Книга пророка Иеремии, глава 28

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 28
28:1 См.: 🔗Нав. 21:17	И бысть в четвертое лето, царствующу Седекии царю Иудину, в пятый месяц, рече ми Ананиа сын Азоров лживый пророк Гаваонитский в дому Господни, пред очима жерцев и всех людий, глаголя:
28:2 См.: 🔗Иер. 27:12	тако рече Господь Вседержитель Бог Израилев: сокруших ярем царя Вавилонска:
28:3 См.: 🔗Иер. 27:16	еще два лета дний, возвращу Аз на место сие вся сосуды дому Господня, яже взя Навуходоносор царь Вавилонский от места сего и пренесе я до Вавилона,
28:4	и Иехонию сына Иоакимова царя Иудина, и все преселение Иудино вшедшее в Вавилон возвращу в место сие, глаголет Господь, яко сокрушу ярем царя Вавилонска.
28:5	И рече Иеремиа пророк ко Анании лжепророку пред очима жерцев и пред очима всех людий стоящих в дому Господни,
28:6	и рече Иеремиа: поистинне тако да сотворит Господь, да утвердит Господь слово твое, еже ты прорицаеши, еже возвратити сосуды дому Господня и вся преселенныя из Вавилона на место сие:
28:7	обаче слышите слово сие, еже аз глаголю во ушы ваши и во ушы всех людий:
28:8	пророцы, бывшии прежде мене и прежде вас от века, прорекоша на многи земли и на царства велика о рати и о погублении и о гладе:
28:9 См.: 🔗Втор. 18:22	пророк прорекий мир, пришедшу слову познают пророка, егоже посла им Господь в вере.
28:10	И взя Ананиа пред очима всех людий клады от выи Иеремиины и сокруши я.
28:11	И рече Ананиа пред очима всех людий глаголя: сице рече Господь: тако сокрушу ярем Навуходоносора царя Вавилонска еще два лета дний со выи всех языков. И отиде Иеремиа на путь свой.
28:12	И бысть слово Господне ко Иеремии, по сокрушении Ананиине клад со выи его, глаголя:
28:13	иди и рцы ко Анании глаголя: тако рече Господь: клады древяныя сокрушил еси и сотвориши вместо тех клады железны,
28:14 См.: 🔗Иер. 27:6	яко тако рече Господь: ярем железен возложих на выи всех языков, служити Навуходоносору царю Вавилонску, и послужат ему: ктому и звери земныя дах ему.
28:15	И рече Иеремиа пророк ко Анании: слыши, Анание: не посла тебе Господь, ты же сотворил еси людий сих уповати на неправду.
28:16 См.: 🔗Втор. 13:5	Того ради сице рече Господь: се, Аз отпущу тя от лица земли, в сем лете умреши, яко на Господа (Бога) глаголал еси.
28:17	И умре Ананиа лжепророк в сем лете месяца седмаго.