Первая книга Паралипоменон (Первая книга Хроник, Первая Летопись), глава 23

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 23
23:1 См.: 🔗3Цар. 1:33	И Давид стар и исполнен дний, и воцари Соломона сына своего вместо себе над Израилем:
23:2	и собра всех князей Израилевых, и священников, и левитов:
23:3 См.: 🔗Чис. 4:3 🔗Чис. 8:24	сочтени же быша левити, от тридесяти лет и вышше, и бысть число их по главам их, мужей тридесять и осмь тысящ:
23:4 См.: 🔗Втор. 16:18	от сих избрани на дела дому Господня двадесять четыри тысящы, и книгочей и судий шесть тысящ,
23:5 См.: 🔗1Пар. 9:22 🔗Иез. 40:44 🔗2Пар. 29:25	и четыри тысящы дверников, и четыри тысящы поющих Господеви во органы, ихже сотвори ко хвалению Господню.
23:6 См.: 🔗2Пар. 8:14 🔗1Пар. 6:1 🔗Исх. 6:16 🔗Чис. 3:17 🔗Чис. 26:57	И раздели их Давид на чреды сыном Левииным, Гирсону, Каафу и Мераре:
23:7	и Гирсону и Леадану и Семею.
23:8	Сынове Леадани: началник Иеиил и Зефоф и Иоиль, трие.
23:9	Сынове же Семеовы: Саломиф и Азаил и Арам, трие: сии началницы отечеств Леаданих.
23:10	И сыном Семеовым Иеф и Зизай, и Иоас и Вериа: тии сынове Семеовы четыре.
23:11	Бе же Иеф первый и Зизай вторый: Иоас же и Вариа не иместа многих сынов и быста в дому отечества в причтение едино.
23:12 См.: 🔗Исх. 6:18	Сынове Каафовы: Амврам и Иссаар, Хеврон, Озиил, четыри.
23:13 См.: 🔗Исх. 6:20 🔗Чис. 3:10 🔗Евр. 5:4	Сынове Амврамли: Аарон и Моисей: отлучен же бысть Аарон еже освящати Святая Святых, той и сынове его во веки, и да кадит фимиамом пред Господем, служит Ему и молится во имя Его до века.
23:14	Моисей же человек Божий и сынове его причтени суть в колено Левиино.
23:15 См.: 🔗Исх. 2:22 🔗Исх. 18:3	Сынове Моисеовы: Гирсам и Елиезер.
23:16	Сынове Гирсамли, Суваил началник.
23:17	Быша же сынове Елиезеру, Равиа началник: и не беша Елиезеру сынове инии: сынове же Равиини умножени суть зело.
23:18	Сынове Иссааровы, Саллумоф началник.
23:19 См.: 🔗1Пар. 24:23	Сынове Хеврони: Иериав первый, Амариа вторый, Иазиил третий Иезекиа четвертый.
23:20	Сынове же Озиили: Миха первый, и Иессиа вторый.
23:21 См.: 🔗Исх. 6:19 🔗1Пар. 6:19	Сынове Мерарины: Мооли и Муси.
23:22 См.: 🔗1Пар. 24:28	Сынове моолиевы: Елеазар и Кис. Умре же Елеазар, и не быша ему сынове, но токмо дщери: и пояша их сынове Кисовы братия их.
23:23	Сынове Мусиины: Мооли и Едер и Иаримоф, трие.
23:24 См.: 🔗Чис. 8:24	Сии сынове Левиини по домом отечеств их, началницы отечеств их, по согляданию их, по числу имен их, по главам их, иже творяху дела служения дому Господня, от двадесяти лет и вышше.
23:25	Рече бо Давид: покой даде Господь Бог людем Своим Израилю, и вселися во Иерусалиме даже да века,
23:26	и левити не быша носяще скинию и вся сосуды ея к служению ея.
23:27	По повелению бо Давидову последнему есть число сыновом Левииным от двадесяти лет и вышше:
23:28 См.: 🔗2Пар. 31:17	зане постави их под руку сыном Аароним, еже служити в дому Господни во дворех и в притворех, и во очищении всех святынь, и в делех служения дому Божия,
23:29	и над хлебами предложения, и над мукою пшеничною жертвы, и над пряжмами опресночными, и над сковрадою, и над печеным, и над всяким весом и мерою,
23:30	и еже стояти, утро хвалити и исповедатися Господеви, такожде и к вечеру,
23:31	и над всеми возносимыми всесожжении Господеви в субботы, и в новомесячиих, и в праздницех, по числу, по чину их выну Господеви,
23:32	и да сохранят стражбы скинии свидения, и стражу святилища, и стражбы сынов Аароних братий своих, да служат в дому Господни.