Книга пророка Амоса, глава 2

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1 См.: 🔗Быт. 19:37 🔗Иер. 48:1 🔗4Цар. 3:27	Сия глаголет Господь: за три нечестия Моавля и за четыри не отвращуся его, понеже сожгоша кости царя Идумейска в пепел:
2:2	и послю огнь на Моава, и пояст основания градов его, и умрет со безсилием Моав, с воплем и гласом трубным:
2:3	и потреблю судию из него и вся князи его избию с ним, глаголет Господь.
2:4	Сия глаголет Господь: за три нечестия сынов Иудиных и за четыри не отвращуся их, понеже отринуша закон Господень и повелений Его не сохраниша, и прельстиша их суетная их, яже сотвориша, имже последоваша отцы их вслед их:
2:5	и послю огнь на Иуду, и пояст основания Иерусалимля.
2:6 См.: 🔗Втор. 27:19 🔗Ам. 8:6	Сия глаголет Господь: за три нечестия Израиля и за четыри не отвращуся его, понеже продаша праведнаго на сребре и убогаго на сапозех,
2:7 См.: 🔗Ис. 3:16 🔗Рим. 2:24	ходящих на прасе земнем, и бияху пястию во главы убогих, и путь смиренных совращаху: и сын и отец его влазяста ко единей рабыни, яко да осквернавят имя Бога своего:
2:8	и ризы своя связующе ужами, и завесы творяху держащыяся требища, и вино от оболганий пияху в дому бога своего.
2:9 См.: 🔗Чис. 21:24 🔗Втор. 2:31 🔗Нав. 9:10 🔗Нав. 24:8 🔗Пс. 134:11	Аз же отвергох Аморреа от лица их, егоже бе высота якоже высота кедрова, и крепок бяше якоже дуб, и изсуших плод его с верха и корение его из низу.
2:10	Аз же изведох вы из земли Египетския и обводих вы в пустыни четыредесять лет, еже прияти в наследие землю Аморрейску.
2:11 См.: 🔗Исх. 12:51 🔗Ам. 3:1	И поях от сынов ваших во пророки и от юнот ваших во освящение: еда несть сих, сынове Израилевы? Глаголет Господь.
2:12 См.: 🔗Ис. 30:10 🔗Ам. 7:12	И напаясте освященныя вином и пророком заповедасте глаголюще: не прорицайте.
2:13	Сего ради, се, Аз повращу под вами, якоже вратится колесница полна тростия:
2:14 См.: 🔗Еккл. 9:11 🔗Ам. 9:1	и погибнет бегство от скоротекущаго, и крепкий не удержит крепости своея, и храбрый не спасет души своея,
2:15	и стреляяй из лука не постоит, и быстрый ногама своима не уцелеет, и конник не спасет души своея,
2:16	и крепкий не обрящет сердца своего в силах, наг побегнет в той день, глаголет Господь.