Книга Премудрости Иисуса, сына Сирахова, глава 44 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 44
44:1	Восхвалим убо мужы славны и отцы нашя в бытии.
44:2	Многу славу созда Господь в них величием Своим от века.
44:3	Господствующе во царствиих своих и мужие именити силою, советующе разумом своим, провещавшии во пророчествах,
44:4	старейшины людий в советех и в разуме писания людий:
44:5	премудрая словеса в наказании их, ищуще гласа мусикийска и поведающе повести во писаниих:
44:6	мужие богатии, обдаровани крепостию, мирно живуще в жилищих своих.
44:7	Вси сии в родех прославлени быша, и во днех их похвала.
44:8	Суть от них, иже оставиша имя, еже поведати хвалы: и суть, ихже несть памяти, и погибоша яко не сущии, и быша яко не бывше, и чада их по них.
44:9	Но сии мужие милостивии, ихже правды не забвены быша:
44:10	с семенем их пребудет доброе наследие, изчадия их в заветех:
44:11 См.: 🔗Исх. 20:6	остася семя их, и чада их по них:
44:12	до века пребудет семя их, и слава их не потребится:
44:13 См.: 🔗Прит. 10:7	телеса их в мире погребена быша, а имена их живут в роды.
44:14	Премудрость их поведят людие, и похвалу их исповесть церковь.
44:15 См.: 🔗Быт. 5:24 🔗Прем. 4:10 🔗Евр. 11:5	Енох угоди Господеви и преложися, образ покаяния родом.
44:16 См.: 🔗Быт. 6:9 🔗Быт. 7:1 🔗Прем. 10:4 🔗Евр. 11:7	Ное обретеся совершен, праведен, во время гнева бысть примирение:
44:17	сего ради бысть останок земли, егда бяше потоп.
44:18 См.: 🔗Быт. 9:11	Заветы вечнии положени быша с ним, да не потребится потопом всяка плоть.
44:19 См.: 🔗Быт. 17:4	Авраам великий отец множеству языков, и не обретеся подобный во славе его:
44:20 См.: 🔗Быт. 17:10	иже соблюде закон Вышняго и бысть в завете с Ним:
44:21 См.: 🔗Быт. 22:16	и на плоти его устави завет и во искушении обретеся верен:
44:22 См.: 🔗Быт. 12:3 🔗Быт. 22:16	сего ради клятвою постави с ним благословитися языком о семени его,
44:23 См.: 🔗Быт. 13:16 🔗Пс. 71:8	умножити его яко персть земли, и яко звезды возвысити семя его, и наследити им от моря до моря и от реки до края земли.
44:24 См.: 🔗Быт. 26:3	И о Исааце утверди сице Авраама ради Отца его благословение всех человеков и завет:
44:25 См.: 🔗Быт. 27:28	и почи на главе Иаковли.
44:26 См.: 🔗Втор. 32:9	Позна его благословении Своими и даде его в наследие, и раздели части его на колен дванадесять,
44:27 См.: 🔗Исх. 2:10 🔗Исх. 11:3	и изведе от него мужа милости, обретшаго благодать пред очесы всякия плоти.