Книга пророка Иеремии, глава 23

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 23
23:1 См.: 🔗Иез. 34:3	Горе пастырем, иже погубляют и расточают овцы паствы Моея, рече Господь.
23:2	Сего ради сия рече Господь Бог Израилев к пасущым людий Моих: вы расточили есте овцы Моя, и отвергосте я, и не посетисте их, се, Аз посещу на вас по лукавству умышлений ваших, рече Господь:
23:3 См.: 🔗Втор. 30:3 🔗Иер. 29:14 🔗Лк. 1:54	и Аз соберу останки стада Моего от всех земель, в няже извергох их тамо, и возвращу их к селением их, и возрастут и умножатся.
23:4 См.: 🔗Пс. 22:1 🔗Ис. 40:11 🔗Ис. 45:13 🔗Иер. 3:15 🔗Иез. 34:12	И возставлю над ними пастыри, и упасут их, и не убоятся ктому, ниже ужаснутся, и ни един погибнет от числа, рече Господь.
23:5 См.: 🔗Ис. 4:2 🔗Иер. 33:15 🔗Дан. 9:24 🔗Зах. 3:8 🔗Зах. 6:12 🔗Ин. 1:45	Се, дние грядут, глаголет Господь, и возставлю Давиду Восток праведный, и царствовати будет Царь и премудр будет и сотворит суд и правду на земли:
23:6 См.: 🔗Втор. 33:28 🔗Иер. 33:16	во днех Его спасется Иуда, и Израиль пребудет в надежди, и сие имя Ему, имже нарекут Его: Господь праведен наш.
23:7 См.: 🔗Иер. 16:14	Сего ради, се, дние грядут, рече Господь, и не рекут ктому: живет Господь, иже изведе сыны Израилевы от земли Египетския:
23:8	но: живет Господь, иже изведе и преведе семя дому Израилева от земли северски и от всех земель, в няже изверже их тамо, и обитати имут в земли своей.
23:9	О пророцех сотрено есть сердце мое во мне, вострепеташа вся кости моя, бых яко муж пиян и яко человек, егоже одоле вино, от лица Господня и от лица благолепия славы Его.
23:10 См.: 🔗Иер. 5:7 🔗Иер. 9:2 🔗Иер. 12:4	Яко прелюбодеяньми исполнена есть земля, яко от лица их плакася земля, изсхоша пажити пустынныя: и бысть течение их лукаво, и крепость их такожде.
23:11 См.: 🔗Иер. 8:10	Понеже пророк и священник осквернишася, и в дому Моем обретох лукавство их, рече Господь:
23:12 См.: 🔗Иер. 13:16	того ради путь их будет им ползок во тме, и поткнутся и падут в нем: наведу бо на них злая в лето посещения их, рече Господь.
23:13	И во пророцех Самарийских видех беззакония: пророчествоваху чрез Ваала и прельщаху люди Моя Израиля.
23:14 См.: 🔗Иер. 5:30 🔗Ис. 1:9 🔗Ис. 28:15 🔗Иез. 13:22	И во пророцех Иерусалимских видех ужасная, прелюбодействующих и ходящих во лжи и скрепляющих руки строптивым, да не отвратится кийждо от пути своего лукаваго: быша Мне вси аки Содом, и обитающии в нем яко Гоморр.
23:15 См.: 🔗Иер. 9:15	Сего ради тако рече Господь Сил ко пророком: се, Аз напитаю их пелынем и напою их желчию, от пророков бо Иерусалимских изыде осквернение на всю землю.
23:16 См.: 🔗Иер. 27:9	Сия глаголет Господь Сил: не слушайте словес пророков, иже пророчествуют вам и прельщают вас: видение от сердца своего глаголют, а не от уст Господних.
23:17 См.: 🔗Иер. 6:14 🔗Иез. 13:10 🔗Зах. 10:2	Глаголют отвергающым Мя: глагола Господь, мир будет вам: и всем, иже ходят в похотех своих, и всякому, ходящему в строптивстве сердца своего, рекоша: не приидут на вас злая.
