Книга пророка Иезекииля, глава 11

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 11
11:1 См.: 🔗Иез. 8:3	И воздвиже мя дух и возведе мя ко вратом дому Господня, яже прямо зрят на восток: и се, пред преддверием врат яко двадесять и пять мужей: и видех среде их Иехонию сына Иазерова и Фалтию Ванеова, старейшины людския.
11:2	И рече Господь ко мне: сыне человечь, сии мужие помышляющии суетная и совет творящии лукав во граде сем,
11:3	глаголющии: не в нове ли соградишася домове? Сей есть коноб, мы же мяса.
11:4	Сего ради прорцы на ня, прорцы, сыне человечь.
11:5	И нападе на мя Дух Господень и рече ко мне: глаголи, сия глаголет Господь: тако рекосте, доме Израилев, и умышления духа вашего Аз вем:
11:6	умножисте мертвецы вашя во граде сем и наполнисте пути его язвенных.
11:7	Того ради тако глаголет Адонаи Господь: мертвецы ваши, яже избисте среде его, тии суть мяса, а сей коноб есть, и вас изведу от среды его.
11:8 См.: 🔗Прит. 10:24	Меча боитеся, и мечь наведу на вас, глаголет Адонаи Господь:
11:9	и изведу вас от среды его и предам вас в руце чуждих и сотворю в вас суд:
11:10 См.: 🔗4Цар. 25:21 🔗Иер. 39:6 🔗Иер. 52:10	мечем падете, на горах Израилевых сужду вам, и увесте, яко Аз Господь:
11:11	той не будет вам в коноб, и вы не будете посреде его в мяса: на горах Израилевых сужду вам,
11:12 См.: 🔗Иез. 5:6	и увесте, яко Аз Господь, яко по заповедем Моим не ходисте и судов Моих не сотвористе, но по обычаем языков сущих окрест вас сотвористе.
11:13 См.: 🔗Чис. 16:45 🔗Иез. 9:8	И бысть внегда прорицати ми, и Фалтиа сын Ванеов умре: и падох ниц и возопих гласом великим, глаголя: горе мне, люте мне, Адонаю Господи! На скончание ли твориши Ты останки Израилевы?
11:14	И бысть слово Господне ко мне глаголя:
11:15 См.: 🔗Иер. 21:13	сыне человечь, братия твоя и мужие плена твоего и весь дом Израилев скончася, имже рекоша живущии во Иерусалиме: далече удалитеся от Господа, нам дана есть земля в наследие.
11:16 См.: 🔗Ис. 57:13 🔗Зах. 8:13 🔗Соф. 3:17	Сего ради рекох: сия глаголет Адонаи Господь: яко отрину я во языки и разсею я по всей земли, и буду им во освящение мало во странах, аможе внидут тамо.
11:17 См.: 🔗Иер. 23:3	Сего ради рцы: сия глаголет Адонаи Господь: и прииму я от язык и соберу я от стран, идеже разсеях я в них, и дам им землю Израилеву:
11:18	и внидут тамо и отвергут вся мерзости ея и вся беззакония ея от нея:
11:19 См.: 🔗Иер. 24:7 🔗Иер. 32:39 🔗Иез. 18:31 🔗Иез. 36:26	и дам им сердце ино и дух нов дам им, и исторгну каменное сердце от плоти их и дам им сердце плотяно,
11:20 См.: 🔗Иез. 36:28	яко да в заповедех Моих ходят и оправдания Моя сохранят и сотворят я: и будут Ми в люди, и Аз им буду в Бога.
11:21 См.: 🔗Иез. 9:10	А ихже сердце по гнусностем их и по беззаконием их ходит, пути тех на главы их положу, глаголет Адонаи Господь.
11:22	И воздвигоша Херувими крила своя, и колеса держащаяся их: слава же Бога Израилева бе на них свыше их.
11:23 См.: 🔗Иез. 10:18	И взыде слава Господня от среды града и ста на горе, яже бяше прямо града на восток.
11:24 См.: 🔗Иез. 8:3	И дух взя мя и принесе мя на землю Халдейску в пленники, в видении, Духом Божиим.
11:25	И взыдох от видения, еже видех, и глаголах ко пленником вся словеса Господня, яже показа мне.