Псалтирь, псалом 103

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Псаломъ 103
103:1 См.: 🔗Пс. 102:1	Благослови, душе моя, Господа. Господи Боже мой, возвеличился еси зело: во исповедание и в велелепоту облеклся еси:
103:2 См.: 🔗Быт. 1:3	одеяйся светом яко ризою, простираяй небо яко кожу:
103:3 См.: 🔗Быт. 1:7	покрываяй водами превыспренняя Своя, полагаяй облаки на восхождение Свое, ходяй на крилу ветреню:
103:4 См.: 🔗Евр. 1:7	творяй ангелы Своя духи, и слуги Своя пламень огненный:
103:5	основаяй землю на тверди ея: не преклонится в век века.
103:6	Бездна яко риза одеяние ея, на горах станут воды:
103:7 См.: 🔗Иов. 37:5	от запрещения Твоего побегнут, от гласа грома Твоего убоятся.
103:8	Восходят горы, и низходят поля, в место еже основал еси им.
103:9 См.: 🔗Иов. 38:10	Предел положил еси, егоже не прейдут, ниже обратятся покрыти землю.
103:10 См.: 🔗Пс. 73:15 🔗Втор. 11:11 🔗Иов. 5:10	Посылаяй источники в дебрех, посреде гор пройдут воды.
103:11	Напаяют вся звери селныя, ждут онагри в жажду свою.
103:12	На тых птицы небесныя привитают: от среды камения дадят глас.
103:13	Напаяяй горы от превыспренних Своих: от плода дел Твоих насытится земля.
103:14 См.: 🔗Пс. 146:8	Прозябаяй траву скотом, и злак на службу человеком, извести хлеб от земли:
103:15 См.: 🔗Суд. 9:13 🔗Сир. 40:20	и вино веселит сердце человека, умастити лице елеем: и хлеб сердце человека укрепит.
103:16	Насытятся древа польская, кедри Ливанстии, ихже еси насадил:
103:17	тамо птицы вогнездятся, еродиево жилище предводителствует ими.
103:18	Горы высокия еленем, камень прибежище заяцем.
103:19	Сотворил есть луну во времена: солнце позна запад свой.
103:20 См.: 🔗Быт. 1:16	Положил еси тму, и бысть нощь, в нейже пройдут вси зверие дубравнии,
103:21 См.: 🔗Пс. 146:9 🔗Ис. 31:4	скимни рыкающии восхитити и взыскати от Бога пищу себе.
103:22 См.: 🔗Иов. 37:8	Возсия солнце, и собрашася, и в ложах своих лягут.
103:23	Изыдет человек на дело свое и на делание свое до вечера.
103:24 См.: 🔗Пс. 32:5 🔗Пс. 91:6	Яко возвеличишася дела Твоя, Господи: вся премудростию сотворил еси: исполнися земля твари Твоея.
103:25 См.: 🔗Сир. 43:27	Сие море великое и пространное: тамо гади, ихже несть числа, животная малая с великими:
103:26 См.: 🔗Иов. 40:20	тамо корабли преплавают, змий сей, егоже создал еси ругатися ему.
103:27 См.: 🔗Пс. 144:15	Вся к Тебе чают, дати пищу им во благо время.
103:28 См.: 🔗Прит. 6:8	Давшу Тебе им, соберут: отверзшу Тебе руку, всяческая исполнятся благости:
103:29 См.: 🔗Иов. 12:10 🔗Дан. 5:23	отвращшу же Тебе лице, возмятутся: отимеши дух их, и изчезнут и в персть свою возвратятся:
103:30 См.: 🔗Иов. 33:4	послеши духа Твоего, и созиждутся, и обновиши лице земли.
103:31	Буди слава Господня во веки: возвеселится Господь о делех Своих:
103:32 См.: 🔗Пс. 143:5	призираяй на землю и творяй ю трястися: прикасаяйся горам, и дымятся.
103:33 См.: 🔗Пс. 33:2	Воспою Господеви в животе моем, пою Богу моему, дондеже есмь:
103:34	да усладится Ему беседа моя, аз же возвеселюся о Господе.
103:35 См.: 🔗Пс. 102:1	Да изчезнут грешницы от земли, и беззаконницы, якоже не быти им. Благослови, душе моя, Господа.