Вторая книга Паралипоменон (Вторая книга Хроник, Вторая Летопись), глава 3

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 3
3:1 См.: 🔗3Цар. 6:1 🔗1Пар. 21:18 🔗2Цар. 24:18	И нача Соломон созидати дом Господень во Иерусалиме, на горе Амориа, на месте, еже уготова Давид на гумне Орны Иевусеанина:
3:2	нача же созидати в месяц вторый лета четвертаго царства своего.
3:3 См.: 🔗3Цар. 6:2	И сице нача Соломон созидати дом Божий: в долготу лакот, размер первый, лакот шестьдесят, в широту же лакот двадесять:
3:4 См.: 🔗3Цар. 6:3	и притвор пред лицем дому, долгота по лицу широты дому, лакот двадесять, высота же лакот сто двадесять и позлати его внутрь златом чистым.
3:5 См.: 🔗3Цар. 6:15	Дом же великий окры дсками кедровыми и позлати златом чистым: извая же на нем подобия фиников и яко мрежицы промежь себе сплетающяся,
3:6 См.: 🔗3Цар. 9:28	и украси храм камением драгим славно, и позлати златом, еже от Фаруима .
3:7	И позлати дом и стены его, и врата и праги, и окна и двери златом, и извая херувимы на стенах.
3:8 См.: 🔗3Цар. 6:16	Сотвори же дом Святая Святых, долгота его по лицу широты дому, лакот двадесять, широта такожде двадесять лакот, и позлати и златом чистым на херувимех, талант шесть сот.
3:9	И вес гвоздий, вес гвоздя единаго пятьдесят сикль злата, и горницу позлати златом.
3:10 См.: 🔗Исх. 25:18 🔗3Цар. 6:23	И сотвори в дому Святая Святых Херувима два, дело от древ негниюших и позлати их златом.
3:11 См.: 🔗3Цар. 6:24	И криле херувимов, долгота двадесять лакот, и едино крило лакот пяти, прикасающееся стене дому,
3:12	и другое крило пяти лакот, прикасающееся крилу херувима другаго:
3:13 См.: 🔗Исх. 25:20	криле же херувимов сих распростерте на лакот двадесять, тии же стояху на нозех своих, лица же их (зряще) к дому.
3:14 См.: 🔗Исх. 26:1	Сотвори же завесу от синеты и багряницы, и червленицы и виссона, и сотка на ней херувимы.
3:15 См.: 🔗4Цар. 25:13 🔗Иер. 52:17	И сотвори пред храмом столпа два, лакот тридесять пять в высоту, и главы их пять лакот.
3:16 См.: 🔗3Цар. 7:17	И сотвори чепи в давире и положи на главах столпов, и шипков сотвори сто, ихже положи на мрежи.
3:17 См.: 🔗3Цар. 7:21	И постави столпы пред лицем храма, единаго одесную, а другаго ошуюю: и нарече имя сущему одесную Исправление, имя же сущему ошуюю Крепость.