Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Псаломъ 77 | |
77:1 | Внемлите, людие мои, закону моему, приклоните ухо ваше во глаголы уст моих. |
77:2 См.: 🔗Пс. 48:5 🔗Мф. 13:35 | Отверзу в притчах уста моя, провещаю ганания исперва. |
77:3 См.: 🔗Пс. 43:2 | Елика слышахом и познахом я, и отцы наши поведаша нам: |
77:4 | не утаишася от чад их в род ин, возвещающе хвалы Господни, и силы Его и чудеса Его, яже сотвори. |
77:5 См.: 🔗Втор. 4:9 | И воздвиже свидение во Иакове, и закон положи во Израили, елика заповеда отцем нашым сказати я сыновом своим, |
77:6 | яко да познает род ин, сынове родящиися, и востанут и поведят я сыновом своим: |
77:7 | да положат на Бога упование свое, и не забудут дел Божиих, и заповеди Его взыщут: |
77:8 См.: 🔗Втор. 32:5 🔗Иез. 2:3 | да не будут якоже отцы их, род строптив и преогорчеваяй, род иже не исправи сердца своего и не увери с Богом духа своего. |
77:9 | Сынове Ефремли наляцающе и стреляюще луки возвратишася в день брани: |
77:10 См.: 🔗4Цар. 17:15 | не сохраниша завета Божия, и в законе Его не восхотеша ходити. |
77:11 | И забыша благодеяния Его и чудеса Его, яже показа им |
77:12 | пред отцы их, яже сотвори чудеса в земли Египетстей, на поли Танеосе: |
77:13 См.: 🔗Исх. 14:21 | разверзе море и проведе их: представи воды яко мех, |
77:14 См.: 🔗Исх. 13:21 🔗Пс. 104:39 | и настави я облаком во дни и всю нощь просвещением огня. |
77:15 | Разверзе камень в пустыни и напои я яко в бездне мнозе: |
77:16 | и изведе воду из камене и низведе яко реки воды. |
77:17 | И приложиша еще согрешати Ему, преогорчиша Вышняго в безводней: |
77:18 | и искусиша Бога в сердцах своих, воспросити брашна душам своим. |
77:19 | И клеветаша на Бога и реша: еда возможет Бог уготовати трапезу в пустыни? |
77:20 | Понеже порази камень, и потекоша воды, и потоцы наводнишася: еда и хлеб может дати? Или уготовати трапезу людем Своим? |
77:21 См.: 🔗Чис. 11:1 | Сего ради слыша Господь и презре, и огнь возгореся во Иакове, и гнев взыде на Израиля: |
77:22 | яко не вероваша Богови, ниже уповаша на спасение Его. |
77:23 | И заповеда облаком свыше, и двери небесе отверзе: |
77:24 | и одожди им манну ясти, и хлеб небесный даде им. |
77:25 | Хлеб ангельский яде человек: брашно посла им до сытости. |
77:26 | Воздвиже юг с небесе, и наведе силою Своею лива: |
77:27 | и одожди на ня яко прах плоти, и яко песок морский птицы пернаты. |
77:28 | И нападоша посреде стана их, окрест жилищ их. |
77:29 | И ядоша и насытишася зело, и желание их принесе им. |
77:30 См.: 🔗Чис. 11:33 | Не лишишася от желания своего: еще брашну сущу во устех их, |
77:31 | и гнев Божий взыде на ня, и уби множайшая их, и избранным Израилевым запят. |
77:32 См.: 🔗Втор. 1:32 | Во всех сих согрешиша еще и не вероваша чудесем Его: |
77:33 | и изчезоша в суете дние их, и лета их со тщанием. |
77:34 | Егда убиваше я, тогда взыскаху Его и обращахуся и утреневаху к Богу: |
77:35 | и помянуша, яко Бог помощник им есть, и Бог Вышний Избавитель им есть: |
77:36 | и возлюбиша Его усты своими, и языком своим солгаша Ему: |
