Книга Премудрости Соломона, глава 14 неканонич.

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 14
14:1 См.: 🔗Ион. 1:5	Плыти паки кто помыслив и сверепыя волны преходити, носящаго его корабля тленнейшее древо призывает:
14:2	оное бо желание пристяжаний умысли, хитрец же мудростию содела:
14:3 См.: 🔗Исх. 14:21	Твой же, Отче, устрояет промысл: яко дал еси и в мори путь и в волнах стезю крепкую,
14:4 См.: 🔗Ис. 43:2 🔗Ион. 2:3	показуя, яко силен еси от всякаго спасти, аще и без художества кто взыдет.
14:5	Хощеши же, да не будут праздна дела премудрости Твоея: сего ради и малейшему древу вверяют человецы душы (своя), и преходяще волны кораблецем избавлени суть.
14:6 См.: 🔗Быт. 6:4 🔗Быт. 7:13	И от начала бо, егда погибаху гордии исполини, упование мира в кораблеце избежавшее, остави веку семя рождения, рукою Твоею устроено.
14:7 См.: 🔗1Пет. 3:20	Благословено бо древо, имже бывает правда.
14:8 См.: 🔗Пс. 134:15 🔗Вар. 3:18	Рукотворенное же проклято есть, и сотворивый е: яко ов убо содела, сие же тленное богом именовася.
14:9 См.: 🔗Пс. 5:5	В равне бо ненавидима суть Богу и нечествуяй, и нечестие его:
14:10	ибо сотвореное с сотворшим мучимо будет.
14:11 См.: 🔗Иер. 46:25	Сего ради и во идолех языческих будет казнь, яко в создании Божии в мерзость сотворени суть и в соблазны душам человеческим и в сеть ногам буих.
14:12 См.: 🔗Исх. 34:15 🔗Иез. 16:15 🔗Ос. 2:5	Начало бо блужения умышление идолов: изобретение же их тление живота.
14:13	Ниже бо быша от начала, ниже будут во веки:
14:14 См.: 🔗Гал. 5:26 🔗Прем. 9:5	тщеславием бо человеческим внидоша в мир, и сего ради краток их конец вменися.
14:15 См.: 🔗Рим. 1:23	Горьким бо плачем сетуя отец скоро восхищенаго чада образ сотворив, егоже тогда человека мертва, ныне яко бога почте: и предаде подручным тайны и жертвы:
14:16 См.: 🔗Дан. 3:5	потом временем возмогший нечестивый обычай, аки закон хранимь бысть, и мучителей повелением почитаема бяху изваянная:
14:17	ихже в лице не могуще чествовати человецы дальнаго ради обитания, издалеча лице изобразивше, явный образ почитаемаго царя сотвориша, яко да отстоящаго аки близ сущаго ласкают со прилежанием.
14:18	В продолжение же злочестия и не разумеющих принуди художниково любочестие.
14:19	Сей бо хотя угодити державствующему, произведе хитростию (своею) подобие на лучшее:
14:20	множество же человек, привлечено благообразием дела, прежде вмале чествованаго человека ныне в бога вмениша.
14:21	И сие бысть житию в прельщение, яко или злоключению, или мучителству послуживше человецы, несообщно Имя камению и древам обложиша.
14:22 См.: 🔗Деян. 19:24	Посем не доволно бе прельщатися о Божии разуме, но и в велицей живуще безумия брани, толикая злая мир именуют.
14:23 См.: 🔗Втор. 18:10 🔗Иер. 7:9 🔗Иер. 19:5	Ибо или детоубийственныя жертвы, или сокровенныя тайны, или неистовныя от иных законов пиршества творяше,
14:24	ниже жития, ниже браков чистых еще хранят: един же другаго или наветом убивает, или блудя оскорбляет.
14:25 См.: 🔗Рим. 1:29 🔗Иер. 7:9	Вся же смешена суть, кровь и убийство, татьба и лесть, растление, неверство, смятение, заклинание, молва благих,
14:26 См.: 🔗Рим. 1:24	благодати забвение, душам осквернение, рождению пременение, браков безчиние, прелюбодеяние и студодеяние.
14:27	Недостойных бо имене идолов служение начало всякаго зла, и вина и конец есть:
14:28 См.: 🔗Ос. 7:5	ибо или веселящеся неистовствуют, или пророчествуют ложная, или живут неправедне, или кленутся скоро.
14:29	На бездушныя бо идолы надеющеся, зле кленущеся казними быти не чают.
14:30	За обоя же на них приидет суд: понеже зле мудрствоваша о Бозе, внемлюще идолом, и неправедно кляшася лестию, презревше преподобие.
14:31	Не бо сила кленущих, но согрешающым суд находит всегда на преступление неправедных.