Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 8 | |
8:1 | И бысть слово Господа Вседержителя (ко мне) глаголя: |
8:2 См.: 🔗Зах. 1:14 | сице глаголет Господь Вседержитель: ревновах по Иерусалиме и Сионе рвением великим и яростию велиею ревновах по нем. |
8:3 | Тако глаголет Господь: обращуся к Сиону и вселюся посреде Иерусалима, и наречется Иерусалим град истинный, и гора Господа Вседержителя гора святая. |
8:4 См.: 🔗Ис. 65:20 | Сице глаголет Господь Вседержитель: еще сядут старцы и старицы на путех Иерусалимских, кийждо жезл свой имый в руце своей от множества дний: |
8:5 | и путие града исполнятся отрочищ и отроковиц играющих на путех его. |
8:6 См.: 🔗Мф. 19:26 | Сице глаголет Господь Вседержитель: аще изнеможет пред останком людий сих во онех днех, еда и предо Мною изнеможет? Глаголет Господь Вседержитель. |
8:7 См.: 🔗Ис. 27:13 🔗Иер. 30:18 | Сице глаголет Господь Вседержитель: се, Аз спасу люди Моя от земли восточныя и от земли западныя |
8:8 См.: 🔗Ис. 51:16 🔗Отк. 21:7 | и введу их (в землю их), и вселюся посреде Иерусалима, и будут Ми в люди, и Аз буду им в Бога во истине и в правде. |
8:9 См.: 🔗1Езд. 5:2 🔗Ис. 35:5 | Сице глаголет Господь Вседержитель: да укрепятся руце вас слышащих во днех сих словеса сия от уст пророческих, от негоже дне основася храм Господа Вседержителя, и церковь отнележе создася. |
8:10 См.: 🔗Аг. 1:6 | Зане прежде дний онех мзда человеком не бе во успех, и мзда скотом не бяше, и исходящему и входящему не бе мира от печали, и послю вся человеки коегождо на искренняго своего. |
8:11 | И ныне не по днем онем прежним Аз сотворю останку людий сих, глаголет Господь Вседержитель, |
8:12 | но покажу мир: виноград даст плод свой, и земля даст жита своя, и небо даст росу свою, и наследити сотворю останком людий Моих сих вся сия. |
8:13 См.: 🔗Аг. 2:20 | И будет, яко бесте в клятве во языцех, доме Иудов и доме Израилев, тако спасу вы, и будете в благословении: дерзайте и укрепляйтеся руками вашими. |
8:14 | Зане сице глаголет Господь Вседержитель: якоже помыслих озлобити вы, внегда прогневаша Мя отцы ваши, глаголет Господь Вседержитель, и не раскаяхся: |
8:15 | тако уставих и умыслих во дни сия добро сотворити Иерусалиму и дому Иудову: дерзайте. |
8:16 | Сия словеса, яже сотворите: глаголите истину кийждо искреннему своему, истину и суд мирен судите во вратех ваших, |
8:17 См.: 🔗Зах. 7:10 | и кийждо злобы искренняго своего не помышляйте в сердцах ваших, и клятвы лживыя не любите, зане вся сия возненавидех, глаголет Господь Вседержитель. |
8:18 | И бысть слово Господа Вседержителя ко мне глаголя: |
8:19 См.: 🔗Зах. 7:5 | сице глаголет Господь Вседержитель: пост четвертый и пост пятый, и пост седмый и пост десятый будут дому Иудову в радость и в веселие и в праздники благи: и возвеселитеся и истину и мир возлюбите. |
8:20 | Сице глаголет Господь Вседержитель: еще людие мнози приидут и живущии во градех многих: |
8:21 | и снидутся живущии во пяти градех во един град, глаголюще: грядим помолитися лицу Господню и взыскати лице Господа Вседержителя: иду и аз. |
8:22 | И приидут людие мнози и языцы мнози взыскати лица Господа Вседержителя во Иерусалиме и умолити лице Господне. |
8:23 См.: 🔗Зах. 9:7 🔗Деян. 2:5 | Сице глаголет Господь Вседержитель: во оны дни имется десять мужей от всех племен языческих, и имутся за ризу мужа Иудеанина, глаголюще: пойдем с тобою, зане слышахом, яко Бог с вами есть. |