияша на землю, и кумирми своими оскверниша ю,
36:19 См.: 🔗Иез. 20:23 🔗Иез. 22:15	и разсыпах я во языки и развеях я во страны: по пути их и по начинанию их судих им.
36:20 См.: 🔗Ис. 52:5 🔗Рим. 2:24	И внидоша во языки, в няже внидоша тамо, и оскверниша имя Мое святое, внегда глаголатися им: людие Господни сии и от земли своея изыдоша.
36:21 См.: 🔗Чис. 14:15	И пощадих я имене ради Моего святаго еже оскверниша дом Израилев во языцех, аможе внидоша.
36:22 См.: 🔗Втор. 9:6 🔗Иез. 36:32	Того ради рцы дому Израилеву: сия глаголет Адонаи Господь: не вам Аз творю, доме Израилев, но имене Моего ради святаго, еже осквернисте во языцех, тамо аможе внидосте.
36:23 См.: 🔗Мф. 6:9 🔗Рим. 2:24 🔗Иез. 39:27	И освящу имя Мое великое, оскверненное во языцех, еже осквернисте среде их, и уразумеют языцы, яко Аз есмь Господь, глаголет Адонаи Господь, внегда освящуся в вас пред очима их.
36:24	И возму вы от язык и соберу вы от всех земель, и введу вы в землю вашу,
36:25 См.: 🔗Ис. 44:3 🔗Зах. 13:1	и воскроплю на вы воду чисту, и очиститеся от всех нечистот ваших и от всех кумиров ваших, и очищу вас.
36:26 См.: 🔗Иер. 32:39 🔗Иез. 11:19 🔗Иоил. 2:28 🔗Деян. 2:17	И дам вам сердце ново и дух нов дам вам, и отиму сердце каменное от плоти вашея и дам вам сердце плотяно, и дух Мой дам в вас:
36:27 См.: 🔗Ис. 59:21	и сотворю, да в заповедех Моих ходите, и суды Моя сохраните и сотворите я.
36:28 См.: 🔗Иез. 11:20 🔗Иез. 37:23	И вселитеся на земли, юже дах отцем вашым, и будете Ми в люди, Аз же буду вам в Бога.
36:29 См.: 🔗Пс. 31:2 🔗Ос. 2:21 🔗Зах. 9:17	И спасу вы от всех нечистот ваших (и очищу вы от грех ваших всех), и призову пшеницу и умножу ю, и не дам на вы глада:
36:30	и распложу плод древесный и плоды селныя, яко да не приимете ктому гладныя укоризны во языцех.
36:31 См.: 🔗Иез. 6:9 🔗Иез. 16:61	И помянете пути своя злыя и начинания ваша не благая, и вознегодуете пред лицем их о беззакониих ваших и о мерзостех ваших.
36:32 См.: 🔗Иез. 36:22	Не вас ради Аз творю, доме Израилев, глаголет Адонаи Господь, вестно да будет вам, (доме Израилев:) постыдитеся и усрамитеся от путий ваших, доме Израилев.
36:33	Сия глаголет Адонаи Господь: во оньже день очищу вы от всех беззаконий ваших и населю грады, и соградятся пустыни,
36:34	и земля погибшая возделается вместо того, яко погублена бысть пред очима всякаго мимоходящаго:
36:35 См.: 🔗Ис. 51:3	и рекут: земля оная погибшая бысть яко вертоград Сладости, и гради опустевшии и разореннии и раскопаннии, забралы утвержденни сташа:
36:36 См.: 🔗Иез. 17:24	и уразумеют языцы, елицы останутся окрест вас, яко Аз Господь возградих разоренныя и насадих погубленныя: Аз Господь глаголах и сотворю.
36:37	Сия глаголет Адонаи Господь: се, еще обрящуся дому Израилеву, еже сотворити им: умножу их яко овцы, человеки яко овцы святыя,
36:38 См.: 🔗Мих. 2:12	яко овцы Иерусалимли во праздниках его, тако будут гради опустевшии полни стад человеческих: и уразумеют, яко Аз Господь.