Первая книга Паралипоменон (Первая книга Хроник, Первая Летопись), глава 21

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 21
21:1 См.: 🔗2Цар. 24:1	Воста же диавол на Израиля и подусти Давида, да сочислит Израиля.
21:2	И рече царь Давид ко Иоаву и к началником силы: идите и сочтите Израиля от Вирсавеи даже до Дана, и принесите ко мне, да познаю число их.
21:3	И рече Иоав: да приложит Господь к людем Своим, якоже сии сторицею, и очи господина моего царя да видят: не вси ли господину моему царю раби суть? И почто хощет сего господин мой? Дабы не вменилося в грех Израилю.
21:4 См.: 🔗2Цар. 24:4	Но слово царево преможе Иоава: и пойде Иоав, и обыде всего Израиля, и прииде во Иерусалим.
21:5	И даде Иоав Давиду число сочтения людий: и обретеся всего Израиля тысяща тысящ и сто тысящ мужей и носящих оружия: и от сынов Иудиных четыре ста и седмьдесят тысящ мужей носящих оружие:
21:6	Левии же и Вениамина не сочте среде их, понеже вознегодова о словеси цареве Иоав.
21:7 См.: 🔗1Пар. 27:24	И не угодно явися пред Богом повеление сие, и порази Израиля.
21:8 См.: 🔗2Цар. 24:10	Рече же Давид ко Богу: согреших зело, яко сотворих вещь сию: и ныне молю, отими беззаконие раба Твоего, яко обезумихся зело.
21:9 См.: 🔗2Цар. 24:11 🔗1Цар. 9:9	И рече Господь ко Гаду пророку Давидову, глаголя:
21:10	иди и рцы к Давиду, глаголя: тако глаголет Господь: трие Аз наведу на тя, избери себе едино от них, и сотворю тебе.
21:11 См.: 🔗2Цар. 24:13	И прииде Гад к Давиду и рече ему:
21:12	сице глаголет Господь: избери себе, (еже хощеши,) или три лета глада, или три месяцы бегати тебе от лица враг твоих, и оружие враг твоих постигнет тя, или три дни мечь Господень, и смерть на землю, и Ангел Господень убиваяй во всем наследии Израилеве: ныне убо разсмотри, что отвещаю Пославшему мя со словом.
21:13 См.: 🔗2Цар. 24:14 🔗Плч. 3:22 🔗Сир. 2:18	И рече Давид ко Гаду: тесна ми суть три сия зело: но лучше ми есть впасти в руце Господни, зане многи щедроты Его зело, в руки же человеческия да не впаду.
21:14	И посла Господь смерть во Израиля, и падоша от Израиля седмьдесят тысящ мужей.
21:15 См.: 🔗2Цар. 24:16	И посла Бог Ангела во Иерусалим, да избиет его. И егда избиваше, виде Господь и раскаяся о зле, и рече Ангелу избивающему: довлеет ти, отими руку твою. Ангел же Господень стояше на гумне Орны Иевусеанина.
21:16	И возведе Давид очи своя, и виде Ангела Господня стояща между землею и небом, и мечь его извлечен в руку его, простерт на Иерусалим. И паде Давид и старейшины (Израилевы) облеченнии во вретище на лице свое,
21:17 См.: 🔗2Цар. 24:17	и рече Давид к Богу: не аз ли повелех сочислити люди? Аз есмь, иже согреших, и зло творя зло сотворих, сия же овцы что сотвориша? Господи Боже мой, да будет рука Твоя на мне и на дому отца моего, а не на людех Твоих в погубление, Господи.
21:18 См.: 🔗2Цар. 24:18 🔗2Пар. 3:1	Ангел же Господень рече Гаду, еже глаголати к Давиду: да взыдет и созиждет олтарь Господу Богу на гумне Орны Иевусеанина.
21:19	И взыде Давид по словеси Гадову, еже глагола именем Господним.
21:20	И обратися Орна и виде царя, и четыри сынове его с ним крыющиися. Орна же бе (в то время) млатя на гумне пшеницу.
21:21 См.: 🔗2Цар. 14:4	И прииде Давид ко Орне, и обратися Орна, и узре Давида, и пойде от гумна, и поклонися Давиду лицем на землю.
21:22	Рече же Орне Давид: даждь мне место гумна твоего, да созижду на нем олтарь Господеви, на сребре достойне даждь ми е, и престанет язва от людий.
21:23	Рече же Орна к Давиду: возми себе, и да сотворит господин мой царь, еже угодно пред ним: се, даю телцы на всесожжение, и плуг на дрова, и пшеницу в жертву, вся (добровольно) даю.
21:24	И рече царь Давид Орне: ни, но куплею куплю, сребром достойным, понеже не возму Господеви, яже суть твоя, еже вознести всесожжение туне Господеви.
21:25	И даде Давид Орне за место то сикль златых весом шесть сот.
21:26 См.: 🔗2Цар. 24:25 🔗Лев. 9:24 🔗3Цар. 18:38	И созда ту Давид олтарь Господеви, и вознесе всесожжения и спасителная и воззва ко Господу, и услыша его во огни от небесе на олтарь всесожжения, и потреби всесожжение.
21:27	И рече Господь ко Ангелу: и вложи мечь во влагалище его.
21:28	Во время оно, егда виде Давид, яко услыша его Господь на гумне Орны Иевусеанина, и пожре ту жертвы.
21:29 См.: 🔗2Цар. 6:17 🔗2Пар. 1:3	И скиния Господня, юже сотвори Моисей в пустыни, и олтарь всесожжения во время оно бысть в вышнем, еже в Гаваоне.
21:30	И не возможе Давид ити пред него, еже вопросити Бога, понеже устрашен бысть от лица меча Ангела Господня.