77:37 | сердце же их не бе право с Ним, ниже уверишася в завете Его. |
77:38 | Той же есть щедр, и очистит грехи их, и не растлит: и умножит отвратити ярость Свою, и не разжжет всего гнева Своего. |
77:39 См.: 🔗Иак. 4:14 | И помяну, яко плоть суть, дух ходяй и не обращаяйся: |
77:40 См.: 🔗Чис. 14:22 | колькраты преогорчиша Его в пустыни, прогневаша Его в земли безводней? |
77:41 | И обратишася, и искусиша Бога, и Святаго Израилева раздражиша: |
77:42 | и не помянуша руки Его в день, в оньже избави я из руки оскорбляющаго: |
77:43 | якоже положи во Египте знамения Своя, и чудеса Своя на поли Танеосе: |
77:44 См.: 🔗Исх. 7:20 🔗Пс. 104:29 | и преложи в кровь реки их и источники их, яко да не пиют. |
77:45 См.: 🔗Исх. 8:24 🔗Пс. 104:31 | Посла на ня песия мухи, и поядоша я, и жабы, и растли я: |
77:46 См.: 🔗Исх. 10:13 | и даде рже плоды их, и труды их пругом. |
77:47 См.: 🔗Исх. 9:23 🔗Пс. 104:33 | Уби градом винограды их и черничие их сланою: |
77:48 | и предаде граду скоты их, и имение их огню. |
77:49 | Посла на ня гнев ярости Своея, ярость и гнев и скорбь, послание аггелы лютыми. |
77:50 См.: 🔗Исх. 9:6 | Путесотвори стезю гневу Своему, и не пощаде от смерти душ их, и скоты их в смерти заключи: |
77:51 См.: 🔗Исх. 12:29 | и порази всякое первородное в земли Египетстей, начаток всякаго труда их в селениих Хамовых. |
77:52 См.: 🔗Исх. 12:37 | И воздвиже яко овцы люди Своя, и возведе я яко стадо в пустыни: |
77:53 | и настави я на упование, и не убояшася: и враги их покры море. |
77:54 | И введе я в гору святыни Своея, гору сию, юже стяжа десница Его. |
77:55 См.: 🔗Нав. 12:7 | И изгна от лица их языки, и по жребию даде им (землю) ужем жребодаяния, и всели в селениих их колена Израилева. |
77:56 | И искусиша и преогорчиша Бога Вышняго, и свидений Его не сохраниша: |
77:57 | и отвратишася и отвергошася, якоже и отцы их: превратишася в лук развращен: |
77:58 См.: 🔗Втор. 32:16 | и прогневаша Его в холмех своих, и во истуканных своих раздражиша Его. |
77:59 | Слыша Бог и презре, и уничижи зело Израиля: |
77:60 См.: 🔗1Цар. 4:11 | и отрину скинию Силомскую, селение еже вселися в человецех: |
77:61 | и предаде в плен крепость их, и доброту их в руки врагов: |
77:62 | и затвори во оружии люди Своя и достояние Свое презре. |
77:63 | Юношы их пояде огнь, и девы их не осетованы быша: |
77:64 См.: 🔗1Цар. 4:11 | священницы их мечем падоша, и вдовицы их не оплаканы будут. |
77:65 | И воста яко спя Господь, яко силен и шумен от вина: |
77:66 См.: 🔗1Цар. 5:6 🔗1Цар. 6:4 | и порази враги своя вспять, поношение вечное даде им: |
77:67 | и отрину селение Иосифово, и колено Ефремово не избра: |
77:68 | и избра колено Иудово, гору Сионю, юже возлюби: |
77:69 | и созда яко единорога святилище Свое: на земли основа и в век. |
77:70 См.: 🔗1Цар. 16:11 🔗2Цар. 7:8 | И избра Давида раба Своего, и восприят его от стад овчих: |
77:71 См.: 🔗2Цар. 5:2 🔗1Пар. 11:2 | от доилиц поят его, пасти Иакова раба Своего, и Израиля достояние Свое. |
77:72 | И упасе я в незлобии сердца своего, и в разумех руку своею наставил я есть. |