Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 8 | |
8:1 См.: 🔗Рим. 5:1 | Ни едино убо ныне осуждение сущым о Христе Иисусе, не по плоти ходящым, но по духу: |
8:2 | закон бо духа жизни о Христе Иисусе свободил мя есть от закона греховнаго и смерти. |
8:3 | Немощное бо закона, в немже немоществоваше плотию, Бог Сына Своего посла в подобии плоти греха, и о гресе осуди грех во плоти, |
8:4 | да оправдание закона исполнится в нас, не по плоти ходящих, но по духу. |
8:5 См.: 🔗Ин. 3:6 🔗1Кор. 2:14 | Сущии бо по плоти, плотская мудрствуют. А иже по духу, духовная. |
8:6 См.: 🔗Рим. 6:21 | Мудрование бо плотское смерть есть, а мудрование духовное живот и мир, |
8:7 См.: 🔗Иак. 4:4 | зане мудрование плотское вражда на Бога: закону бо Божию не покаряется, ниже бо может. |
8:8 См.: 🔗Евр. 11:6 | Сущии же во плоти, Богу угодити не могут. |
8:9 См.: 🔗1Кор. 3:16 | Вы же несте во плоти, но в дусе, понеже Дух Божии живет в вас. Аще же кто Духа Христова не имать, сей несть Его. |
8:10 | Аще же Христос в вас, плоть убо мертва греха ради, дух же живет правды ради. |
8:11 См.: 🔗Рим. 6:4 | Аще ли же Дух Воскресившаго Иисуса от мертвых живет в вас, Воздвигий Христа из мертвых оживотворит и мертвенная телеса ваша, живущим Духом Его в вас. |
8:12 См.: 🔗Рим. 6:7 | Темже убо, братие, должни есмы не плоти, еже по плоти жити. |
8:13 См.: 🔗Гал. 5:19 | Аще бо по плоти живете, имате умрети, аще ли духом деяния плотская умерщвляете, живи будете: |
8:14 См.: 🔗Гал. 5:18 | елицы бо Духом Божиим водятся, сии суть сынове Божии: |
8:15 | не приясте бо духа работы паки в боязнь, но приясте Духа сыноположения, о Немже вопием: Авва Отче. |
8:16 См.: 🔗Еф. 4:30 | Самый Дух спослушествует духови нашему, яко есмы чада Божия. |
8:17 См.: 🔗Гал. 4:7 | Аще же чада, и наследницы: наследницы убо Богу, снаследницы же Христу, понеже с Ним страждем, да и с Ним прославимся. |
8:18 См.: 🔗1Пет. 4:13 | Непщую бо, яко недостойны страсти нынешняго времене к хотящей славе явитися в нас. |
8:19 См.: 🔗2Пет. 3:13 | Чаяние бо твари, откровения сынов Божиих чает: |
8:20 | суете бо тварь повинуся не волею, но за повинувшаго ю, на уповании, |
8:21 | яко и сама тварь свободится от работы истления в свободу славы чад Божиих. |
8:22 | Вемы бо, яко вся тварь с нами совоздыхает и сболезнует даже доныне: |
8:23 | не точию же, но и сами начаток Духа имуще, и мы сами в себе воздыхаем, всыновления чающе, избавления телу нашему. |
8:24 См.: 🔗Евр. 11:1 | Упованием бо спасохомся. Упование же видимое, несть упование: еже бо видит кто, что и уповает? |
8:25 | Аще ли, егоже не видим, надеемся, терпением ждем. |
8:26 | Сице же и Дух способствует нам в немощех наших: о чесом бо помолимся, якоже подобает, не вемы, но Сам Дух ходатайствует о нас воздыхании неизглаголанными. |
8:27 См.: 🔗1Цар. 16:7 🔗Ин. 14:17 | Испытаяй же сердца весть, что есть мудрование Духа, яко по Богу приповедует о святых. |
8:28 См.: 🔗Еф. 1:4 | Вемы же, яко любящым Бога вся поспешествуют во благое, сущым по предуведению званным: |
8:29 См.: 🔗2Кор. 3:18 🔗Кол. 1:18 | ихже бо предуведе, (тех) и предустави сообразных быти образу Сына Своего, яко быти Ему первородну во многих братиях: |
8:30 См.: 🔗Рим. 5:9 🔗Рим. 9:24 | а ихже предустави, тех и призва: а ихже призва, сих и оправда: а ихже оправда, сих и прослави. |
8:31 См.: 🔗Пс. 55:12 | Что убо речем к сим, аще Бог по нас, кто на ны, |
8:32 См.: 🔗Ин. 3:16 | Иже убо Своего Сына не пощаде, но за нас всех предал есть Его, како убо не и с Ним вся нам дарствует? |
8:33 См.: 🔗Ис. 50:9 🔗Отк. 12:10 | Кто поемлет на избранныя Божия, Бог оправдаяй. |
8:34 См.: 🔗1Ин. 2:1 | Кто осуждаяй? Христос Иисус умерый, паче же и воскресый, Иже и есть о десную Бога, Иже и ходатайствует о нас. |
8:35 См.: 🔗1Ин. 2:28 🔗2Кор. 12:10 | Кто ны разлучит от любве Божия, скорбь ли, или теснота, или гонение, или глад, или нагота, или беда, или мечь? Якоже есть писано: |
8:36 См.: 🔗Пс. 43:23 | яко Тебе ради умерщвляеми есмы весь день: вменихомся якоже овцы заколения. |
8:37 | Но во всех сих препобеждаем за Возлюбльшаго ны. |
8:38 См.: 🔗Еф. 6:12 | Известихся бо, яко ни смерть, ни живот, ни Ангели, ни Начала, ниже Силы, ни настоящая, ни грядущая, |
8:39 | ни высота, ни глубина, ни ина тварь кая возможет нас разлучити от любве Божия, яже о Христе Иисусе Господе нашем. |