Евангелие от Матфея, глава 12

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 12
12:1 См.: 🔗Втор. 23:25 🔗Мк. 2:23 🔗Лк. 6:1	В то время иде Иисус в субботы сквозе сеяния: ученицы же Его взалкаша и начаша востерзати класы и ясти.
12:2	Фарисее же видевше реша Ему: се, ученицы Твои творят, егоже не достоит творити в субботу.
12:3	Он же рече им: несте ли чли, что сотвори Давид, егда взалка сам и сущии с ним?
12:4 См.: 🔗Исх. 29:32 🔗1Цар. 21:6 🔗Мк. 2:26 🔗Лк. 6:4	Како вниде в храм Божий и хлебы предложения снеде, ихже не достойно бе ему ясти, ни сущым с ним, токмо иереем единым?
12:5 См.: 🔗Лев. 8:31 🔗Лев. 24:9	Или несте чли в законе, яко в субботы священницы в церкви субботы сквернят и неповинни суть?
12:6	Глаголю же вам, яко церкве боле есть зде:
12:7 См.: 🔗Ос. 6:6 🔗Мф. 9:13	аще ли бысте ведали, что есть: милости хощу, а не жертвы, николиже убо бысте осуждали неповинных:
12:8	господь бо есть и субботы Сын Человеческий.
12:9 См.: 🔗Мк. 3:1 🔗Лк. 6:6	И прешед оттуду, прииде на сонмище их.
12:10	И се, человек бе ту, руку имый суху. И вопросиша Его, глаголюще: аще достоит в субботы целити? Да на Него возглаголют.
12:11	Он же рече им: кто есть от вас человек, иже имать овча едино, и аще впадет сие в субботы в яму, не имет ли е и измет?
12:12	Кольми убо лучши есть человек овчате? Темже достоит в субботы добро творити.
12:13	Тогда глагола человеку: простри руку твою. И простре: и утвердися цела яко другая.
12:14	Фарисее же шедше совет сотвориша на Него, како Его погубят. Иисус же разумев отиде оттуду.
12:15	И по Нем идоша народи мнози, и изцели их всех:
12:16	и запрети им, да не яве Его творят:
12:17	яко да сбудется реченное Исаием пророком, глаголющим:
12:18	се, Отрок Мой, Егоже изволих, Возлюбленный Мой, Наньже благоволи душа Моя: положу дух Мой на Нем, и суд языком возвестит:
12:19	не преречет, ни возопиет, ниже услышит кто на распутиих гласа Его:
12:20	трости сокрушенны не преломит и лена внемшася не угасит, дондеже изведет в победу суд:
12:21 См.: 🔗Ис. 42:1	и на имя Его языцы уповати имут.
12:22 См.: 🔗Лк. 11:14	Тогда приведоша к Нему беснующася слепа и нема: и изцели его, яко слепому и немому глаголати и глядати.
12:23	И дивляхуся вси народи глаголюще: еда Сей есть (Христос) сын Давидов?
12:24 См.: 🔗Мф. 9:34 🔗Мк. 3:22 🔗Лк. 11:15	Фарисее же слышавше реша: Сей не изгонит бесы, токмо о веельзевуле князи бесовстем.
12:25 См.: 🔗Мк. 3:24 🔗Лк. 11:17	Ведый же Иисус мысли их, рече им: всякое царство раздельшееся на ся запустеет, и всяк град или дом разделивыйся на ся не станет.
12:26	И аще сатана сатану изгонит, на ся разделился есть: како убо станет царство его?
12:27	И аще Аз о веельзевуле изгоню бесы, сынове ваши о ком изгонят? Сего ради тии вам будут судии.
12:28	Аще ли же Аз о Дусе Божии изгоню бесы, убо постиже на вас Царствие Божие.
12:29	Или како может кто внити в дом крепкаго и сосуды его расхитити, аще не первее свяжет крепкаго, и тогда дом его расхитит?
12:30	Иже несть со Мною, на Мя есть: и иже не собирает со Мною, расточает.
12:31 См.: 🔗Мк. 3:28 🔗Лк. 12:10 🔗1Ин. 5:16	Сего ради глаголю вам: всяк грех и хула отпустится человеком: а яже на Духа хула не отпустится человеком:
12:32	и иже аще речет слово на Сына Человеческаго, отпустится ему: а иже речет на Духа Святаго, не отпустится ему ни в сей век, ни в будущий.
12:33	Или сотворите древо добро и плод его добр: или сотворите древо зло и плод его зол: от плода бо древо познано будет.
12:34 См.: 🔗Лк. 6:45	Порождения ехиднова, како можете добро глаголати, зли суще? От избытка бо сердца уста глаголют.
12:35	Благий человек от благаго сокровища износит благая: и лукавый человек от лукаваго сокровища износит лукавая.
12:36	Глаголю же вам, яко всяко слово праздное, еже аще рекут человецы, воздадят о нем слово в день судный:
12:37 См.: 🔗Лк. 19:22	от словес бо своих оправдишися и от словес своих осудишися.
12:38 См.: 🔗Мф. 16:1 🔗1Кор. 1:22	Тогда отвещаша нецыи от книжник и фарисей, глаголюще: Учителю, хощем от Тебе знамение видети.
12:39 См.: 🔗Лк. 11:29	Он же отвещав рече им: род лукав и прелюбодей знамения ищет, и знамение не дастся ему, токмо знамение Ионы пророка:
12:40 См.: 🔗Ион. 2:1	якоже бо бе Иона во чреве китове три дни и три нощы, тако будет и Сын Человеческий в сердцы земли три дни и три нощы.
12:41 См.: 🔗Ион. 3:5 🔗Лк. 11:32	Мужие Ниневитстии востанут на суд с родом сим и осудят его, яко покаяшася проповедию Иониною: и се, боле Ионы зде.
12:42 См.: 🔗3Цар. 10:1 🔗2Пар. 9:1 🔗Лк. 11:31	Царица южская востанет на суд с родом сим и осудит и, яко прииде от конец земли слышати премудрость Соломонову: и се, боле Соломона зде.
12:43 См.: 🔗Лк. 11:24	Егда же нечистый дух изыдет от человека, преходит сквозе безводная места, ищя покоя, и не обретает:
12:44	тогда речет: возвращуся в дом мой, отнюдуже изыдох. И пришед обрящет празден, пометен и украшен:
12:45 См.: 🔗2Пет. 2:20 🔗Евр. 6:4	тогда идет и поймет с собою седмь иных духов лютейших себе, и вшедше живут ту: и будут последняя человеку тому горша первых. Тако будет и роду сему лукавому.
12:46 См.: 🔗Мк. 3:31 🔗Лк. 8:19	Еще же Ему глаголющу к народом, се, Мати (Его) и братия Его стояху вне, ищуще глаголати Ему.
12:47	Рече же некий Ему: се, Мати Твоя и братия Твоя вне стоят, хотяще глаголати Тебе.
12:48	Он же отвещав рече ко глаголющему Ему: кто есть Мати Моя, и кто суть братия Моя?
12:49	И простер руку Свою на ученики Своя, рече: се, мати Моя и братия Моя:
12:50 См.: 🔗Ин. 15:14	иже бо аще сотворит волю Отца Моего, Иже есть на небесех, той брат Мой, и сестра, и мати (Ми) есть.