Книга пророка Даниила, глава 10

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 10
10:1 См.: 🔗Дан. 1:7	В лето третие Кира царя Персскаго, слово открыся Даниилу, емуже прозвася имя Валтасар: истинно же слово и сила велика и разум дадеся ему в видении.
10:2	В тыя дни аз Даниил бех рыдая три седмицы дний:
10:3 См.: 🔗Пс. 103:15	хлеба вожделеннаго не ядох, и мясо и вино не вниде во уста моя, и мастию не помазахся до исполнения триех седмиц дний.
10:4 См.: 🔗Быт. 2:14	В день двадесять четвертый перваго месяца аз бех близ реки великия, яже есть Тигр Еддекель,
10:5 См.: 🔗Дан. 12:6 🔗Отк. 1:13	и воздвигох очи мои и видех, и се, муж един облечен в ризу льняну, и чресла его препоясана златом светлым:
10:6 См.: 🔗Отк. 1:14 🔗Иез. 1:24	тело же его аки фарсис, лице же его аки зрение молнии, очи же его аки свещы огнены, и мышцы его и голени аки зрак меди блещащияся, глас же словес его аки глас народа.
10:7	И видех аз Даниил един явление, а мужие, иже со мною, не видеша явления, но ужас великий нападе на них, и отбегнуша во страсе.
10:8 См.: 🔗Иов. 4:14 🔗Дан. 7:28	Аз же остах един и видех явление великое сие, и не оста во мне крепость, и слава моя обратися в разсыпание, и не удержах крепости.
10:9 См.: 🔗Дан. 8:18	И слышах глас словес его. И внегда слышах, бех сокрушен, лице же мое на земли:
10:10 См.: 🔗Отк. 1:17	и се, рука прикасающися мне, и возстави мя на колена моя и на длани рук моих.
10:11 См.: 🔗Дан. 9:23	И рече ко мне: Данииле, мужу желаний, разумей во словесех сих, яже аз глаголю к тебе, и стани на стоянии своем, яко ныне послан есмь к тебе. И егда возглагола слово сие ко мне, востах трепетен.
10:12 См.: 🔗Дан. 9:23 🔗Чис. 29:7 🔗Чис. 30:14	И рече ко мне: не бойся, Данииле, яко от перваго дне, в оньже подал еси сердце твое, еже разумети и трудитися пред Господем Богом твоим, услышана быша словеса твоя, аз же приидох во словесех твоих:
10:13 См.: 🔗Дан. 12:1 🔗Иуд. 1:9 🔗Отк. 12:7	князь же царства Персскаго стояше противу мне двадесять и един день: и се Михаил един от старейшин первых прииде помощи мне, и того оставих тамо со князем царства Персскаго,
10:14	и приидох сказати тебе, елика срящут людий твоих в последния дни, яко еще видение на дни.
10:15	И егда глагола со мною по словесем сим, дах лице мое на землю и умилихся.
10:16	И се, аки подобие сына человеча прикоснуся устнам моим, и отверзох уста моя и глаголах, и рех ко стоящему предо мною: господи, в видении твоем обратися утроба моя во мне, и не имех силы:
10:17	и како возможет раб твой господи, глаголати с господем сим моим? Аз бо изнемогох, и отныне не станет во мне крепость, (сила бо) и дыхание не оста во мне.
10:18 См.: 🔗Дан. 10:5	И приложи, и прикоснуся мне яко зрак человечь, и укрепи мя,
10:19 См.: 🔗Дан. 10:11	и рече ми: не бойся, мужу желаний, мир тебе: мужайся и крепися и егда глагола со мною, укрепихся и рех: да глаголет господь мой яко укрепил мя еси.
10:20	И рече: веси ли, почто приидох к тебе? И ныне возвращуся, еже ратися со князем Персским: аз же исхождах, князь же Еллинский грядяше:
10:21	но да возвешу ти вчиненое в писании истины, инесть ни единаго помогающаго со мною о сих, но точию Михаил князь ваш.