Книга Исход, глава 14

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 14
14:1	И рече Господь к Моисею глаголя:
14:2 См.: 🔗Чис. 33:7 🔗Иер. 44:1	рцы сыном Израилевым, и обратившеся да ополчатся прямо придворию, между Магдолом и между Морем, прямо Веельсепфону: пред ними ополчишися при мори:
14:3	и речет фараон людем своим о сынех Израилевых: заблуждают сии по земли, затвори бо их пустыня:
14:4 См.: 🔗Исх. 4:21 🔗Исх. 10:20 🔗Иез. 28:22 🔗Рим. 9:17	Аз же ожесточу сердце фараоново, и поженет созади их, и прославлюся в фараоне и во всем воинстве его: и уразумеют вси Египтяне, яко Аз есмь Господь. И сотвориша тако.
14:5	И возвещено бысть царю Египетскому, яко бежаша людие, и превратися сердце фараоново и рабов его на люди, и рекоша: что сие сотворихом, отпустивше сыны Израилевы, да не работают нам?
14:6	Впряже убо фараон колесницы своя, и вся люди своя собра с собою:
14:7	и поят шесть сот колесниц избранных, и вся кони Египетския, и тристаты над всеми.
14:8 См.: 🔗Прем. 19:3 🔗Исх. 13:3	И ожесточи Господь сердце фараона царя Египетскаго и рабов его, и погна созади сынов Израилевых. Сынове же Израилевы исхождаху рукою высокою.
14:9 См.: 🔗Нав. 24:6 🔗1Мак. 4:9	И погнаша Египтяне вслед их, и обретоша их ополчившихся при мори: и вся кони и колесницы фараоновы, и конницы, и воинство его прямо придворию, противу Веельсепфона.
14:10	И фараон приближашеся. Воззревше же сынове Израилевы очима, видеша: и се, Египтяне ополчишася вслед их: и убояшася зело, и возопиша сынове Израилевы ко Господу
14:11 См.: 🔗Пс. 105:7	и рекоша к Моисею: за еже не быти гробом во Египте, извел еси нас умертвити в пустыни: что сие сотворил еси нам, извед нас из Египта?
14:12	Не сей ли бяше глагол, егоже рекохом к тебе во Египте, глаголюще: остави нас, да работаем Египтяном: лучше бо бяше нам работати Египтяном, нежели умрети в пустыни сей.
14:13 См.: 🔗2Пар. 20:17	Рече же Моисей к людем: дерзайте, стойте и зрите спасение еже от Господа, еже сотворит нам днесь: имже бо образом видесте Египтян днесь, не приложите ктому видети их в вечное время:
14:14 См.: 🔗Втор. 1:30 🔗Втор. 3:22 🔗Суд. 5:20	Господь поборет по вас, вы же умолкните.
14:15 См.: 🔗Нав. 24:7	И рече Господь к Моисею: что вопиеши ко Мне? Рцы сыном Израилевым, и да путешествуют,
14:16	ты же возми жезл твой и простри руку твою на море, и расторгни е: и да внидут сынове Израилевы посреде моря по суху:
14:17	и се, Аз ожесточу сердце фараоново и всех Египтян, и внидут вслед их: и прославлюся в фараоне и во всем воинстве его, и в колесницах и в конех его,
14:18	и уведят вси Египтяне, яко Аз есмь Господь, егда прославляюся в фараоне и в колесницах и в конех его.
14:19 См.: 🔗Исх. 13:21	Взятся же Ангел Божий ходяй пред полком сынов Израилевых и пойде созади их, взятся же и столп облачный от лица их и ста созади их.
14:20	И вниде посреде полка Египетска и посреде полка сынов Израилевых и ста: и бысть тма и мрак, и прииде нощь, и не смесишася друг с другом во всю нощь.
14:21 См.: 🔗Пс. 77:13 🔗Пс. 105:9 🔗Пс. 113:3 🔗Нав. 4:23	Простре же Моисей руку на море, и возгна Господь море ветром южным сильным всю нощь, и сотвори море сушу, и разступися вода.
14:22 См.: 🔗1Кор. 10:1 🔗Евр. 11:29 🔗Иудиф. 5:13	И внидоша сынове Израилевы посреде моря по суху, и вода им стена бысть одесную и стена ошуюю.
14:23	Погнаша же Египтяне и внидоша вслед их, и всяк конь фараонов, и колесницы, и всадники посреде моря.
14:24 См.: 🔗Пс. 77:14	Бысть же в стражу утреннюю, и воззре Господь на полк Египетский в столпе огненнем и облачнем, и смяте полк Египетский,
14:25 См.: 🔗Втор. 3:22	и связа оси колесниц их, и ведяше их с нуждею. И рекоша Египтяне: бежим от лица Израилева, Господь бо поборает по них на Египтяны.
14:26	И рече Господь к Моисею: простри руку твою на море, и да совокупится вода и да покрыет Египтяны, колесницы же и всадники.
14:27 См.: 🔗Прем. 18:5 🔗Прем. 19:5 🔗Исх. 15:7	Простре же Моисей руку на море, и устроися вода ко дню на место: Египтяне же бежаша под водою, и истрясе Господь Египтяны посреде моря:
14:28 См.: 🔗Пс. 105:11 🔗Пс. 135:15	и обратившися вода покры колесницы и всадники и всю силу фараонову, вшедши вслед их в море: и не оста от них ни един.
14:29	Сынове же Израилевы проидоша по суху посреде моря: вода же им стена (бысть) одесную и стена ошуюю,
14:30	и избави Господь Израиля в день он из руки Египетския: и видеша сынове Израилевы Египтян измерших при краи моря.
14:31 См.: 🔗Пс. 105:12 🔗Пс. 108:27 🔗2Пар. 20:20	Виде же Израиль руку великую, яже сотвори Господь Египтяном, и убояшася людие Господа и вероваша Богу и Моисею угоднику Его.