Деяния святых Апостолов, глава 20

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 20
20:1	По утишении же молвы, призвав Павел ученики, утешив и целовав их, изыде ити в Македонию.
20:2	Прошед же страны оны и утешив их словом многим, прииде во Елладу:
20:3	пожив же месяцы три, бывшу нань навету от Иудей, хотящу отвезтися в Сирию, бысть хотение возвратитися сквозе Македонию.
20:4 См.: 🔗Деян. 19:29 🔗Деян. 27:2	Последова же ему даже до Асии Сосипатр Пирров Берянин, Солуняне же Аристарх и Секунд, и Гаий Дервянин и Тимофей, Асиане же Тихик и Трофим.
20:5	Сии предшедше ждаху нас в Троаде.
20:6	Мы же отвезохомся по днех опресночных от Филипп и приидохом к ним в Троаду во днех пяти, идеже пребыхом дний седмь.
20:7 См.: 🔗Деян. 2:46 🔗1Кор. 10:16	Во едину же от суббот, собравшымся учеником преломити хлеб, Павел беседоваше к ним, хотя изыти на утрии, простре же слово до полунощи.
20:8	Бяху же свещы многи в горнице, идеже бехом собрани.
20:9	Седя же некто юноша, именем Евтих, во окне, отягчен сном глубоким, глаголющу Павлу о мнозе, преклонься от сна, паде от трекровника долу, и взяша его мертва.
20:10	Сошед же Павел нападе нань, и объемь его рече: не молвите, ибо душа его в нем есть.
20:11	Возшед же и преломль хлеб и вкушь, доволно же беседовав даже до зари, и тако изыде.
20:12	Приведоша же отрока жива и утешишася не мало.
20:13	Мы же, пришедше в корабль, отвезохомся во Ассон, оттуду хотяще пояти Павла: тако бо нам бе повелел, хотя сам пешь ити.
20:14	И якоже снидеся с нами во Ассоне, вземше его приидохом в Митилин.
20:15	И оттуду отвезшеся, во утрие пристахом противу Хию, в другий же отвезохомся в Самон, и пребывше в Трогиллии, в грядущий же день приидохом в Милит:
20:16	суди бо Павел мимо ити Ефес, яко да не будет ему закоснети во Асии, тщашебося, аще возможно будет, в день Пятьдесятный быти во Иерусалиме.
20:17	От Милита же послав во Ефес, призва пресвитеры церковныя,
20:18 См.: 🔗Деян. 19:9	и якоже приидоша к нему, рече к ним: вы весте, яко от перваго дне, отнелиже приидох во Асию, како с вами все время бых,
20:19	работая Господеви со всяким смиреномудрием и многими слезами и напастьми, прилучившимися мне от Иудейских навет:
20:20	яко ни в чесом от полезных обинухся, еже сказати вам и научити вас пред людьми и по домом,
20:21 См.: 🔗Лк. 24:47	засвидетелствуя Иудеем же и Еллином еже к Богу покаяние и веру яже в Господа нашего Иисуса Христа.
20:22	И ныне, се, аз связан Духом гряду во Иерусалим, яже в нем хотящая приключитися мне не ведый:
20:23 См.: 🔗Деян. 9:16 🔗Деян. 21:11 🔗1Фес. 3:3	точию яко Дух Святый по вся грады свидетелствует, глаголя, яко узы мене и скорби ждут.
20:24 См.: 🔗Деян. 21:13 🔗Рим. 8:35 🔗Гал. 1:1 🔗Кол. 1:24 🔗Тит. 1:3	Но ни едино же попечение творю, ниже имам душу мою честну себе, разве еже скончати течение мое с радостию и службу, юже приях от Господа Иисуса, засвидетелствовати Евангелие благодати Божия.
20:25	И ныне, се, аз вем, яко ктому не узрите лица моего вы вси, в нихже проидох проповедуя Царствие Божие.
20:26 См.: 🔗Иез. 33:9 🔗Деян. 18:6	Темже свидетелствую вам во днешний день, яко чист аз от крове всех,
20:27 См.: 🔗Лк. 7:30 🔗Еф. 1:11	не обинухся бо сказати вам всю волю Божию.
20:28 См.: 🔗Ис. 53:12 🔗Ин. 21:15 🔗1Пет. 5:2 🔗Рим. 3:25	Внимайте убо себе и всему стаду, в немже вас Дух Святый постави епископы, пасти Церковь Господа и Бога, юже стяжа Кровию Своею.
20:29 См.: 🔗Мф. 7:15 🔗2Пет. 2:1	Аз бо вем сие, яко по отшествии моем внидут волцы тяжцы в вас, не щадящии стада:
20:30	и от вас самех востанут мужие глаголющии развращеная, еже отторгати ученики вслед себе.
20:31 См.: 🔗Мф. 25:13 🔗Евр. 13:17	Сего ради бдите, поминающе, яко три лета нощь и день не престаях учя со слезами единаго когождо вас.
20:32 См.: 🔗Еф. 1:18	И ныне предаю вас, братие, Богови и слову благодати Его, могущему наздати и дати вам наследие во осенных всех.
20:33 См.: 🔗1Цар. 12:3	Сребра или злата или риз ни единаго возжелах:
20:34 См.: 🔗Деян. 18:3 🔗1Кор. 4:12 🔗1Фес. 2:9 🔗2Фес. 3:8	сами весте, яко требованию моему и сущым со мною послужисте руце мои сии.
20:35 См.: 🔗Лк. 6:38 🔗Лк. 18:22	Вся сказах вам, яко тако труждающымся подобает заступати немощныя, поминати же слово Господа Иисуса, яко Сам рече: блаженнее есть паче даяти, нежели приимати.
20:36	И сия рек, преклонь колена своя, со всеми ими помолися.
20:37	Мног же бысть плачь всем: и нападше на выю Павлову, облобызаху его,
20:38	скорбяще наипаче о словеси, еже рече, яко ктому не имут лица его узрети. Провождаху же его в корабль.