Книга Иова, глава 24

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 24
24:1	Почто же Господа утаишася часы,
24:2 См.: 🔗Втор. 19:14 🔗Прит. 22:28	нечестивии же предел преидоша, стадо с пастырем разграбивше?
24:3	Подяремника сирых отведоша и вола вдовича в залог взяша:
24:4	уклониша немощных от пути праведнаго, вкупе же скрышася кротцыи земли:
24:5	изыдоша же, яко осли на село, на мя, изступивше своего чина: сладок бысть хлеб им ради юных.
24:6 См.: 🔗3Цар. 21:15	Ниву прежде времене не свою сущу пожаша, немощнии же виноград нечестивых без мзды и без брашна возделаша:
24:7 См.: 🔗Иов. 22:6	нагих многих успиша без риз, одежду же души их отяша:
24:8	каплями горскими мокнут, занеже не имеяху покрова, в камение облекошася:
24:9	восхитиша сироту от сосца, падшаго же смириша:
24:10 См.: 🔗Ис. 58:7	нагия же успиша неправедно, от алчущих же хлеб отяша:
24:11	в теснинах неправедно заседоша, пути же праведнаго не ведеша.
24:12 См.: 🔗Иов. 35:9	Уже из града и из домов своих изгоними бываху, душа же младенцев стеняше вельми: Бог же почто сих посещения не сотвори?
24:13	На земли сущым им, и не разумеша, пути же праведнаго не ведеша, ни по стезям его ходиша.
24:14	Разумев же их дела, предаде их во тму, и в нощи будет яко тать.
24:15 См.: 🔗Иов. 22:13 🔗Прит. 7:9	И око прелюбодея сохрани тму, глаголя: не узрит мя око: и покрывало лицу наложи.
24:16	Прокопа в нощи храмины, во днех же запечатлеша себе, не познаша света:
24:17	яко абие заутра им сень смерти, понеже познает мятеж сени смертныя.
24:18 См.: 🔗Быт. 49:4	Легок есть на лицы воды: проклята буди часть их на земли, да явятся же садовия их на земли суха:
24:19	рукоятие бо сирых разграбиша.
24:20	Потом воспомянен бысть ему грех, и якоже мгла росы изчезе: воздано же буди ему, еже содея, сокрушен же буди всяк неправдив яко древо неизцельно:
24:21	неплодней бо не добро сотвори и жены не помилова.
24:22	Яростию же низврати немощныя: востав убо не имать веры яти о своем житии.
24:23	Егда же разболится, да не надеется здрав быти, но падет недугом.
24:24 См.: 🔗Пс. 36:2 🔗Пс. 72:18	Многи бо озлоби высота его: увяде же яко злак в знои, или якоже клас от стебла сам отпад.
24:25	Аще же ни, кто есть глаголяй лжу ми глаголати, и положит ни во чтоже глаголы моя?