Деяния святых Апостолов, глава 10

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 10
10:1	Муж же некий бе в Кесарии, именем Корнилий, сотник от спиры нарицающияся Италийския,
10:2	благоговеин и бояйся Бога со всем домом своим, творяй милостыни многи людем и моляйся Богу всегда:
10:3	виде в видении яве, яко в час девятый дне, Ангела Божия сшедша к нему и рекша ему: Корнилие.
10:4	Он же воззрев нань и пристрашен быв рече: что есть, Господи? Рече же ему: молитвы твоя и милостыни твоя взыдоша на память пред Бога:
10:5	и ныне посли во Июппию мужей и призови Симона, нарицаемаго Петра:
10:6 См.: 🔗Деян. 9:43	сей странствует у некоего Симона усмаря, емуже есть дом при мори: той речет тебе глаголы, в нихже спасешися ты и весь дом твой.
10:7	И якоже отиде Ангел глаголяй Корнилию, пригласив два от рабов своих и воина благочестива от служащих ему
10:8	и сказав им вся, посла их во Июппию.
10:9	Воутрие же, путьшествующым им и ко граду приближающымся, взыде Петр на горницу помолитися, о часе шестем.
10:10	Бысть же приалчен и хотяше вкусити: готовящым же онем, нападе нань ужас,
10:11	и виде небо отверсто и сходящ нань сосуд некий, яко плащаницу велию, по четырем краем привязан и низу спущаемь на землю,
10:12 См.: 🔗Лев. 11:23 🔗Лев. 20:25	в немже бяху вся четвероногая земли и зверие и гади и птицы небесныя.
10:13	И бысть глас к нему: востав, Петре, заколи и яждь.
10:14	Петр же рече: никакоже, Господи, яко николиже ядох всяко скверно или нечисто.
10:15 См.: 🔗Мф. 15:11 🔗Рим. 14:14 🔗1Тим. 4:4 🔗Тит. 1:15	И (се) глас паки к нему вторицею: яже Бог очистил есть, ты не скверни.
10:16	Сие же бысть трищи: и паки взяся сосуд на небо.
10:17	Якоже в себе недоумевашеся Петр, что бы было видение, еже виде, и се, мужие посланнии от Корнилиа, вопрошше и уведевше дом Симонов, сташа пред враты
10:18	и возглашше вопрошаху, аще Симон, нарицаемый Петр, зде странствует.
10:19	Петру же размышляющу о видении, рече ему Дух: се, мужие трие ищут тебе:
10:20 См.: 🔗Деян. 15:7	но востав сниди и иди с ними, ничтоже разсуждая: зане Аз послах их.
10:21	Сошед же Петр к мужем посланным к нему от Корнилиа, рече: се, аз есмь, егоже ищете: кая есть вина, еяже ради приидосте?
10:22	Они же рекоша: Корнилий сотник, муж праведен и бояйся Бога, свидетелствован от всего языка Иудейска, увещен есть от Ангела свята призвати тя в дом свой и слышати глаголы от тебе.
10:23 См.: 🔗Деян. 11:12	Призвав же их учреди: наутрие же Петр востав иде с ними, и нецыи от братий, иже от Июппии, идоша с ним:
10:24	и наутрие внидоша в Кесарию. Корнилий же бе чая их, созвав сродники своя и любезныя други.
10:25	Якоже бысть внити Петру, срете его Корнилий, и пад на ногу его поклонися.
10:26 См.: 🔗Деян. 14:15 🔗Отк. 19:10 🔗Отк. 22:9	Петр же воздвиже его, глаголя: востани: и аз сам человек есмь.
10:27	И с ним беседуя, вниде и обрете собравшыяся многи:
10:28 См.: 🔗Мф. 9:11 🔗Ин. 4:9	рече же к ним: вы весте, яко не лепо есть мужу Иудеанину прилеплятися или приходити ко иноплеменнику: и мне Бог показа ни единаго скверна или нечиста глаголати человека:
10:29	темже и без сумнения приидох призван: вопрошаю вы убо, коея ради вины посласте по мене?
10:30	И Корнилий рече: от четвертаго дне даже до сего часа бех постяся и в девятый час моляся в дому моем: и се, муж ста предо мною во одежди светле
10:31	и рече: Корнилие, услышана бысть молитва твоя, и милостыни твоя помянушася пред Богом:
10:32	посли убо во Июппию и призови Симона, иже нарицается Петр: сей странствует в дому Симона усмаря близ моря: иже пришед возглаголет тебе.
10:33	Абие убо послах к тебе, ты же добре сотворил еси пришед: ныне убо вси мы пред Богом предстоим слышати вся повеленная тебе от Бога.
10:34 См.: 🔗Втор. 10:17 🔗2Пар. 19:7 🔗Иов. 34:19 🔗1Пет. 1:17 🔗Рим. 2:11 🔗Еф. 6:9	Отверз же Петр уста, рече: поистинне разумеваю, яко не на лица зрит Бог,
10:35	но во всяцем языце бояйся Его и делаяй правду приятен Ему есть:
10:36 См.: 🔗Еф. 2:17 🔗Флп. 2:11	слово, еже посла сыном Израилевым, благовествуя мир Иисус Христом: Сей есть всем Господь:
10:37 См.: 🔗Лк. 4:14	вы весте глагол бывший по всей Иудеи, наченшийся от Галилеи, по крещении, еже проповеда Иоанн:
10:38 См.: 🔗Пс. 44:8 🔗Лк. 4:18	Иисуса, Иже от Назарета, яко помаза Его Бог Духом Святым и силою, Иже пройде благодателствуя и исцеляя вся насилованныя от диавола, яко Бог бяше с Ним:
10:39 См.: 🔗Деян. 5:32 🔗Деян. 13:31	и мы есмы свидетеле всех, яже сотвори во стране Иудейстей и во Иерусалиме: Егоже и убиша, повешше на древе.
10:40 См.: 🔗Деян. 2:24	Сего Бог воскреси в третий день и даде Ему явлену быти,
10:41 См.: 🔗Мф. 28:7 🔗Лк. 24:30 🔗Деян. 13:31	не всем людем, но нам свидетелем преднареченным от Бога, иже с Ним ядохом и пихом, по воскресении Его от мертвых:
10:42	и повеле нам проповедати людем и засвидетелствовати, яко Той есть нареченный от Бога Судия живым и мертвым:
10:43 См.: 🔗Ис. 53:5 🔗Иер. 31:34 🔗Дан. 9:24 🔗Мих. 7:18 🔗Зах. 13:1 🔗Деян. 15:9	о Сем вси пророцы свидетелствуют, оставление грехов прияти именем Его всякому верующему в Онь.
10:44	Еще же глаголющу Петру глаголы сия, нападе Дух Святый на вся слышащыя слово.
10:45	И ужасошася иже от обрезания вернии, елицы приидоша с Петром, яко и на языки дар Святаго Духа излияся:
10:46 См.: 🔗Мк. 16:17	слышаху бо их глаголющих языки и величающих Бога. Тогда отвеща Петр:
10:47 См.: 🔗Деян. 15:8	еда воду возбранити может кто, еже не креститися сим, иже Дух Святый прияша, якоже и мы?
10:48	Повеле же им креститися во имя Иисус Христово. Тогда молиша его пребыти у них дни некия.