Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 7 | |
7:1 | И по сем видех четыри Ангелы стоящыя на четырех углех земли, держащыя четыри ветры земския, да не дышет ветр на землю, ни на море, ни на всяко древо. |
7:2 | И видех инаго Ангела восходяща от восхода солнца, имуща печать Бога живаго. И возопи гласом велиим к четырем Ангелом, имже дано бысть вредити землю и море, глаголя: |
7:3 См.: 🔗Иез. 9:4 🔗Отк. 14:1 | не вредите ни земли, ни моря, ни древес, дондеже запечатлеем рабы Бога нашего на челех их. |
7:4 | И слышах число запечатленных: сто четыредесять четыри тысящи запечатленных от всякаго колена сынов Израилевых. |
7:5 | От колена Иудова дванадесять тысящ запечатленных: от колена Рувимова дванадесять тысящ запечатленных: от колена Гадова дванадесять тысящ запечатленных: |
7:6 | от колена Асирова дванадесять тысящ запечатленных: от колена Неффалимля дванадесять тысящ запечатленных: от колена Манассиина дванадесять тысящ запечатленных: |
7:7 | от колена Симеонова дванадесять тысящ запечатленных: от колена Левиина дванадесять тысящ запечатленных: от колена Иссахарова дванадесять тысящ запечатленных: |
7:8 | от колена Завулоня дванадесять тысящ запечатленных: от колена Иосифова дванадесять тысящ запечатленных: от колена Вениаминова дванадесять тысящ запечатленных. |
7:9 См.: 🔗Отк. 3:5 🔗Отк. 6:11 | По сих видех, и се, народ мног, егоже изчести никтоже может, от всякаго языка и колена, и людий и племен, стояще пред престолом и пред Агнцем, облечены в ризы белы, и финицы в руках их. |
7:10 | И возопиша гласом велиим, глаголюще: спасение седящему на престоле Богу нашему и Агнцу. |
7:11 | И вси Ангели стояху окрест престола и старец и четырех животных: и падоша на лицы пред престолом и поклонишася Богу, |
7:12 | глаголюще: аминь: благословение и слава, и премудрость и хвала, и честь и сила и крепость Богу нашему во веки веков. Аминь. |
7:13 | И отвеща един от старец, глаголя ми: сии облеченнии в ризы белыя кто суть и откуду приидоша? |
7:14 См.: 🔗Ис. 1:18 🔗Евр. 9:14 | И рех ему: господи, ты веси. И рече ми: сии суть, иже приидоша от скорби великия, и испраша ризы своя, и убелиша ризы своя в Крови Агнчи: |
7:15 См.: 🔗Ис. 4:2 🔗Отк. 21:3 | сего ради суть пред престолом Божиим и служат Ему день и нощь в церкви Его, и Седяй на престоле вселится в них: |
7:16 См.: 🔗Пс. 120:6 🔗Ис. 49:10 | не взалчут ктому, ниже вжаждут, не имать же пасти на них солнце, ниже всяк зной: |
7:17 | яко Агнец, Иже посреде престола, упасет я и наставит их на животныя источники вод, и отимет Бог всяку слезу от очию их. |