Деяния святых Апостолов, глава 17

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 17
17:1	Прешедша же Амфиполь и Аполлонию, внидоста в Солунь, идеже бе сонмище Иудейское.
17:2	По обычаю же своему Павел вниде к ним и по субботы три стязашеся с ними от Писаний,
17:3 См.: 🔗Пс. 21:7 🔗Ис. 50:6 🔗Ис. 53:3 🔗Дан. 9:24 🔗Мф. 16:21 🔗Мк. 8:31 🔗Лк. 9:22	сказуя и предлагая им, яко Христу подобаше пострадати и воскреснути от мертвых, и яко Сей Иисус, Егоже аз проповедую вам, есть Христос.
17:4	И нецыи от них вероваша и приложишася к Павлу и Силе, от честивых Еллин множество много и от жен благородных не мало.
17:5	Возревновавше же непокоршиися Иудее и приемше крамолники некия мужы злыя, и собравше народ, молвяху по граду: нашедше же на дом Иассонов, искаху их извести к народу.
17:6 См.: 🔗Деян. 16:20	Не обретше же их, влечаху Иассона и некия от братий ко градоначалником, вопиюще, яко, иже развратиша вселенную, сии и зде приидоша,
17:7	ихже прият Иассон: и сии вси противно велением кесаревым творят, царя глаголюще иного быти, Иисуса.
17:8	Смятоша же народ и градоначалники слышащыя сия:
17:9	вземше же доволное от Иассона и от прочих, отпустиша их.
17:10	Братия же абие в нощи отслаша Павла и Силу в Берию: иже пришедша, идоста в собор Иудейский.
17:11 См.: 🔗Ис. 8:20 🔗Ис. 34:16 🔗Ин. 5:39 🔗1Пет. 1:10 🔗1Тим. 4:16	Сии же бяху благороднейши живущих в Солуни, иже прияша слово со всем усердием, по вся дни разсуждающе Писания, аще суть сия тако.
17:12	Мнози убо от них вероваша, и от Еллинских жен благообразных и мужей не мало.
17:13	И яко уведаша иже от Солуня Иудее, яко и в Берии проповедася от Павла слово Божие, приидоша и тамо движуще и смущающе народы.
17:14	Абие же тогда братия отпустиша Павла ити на поморие: остаста же Сила и Тимофей тамо.
17:15	Провождающии же Павла ведоша его даже до Афин, и приемше заповедь к Силе и Тимофею, да яко скорее приидут к нему, изыдоша.
17:16 См.: 🔗2Пет. 2:8	Во Афинех же ждущу их Павлу, раздражашеся дух его в нем зрящем идол полн сущь град.
17:17	Стязашеся же убо на сонмищи со Иудеи и с честивыми, и на торжищи по вся дни с приключающимися.
17:18	Нецыи же от епикур и от стоик философ стязахуся с ним: и нецыи глаголаху: что убо хощет суесловивый сей глаголати? Инии же: чуждих богов мнится проповедник быти: яко Иисуса и воскресение благовествоваше им.
17:19	Поемше же его, ведоша на ареопаг, глаголюще: можем ли разумети, что новое сие глаголемое тобою учение?
17:20	Странна бо некая влагаеши во ушеса наша: хощем убо разумети, что хотят сия быти?
17:21	Афинее же вси и приходящии страннии ни во чтоже ино упражняхуся, разве глаголати что или слышати новое.
17:22	Став же Павел посреде ареопага, рече: мужие Афинейстии, по всему зрю вы аки благочестивыя:
17:23	проходя бо и соглядая чествования ваша, обретох и капище, на немже бе написано: неведомому Богу. Егоже убо не ведуще (благолепне) чтете, Сего аз проповедую вам.
17:24 См.: 🔗Быт. 1:1 🔗Пс. 8:2 🔗Пс. 32:6 🔗Деян. 7:48	Бог сотворивый мир и вся, яже в нем, Сей небесе и земли Господь сый, не в рукотворенных храмех живет,
17:25 См.: 🔗Иов. 12:10 🔗Пс. 20:5 🔗Пс. 26:1 🔗Пс. 35:7 🔗Пс. 49:9 🔗Ис. 42:5	ни от рук человеческих угождения приемлет, требуя что, Сам дая всем живот и дыхание и вся:
17:26	сотворил же есть от единыя крове весь язык человечь, жити по всему лицу земному, уставив предучиненая времена и пределы селения их,
17:27	взыскати Господа, да поне осяжут Его и обрящут, яко не далече от единаго коегождо нас суща:
17:28	о Нем бо живем и движемся и есмы, якоже и нецыи от ваших книжник рекоша: Сего бо и род есмы.
17:29 См.: 🔗Ис. 40:18	Род убо суще Божий, не должни есмы непщевати подобно быти Божество злату, или сребру, или каменю художне начертану, и смышлению человечу:
17:30 См.: 🔗Рим. 13:12 🔗Еф. 1:9 🔗Еф. 3:5 🔗Кол. 1:26	лета убо неведения презирая Бог, ныне повелевает человеком всем всюду покаятися:
17:31 См.: 🔗Деян. 2:24 🔗Деян. 3:15 🔗Деян. 4:10 🔗Деян. 13:30 🔗Рим. 6:4 🔗Рим. 14:9	зане уставил есть день, в оньже хощет судити вселенней в правде, о Мужи, Егоже предустави, веру подая всем, воскресив Его от мертвых.
17:32	Слышавше же воскресение мертвых, овии убо ругахуся, овии же реша: да слышим тя паки о семе.
17:33	И тако Павел изыде от среды их.
17:34	Нецыи же мужие прилепившеся ему, вероваша: в нихже бе и Дионисий Ареопагитский, и жена именем Дамарь, и друзии с ними.