Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 11 | |
11:1 | О, да бысте мало потерпели безумию моему! Но и потерпите мя. |
11:2 | Ревную бо по вас Божиею ревностию: обручих бо вас единому мужу деву чисту представити Христови. |
11:3 | Боюся же, да не како, якоже змий Еву прельсти лукавством своим, тако истлеют и разумы ваши от простоты, яже о Христе. |
11:4 | Аще бо грядый инаго Иисуса проповедает, егоже не проповедахом, или Духа инаго приемлете, егоже не приясте, или благовествование ино, еже не приясте, добре бысте потерпели. |
11:5 См.: 🔗1Кор. 15:10 | Непщую бо ничимже лишитися предних Апостол: |
11:6 См.: 🔗1Кор. 2:1 🔗2Кор. 10:10 | аще бо и невежда словом, но не разумом: но везде явльшеся о всем в вас. |
11:7 | Или грех сотворих себе смиряя, да вы вознесетеся, яко туне Божие Благовествование благовестих вам? |
11:8 См.: 🔗Деян. 20:33 🔗2Фес. 3:8 | От иных церквей уях, приим оброк к вашему служению: и пришед к вам, и в скудости быв, не стужих ни единому: |
11:9 | скудость бо мою исполниша братия, пришедше от Македонии: и во всем без стужения вам себе соблюдох и соблюду. |
11:10 См.: 🔗Рим. 9:1 | Есть истина Христова во мне, яко похваление сие не заградится о мне в странах Ахайских. |
11:11 | Почто? Зане не люблю ли вас? Бог весть. А еже творю, и сотворю, |
11:12 | да отсеку вину хотящым вины, да, о немже хвалятся, обрящутся якоже и мы. |
11:13 См.: 🔗Деян. 15:24 | Таковии бо лживи апостоли, делателе льстивии, преобразующеся во Апостолы Христовы. |
11:14 | И не дивно: сам бо сатана преобразуется во Ангела светла: |
11:15 См.: 🔗Мф. 7:15 | не велие убо, аще и служителие его преобразуются яко служители правды: имже кончина будет по делом их. |
11:16 | Паки глаголю: да никтоже мнит мя безумна быти: аще ли ни, поне яко безумна приимите мя, да и аз мало что похвалюся. |
11:17 | А еже глаголю, не глаголю по Господе, но яко в безумии в сей части похвалы: |
11:18 См.: 🔗Флп. 3:4 | понеже мнози хвалятся по плоти, и аз похвалюся. |
11:19 | Любезно бо приемлете безумныя, мудри суще: |
11:20 | приемлете бо, аще кто вас порабощает, аще кто поядает, аще кто не влепоту проторит, аще кто по лицу биет вы, аще кто величается. |
11:21 | По досаждению глаголю, зане аки мы изнемогохом. О немже аще дерзает кто, несмысленно глаголю, дерзаю и аз. |
11:22 См.: 🔗Деян. 22:3 🔗Флп. 3:5 | Еврее ли суть? И аз. Израилите ли суть? И аз. Семя Авраамле ли суть? И аз. |
11:23 | Служителие ли Христовы суть? Не в мудрости глаголю, паче аз. В трудех множае, в ранах преболе, в темницах излиха, в смертех многащи. |
11:24 См.: 🔗Втор. 25:3 | От Иудей пять краты четыредесять разве единыя приях: |
11:25 | трищи палицами биен бых, единою каменьми наметан бых, трикраты корабль опровержеся со мною: нощь и день во глубине сотворих: |
11:26 | в путных шествиих множицею: беды в реках, беды от разбойник, беды от сродник, беды от язык, беды во градех, беды в пустыни, беды в мори, беды во лжебратии: |
11:27 См.: 🔗1Кор. 4:11 | в труде и подвизе, во бдениих множицею, во алчбе и жажди, в пощениих многащи, в зиме и наготе. |
11:28 | Кроме внешних, нападение еже по вся дни, и попечение всех церквей. |
11:29 См.: 🔗1Кор. 9:22 | Кто изнемогает, и не изнемогаю? Кто соблазняется, и аз не разжизаюся? |
11:30 | Аще хвалитися ми подобает, о немощи моей похвалюся. |
11:31 См.: 🔗Рим. 9:1 🔗Гал. 1:20 | Бог и Отец Господа нашего Иисуса Христа весть, сый благословен во веки, яко не лгу. |
11:32 См.: 🔗Деян. 9:24 | В Дамасце языческий князь Арефы царя стрежаше Дамаск град, яти мя хотя: и оконцем в кошнице свешен бых по стене, и избегох из руку его. |