Книга Числа, глава 18

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 18
18:1	И рече Господь ко Аарону, глаголя: ты и сынове твои, и дом отца твоего с тобою, возмите грехи святых, ты же и сынове твои возмите грехи жречества вашего:
18:2	и братию твою, племя Левиино, сонм отца твоего приведи к себе, и да приложатся к тебе, и да служат тебе, и ты и сынове твои с тобою пред скиниею свидения,
18:3	и да блюдут стражбы твоя и стражбы скинии: токмо к сосудом святым и ко олтарю да не приступают, да не измрут и сии, и вы:
18:4	и приложатся к тебе и да блюдут стражбы скинии свидения по всем службам скинии, и иноплеменник да не приступит к тебе,
18:5	и соблюдете стражбы святых и стражбы олтаря, и не будет ктому гнева на сынех Израилевых:
18:6 См.: 🔗Нав. 13:14	и Аз взях братию вашу левиты от среды сынов Израилевых в дар данный Господу служити службы скинии свидения.
18:7 См.: 🔗Чис. 3:10 🔗Чис. 16:40	И ты и сынове твои с тобою сохраните жречество ваше по всему образу олтаря, и еже внутрь завесы, и да служите службы в дар жречества вашего: и иноплеменник приступаяй умрет.
18:8 См.: 🔗Лев. 6:16 🔗Чис. 31:41	И рече Господь ко Аарону: и се, Аз дах вам снабдение начатков моих от всех освященных Мне от сынов Израилевых: тебе дах я в честь, и сыном твоим по тебе законно вечно:
18:9 См.: 🔗Лев. 2:3 🔗Сир. 7:33	и сие да будет вам от освященных святых приношений, от всех даров их и от всех жертв их, и от всякаго преступления их и от всех грех их, елика отдают Мне, от всех святынь, тебе да будут и сыном твоим.
18:10 См.: 🔗Лев. 6:16 🔗Лев. 7:6	Во святем святых ядите я: всяк мужеский пол да яст я, ты и сынове твои: свята будут тебе.
18:11 См.: 🔗Сир. 7:33	И сие да будет вам от начатков даяний их, от всех возложений сынов Израилевых: тебе дах я, и сыном твоим и дщерем твоим с тобою, законно вечно: всяк чистый в дому твоем да яст я.
18:12 См.: 🔗Неем. 10:37	Всяк начаток елеа, и всяк начаток вина и пшеницы, начаток их, елика аще отдадят Господу, тебе дах я: первородная вся елика в земли их, елика аще принесут Господу, тебе да будут:
18:13	всяк чистый в дому твоем да яст я.
18:14 См.: 🔗Лев. 27:28	Всяко освященное в сынех Израилевых тебе да будет,
18:15 См.: 🔗Исх. 34:19	и всякое разверзающее всяка ложесна от всякия плоти, елика приносят Господу, от человека до скота, тебе да будут: но токмо искуплением искупятся первенцы человечестии, и первенцы скотов нечистых да искупятся:
18:16 См.: 🔗Исх. 30:13 🔗Лев. 27:25 🔗Чис. 3:47 🔗Иез. 45:12	и искуп его от единаго месяца, сценение пять сикль, по сиклю святому: двадесять медниц есть:
18:17 См.: 🔗Лев. 3:9 🔗Лев. 4:7	обаче первородная телцев и первородная овец и первородная коз да не искупятся: свята суть: и кровь их пролиеши у олтаря, и тук принесеши принос в воню благовония Господу.
18:18 См.: 🔗Исх. 29:22 🔗Лев. 7:34	И мяса тебе да будут, якоже и груди возложения: и по раму десному тебе да будут.
18:19 См.: 🔗Исх. 27:21	Всяко участие святых, елика аще отлучат сынове Израилтестии Господу, тебе дах и сыном твоим и дщерем твоим с тобою, законно вечно: завет соли вечныя есть пред Господем, тебе и семени твоему по тебе.
18:20 См.: 🔗Втор. 10:9 🔗Втор. 18:2 🔗Нав. 13:14 🔗Иез. 44:28	И рече Господь ко Аарону: в земли их да не наследиши наследия, и части да не будет тебе в них: яко Аз часть твоя и наследие твое посреде сынов Израилевых.
18:21 См.: 🔗Евр. 7:8	И сыном Левииным, се, дах всю десятину во Израили в жребий за службы их, елико служат тии служение в скинии свидения:
18:22	и да не приступают по сем сынове Израилтестии к скинии свидения прияти грех смертоносный:
18:23	и да служат левити сами службу скинии свидения, и тии возмут грехи их: законно вечно в роды их: и посреде сынов Израилевых да не наследят наследия:
18:24 См.: 🔗Лев. 27:30 🔗Неем. 12:47 🔗Втор. 10:9	яко десятины сынов Израилевых, елики аще отлучат Господу, участие дах левитом в жребий: сего ради рекох им: среди сынов Израилевых да не наследят жребия.
18:25	И рече Господь к Моисею, глаголя:
18:26 См.: 🔗Втор. 14:22	и левитом да глаголеши и речеши к ним: аще возмете десятину от сынов Израилевых, юже дах вам от них во жребий, и отделите вы от нея участие Господу, десятину от десятины ея,
18:27	и вменятся вам участия ваша яко пшеница от гумна и яко участие от точила:
18:28 См.: 🔗Лев. 22:19	тако отделите их и вы от всех участий Господних, от всех десятин ваших, елики аще возмете от сынов Израилевых, и дадите от них участие Господу, Аарону жерцу:
18:29	от всех даяний ваших отделите участие Господу, или от всех начатков освященное от него,
18:30	и речеши к ним: егда отделите начаток от него, и вменится левитом аки жито от гумна и яко участие от точила:
18:31 См.: 🔗Мф. 10:10 🔗1Кор. 9:13 🔗1Тим. 5:18	и ядите то во всяком месте вы и сынове ваши и домове ваши, яко мзда сия вам есть за службы вашя, яже в скинии свидения:
18:32	и не приимете за сие греха, яко аще отлучите начаток от него: и святынь сынов Израилевых не оскверните, да не умрете.