Псалтирь, псалом 85

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Псаломъ 85
85:1 См.: 🔗Пс. 87:3	Приклони, Господи, ухо Твое, и услыши мя: яко нищь и убог есмь аз.
85:2	Сохрани душу мою, яко преподобен есмь: спаси раба Твоего, Боже мой, уповающаго на Тя.
85:3	Помилуй мя, Господи, яко к Тебе воззову весь день.
85:4	Возвесели душу раба Твоего: яко к Тебе взях душу мою.
85:5 См.: 🔗Исх. 34:6 🔗Иоил. 2:13 🔗Ион. 4:2	Яко Ты, Господи, благ и кроток и многомилостив всем призывающым Тя.
85:6	Внуши, Господи, молитву мою и вонми гласу моления моего.
85:7 См.: 🔗Пс. 49:15	В день скорби моея воззвах к Тебе, яко услышал мя еси.
85:8 См.: 🔗Втор. 3:24	Несть подобен Тебе в бозех, Господи, и несть по делом Твоим.
85:9 См.: 🔗Иер. 3:17 🔗Отк. 15:5	Вси языцы, елики сотворил еси, приидут и поклонятся пред Тобою, Господи, и прославят имя Твое:
85:10 См.: 🔗2Цар. 7:22 🔗Ис. 45:5	яко велий еси Ты и творяй чудеса, Ты еси Бог един.
85:11 См.: 🔗Пс. 24:4 🔗Пс. 26:11	Настави мя, Господи, на путь Твой, и пойду во истине Твоей: да возвеселится сердце мое боятися имене Твоего.
85:12	Исповемся Тебе, Господи Боже мой, всем сердцем моим и прославлю имя Твое в век:
85:13 См.: 🔗Пс. 29:4	яко милость Твоя велия на мне, и избавил еси душу мою от ада преисподнейшаго.
85:14 См.: 🔗Пс. 53:5	Боже, законопреступницы восташа на мя, и сонм державных взыскаша душу мою, и не предложиша Тебе пред собою.
85:15 См.: 🔗Пс. 85:5 🔗Ис. 54:8	И Ты, Господи Боже мой, щедрый и милостивый, долготерпеливый и многомилостивый и истинный,
85:16	призри на мя и помилуй мя: даждь державу Твою отроку Твоему и спаси сына рабы Твоея.
85:17	Сотвори со мною знамение во благо: и да видят ненавидящии мя, и постыдятся, яко Ты, Господи, помогл ми и утешил мя еси.