Книга Иова, глава 38

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 38
38:1 См.: 🔗Исх. 19:18 🔗3Цар. 19:11 🔗Иез. 1:4	Преставшу же Елиусу от беседы, рече Господь Иову сквозе бурю и облаки:
38:2	кто сей скрываяй от Мене совет, содержай же глаголы в сердцы, Мене же ли мнится утаити?
38:3 См.: 🔗Иов. 40:2	Препояши яко муж чресла твоя: вопрошу же тя, ты же Ми отвещай.
38:4 См.: 🔗Быт. 1:1	Где был еси, егда основах землю? Возвести ми, аще веси разум.
38:5 См.: 🔗Прит. 30:4	Кто положи меры ея, аще веси? Или кто наведый вервь на ню?
38:6 См.: 🔗Иов. 26:7	На чемже столпи ея утверждени суть? Ктоже есть положивый камень краеуголный на ней?
38:7 См.: 🔗Дан. 7:10	Егда (сотворены) быша звезды, восхвалиша Мя гласом велиим вси Ангели Мои.
38:8 См.: 🔗Иов. 26:10	Заградих же море враты, егда изливашеся из чрева матере своея исходящее:
38:9	положих же ему облак во одеяние, мглою же пових е:
38:10 См.: 🔗Прит. 8:29 🔗Пс. 103:9	и положих ему пределы, обложив затворы и врата:
38:11	рех же ему: до сего дойдеши и не прейдеши, но в тебе сокрушатся волны твоя.
38:12	Или при тебе составих свет утренний, денница же весть чин свой,
38:13	ятися крил земли, оттрясти нечестивыя от нея?
38:14	Или ты, брение взем, от земли создал еси животно, и глаголиваго сего посадил еси на земли?
38:15 См.: 🔗Иов. 18:5 🔗Иез. 30:22	Отял же ли еси от нечестивых свет, мышцу же гордых сокрушил ли еси?
38:16 См.: 🔗Пс. 76:20	Пришел же ли еси на источники моря, во следах же бездны ходил ли еси?
38:17 См.: 🔗Иов. 10:21 🔗Ис. 14:9	Отверзаются же ли тебе страхом врата смертная, вратницы же адовы видевше тя убояшася ли?
38:18	Навыкл же ли еси широты поднебесныя? Повеждь убо ми, колика есть?
38:19	В коей же земли вселяется свет, тме же кое есть место?
38:20	Аще убо введеши мя в пределы их, аще же ли и веси стези их?
38:21 См.: 🔗Пс. 38:5	Вем убо, яко тогда рожден еси, число же лет твоих много.
38:22	Пришел же ли еси в сокровища снежная, и сокровища градная видел ли еси?
38:23 См.: 🔗Исх. 9:14 🔗Нав. 10:11	Подлежат же ли тебе в час врагов, в день браней и рати?
38:24	Откуду же исходит слана, или разсыпается юг на поднебесную?
38:25 См.: 🔗Пс. 134:7 🔗Иер. 10:13	Кто же уготова дождю велию пролияние, и путь молнии и грома,
38:26	одождити на землю, на нейже несть мужа, пустыню, идеже человека несть в ней,
38:27 См.: 🔗Пс. 106:35	насытити непроходиму и ненаселену, и прозябнути исход злака?
38:28 См.: 🔗Иов. 5:10 🔗Иов. 36:27 🔗Иер. 14:22	Кто есть дождю отец? Кто же есть родивый капли росныя?
38:29	Из чиего чрева исходит лед? Слану же на небеси кто родил,
38:30	яже нисходит яко вода текущая? Лице нечестива кто устраши?
38:31 См.: 🔗Иов. 9:9 🔗Ис. 13:10	Разумел же ли еси соуз Плиад, и ограждение Орионово отверзл ли еси?
38:32	Или отверзеши знамения небесная во время свое? И вечернюю звезду за власы ея привлечеши ли?
38:33 См.: 🔗Иер. 31:35	Веси же ли пременения небесная, или бывающая вкупе под небесем?
38:34	Призовеши же ли облак гласом? И трепетом воды великия послушает ли тя?
38:35	Послеши же ли молнии, и пойдут? Рекут же ли ти: что есть?
38:36 См.: 🔗Иов. 32:8	Кто же дал есть женам ткания мудрость, или испещрения хитрость?
38:37 См.: 🔗Иов. 26:8	Кто же изчисляяй облаки премудростию, небо же на землю преклонил,
38:38	разлияся же яко земля прах, спаях же е, аки каменем, на четыри углы?
38:39 См.: 🔗Пс. 103:21	Уловиши же ли львам ядь, и душы змиев насытиши ли?
38:40	Убояшася бо на ложах своих и седят в дебрех уловляюще.
38:41 См.: 🔗Пс. 146:9	Кто же врану уготова пищу? Птичищи бо его ко Господу воззваша, облетающе брашна ищуще.