23:18 См.: 🔗Иов. 15:8 🔗Ис. 40:13	Кто бо бысть в совете Господни, и виде и слыша словеса Его? Кто внят слово Его и слыша?
23:19 См.: 🔗Иер. 30:23	Се, буря от Господа и ярость исходит в сотрясение, устремившися приидет на нечестивыя.
23:20 См.: 🔗Иер. 30:24	И ктому не возвратится ярость Господня, дондеже сотворит сие и дондеже совершит помышление сердца Своего. В последния дни уразумеете совет Его.
23:21 См.: 🔗Иер. 14:14 🔗Иер. 27:15 🔗Иер. 29:9	Не посылах пророки, а они течаху: не глаголах к ним, и тии пророчествоваху.
23:22 См.: 🔗Ис. 55:11	И аще бы стали в совете Моем, слышана сотворили бы словеса Моя и отвратили бы людий Моих от пути их лукаваго и от начинаний их лукавых.
23:23	Бог приближаяйся Аз есмь, глаголет Господь, а не Бог издалеча.
23:24 См.: 🔗Иов. 34:21 🔗Пс. 138:7 🔗Сир. 23:27 🔗Ам. 9:2	Аще утаится кто в сокровенных, и Аз не узрю ли его? Рече Господь. Еда небо и землю не Аз наполняю? Рече Господь.
23:25 См.: 🔗Иер. 5:31 🔗Иер. 14:14	Слышах, яже глаголют пророцы, пророчествующе во имя Мое лжу и глаголюще: видех сон, (видех сон).
23:26	Доколе будет в сердцы пророков прорицающих лжу и пророчествующих льщения сердца своего,
23:27 См.: 🔗Суд. 3:7	мыслящих, да забвен будет закон Мой в сониих их, яже вещают кийждо искреннему своему, якоже забыша отцы их имя Мое ради Ваала?
23:28 См.: 🔗1Пет. 4:11	Пророк, иже имать сновидение, да вещает сновидение свое, а иже имать слово Мое, да глаголет слово Мое во истине. Что плевы ко пшенице? Тако слово Мое, рече Господь.
23:29 См.: 🔗Сир. 48:1 🔗Лк. 24:32 🔗Отк. 11:5	Еда словеса Моя не суть якоже огнь горящь, рече Господь, и яко млат сотрыющь камень?
23:30 См.: 🔗Втор. 18:20 🔗Иер. 14:15	Сего ради, се, Аз ко пророком, рече Господь, иже крадут словеса Моя кийждо от искренняго своего.
23:31 См.: 🔗Иез. 13:6 🔗Иез. 22:28	Се, Аз на пророки, глаголет Господь, износящыя пророчествия языком и дремлющыя дремание свое.
23:32 См.: 🔗Иез. 14:9 🔗Соф. 3:4	Се, Аз на пророки, прорицающыя соние лживо, рече Господь, и провещаша та, и прельстиша люди Моя во лжах своих и во прелестех своих, Аз же не послах их, ни заповедах им, и пользою не упользуют людий сих, (рече Господь).
23:33 См.: 🔗Иез. 12:9	И аще вопросят людие сии, или пророк, или священник, рекуще: кое (есть) бремя Господне? И речеши к ним: вы есте бремя, и повергу вас, рече Господь.
23:34	И пророк, и священник, и людие, иже рекут: бремя Господне, посещу местию на мужа того и на дом его.
23:35	Сице рцыте кийждо ко искреннему и ко брату своему: что отвеща Господь? И что глагола Господь?
23:36	И бремя Господне не помянется ктому, ибо бремя будет комуждо слово его: и превратисте словеса Бога живаго, Господа Сил, Бога нашего.
23:37	Сия рцы ко пророку: что отвеща тебе Господь? И что глагола Господь?
23:38	Аще же речете: бремя Господне: сего ради тако рече Господь: понеже рекли есте глагол сей бремя Господне, и послах к вам, рекий: не глаголите бремя Господне:
23:39	сего ради, се, Аз возму и повергу вас и град, егоже дах вам и отцем вашым, от лица Моего,
23:40 См.: 🔗Иер. 20:11	и дам вас в поношение вечное и в срамоту вечную, яже никогда забвением загладится.