Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 27 | |
27:1 | И заповеда Моисей и старейшины сынов Израилевых, глаголя: сохраните вся заповеди сия, елики аз заповедаю вам днесь. |
27:2 См.: 🔗Нав. 3:17 | И будет в оньже день прейдете Иордан на землю, юже Господь Бог твой дает тебе во жребий, и поставиши себе камение велико и обелиши я мелом, |
27:3 | и напишеши на каменех тех вся словеса закона сего, егда прейдете Иордан, егда внидете в землю, юже Господь Бог твой дает тебе, землю кипящую медом и млеком, якоже рече Господь Бог отец твоих тебе. |
27:4 | И будет егда прейдете Иордан, да поставите камение сие, яже аз повелеваю вам днесь, в горе Гевал, и побелиши их мелом: |
27:5 См.: 🔗Исх. 20:25 🔗Нав. 8:31 | и да созиждеши тамо олтарь Господеви Богу твоему, олтарь от камения: да не возложиши на них железа: |
27:6 | камением всецелым да созиждеши олтарь Господеви Богу твоему и вознесеши на нем всесожжения Господеви Богу твоему, |
27:7 См.: 🔗Втор. 14:26 | и пожреши жертву спасения: и яси, и насытишися тамо, и возвеселишися пред Господем Богом твоим, |
27:8 | и напишеши на камениих сих весь закон сей яве зело. |
27:9 См.: 🔗Втор. 26:18 | И глагола Моисей и жерцы левити всему Израилю, глаголюще: молчи и слыши, Израилю, в день сей стался еси в люди Господеви Богу твоему: |
27:10 См.: 🔗Втор. 26:17 🔗Втор. 28:1 | и да послушаеши гласа Господа Бога твоего, и да сотвориши вся заповеди Его и оправдания Его, яже аз заповедаю тебе днесь. |
27:11 | И заповеда Моисей людем в той день, глаголя: |
27:12 См.: 🔗Втор. 11:29 | сии да станут благословляти люди на горе Гаризин, прешедше Иордан: Симеон, Левий, Иуда, Иссахар, Иосиф и Вениамин: |
27:13 | и сии да станут на клятву на горе Гевал: Рувим, Гад и Асир, Завулон, Дан и Неффалим. |
27:14 | И отвещавше рекут левити всему Израилю гласом великим: |
27:15 См.: 🔗Дан. 9:11 | проклят человек, иже сотворит изваяние и слияние, мерзость Господеви, дело рук художника, и положит е в сокровении. И отвещавше вси людие рекут: буди. |
27:16 | Проклят безчестяй отца своего или матерь свою. И рекут вси людие: буди. |
27:17 См.: 🔗Втор. 19:14 | Проклят прелагаяй пределы ближняго своего. И рекут вси людие буди. |
27:18 | Проклят прельщаяй слепаго в пути. И рекут вси людие: буди. |
27:19 | Проклят, иже уклонит суд пришелцу и сироте и вдове. И рекут вси людие: буди. |
27:20 | Проклят лежай с женою отца своего, яко открыл есть покровение отца своего. И рекут вси людие: буди. |
27:21 См.: 🔗Исх. 22:19 🔗Лев. 18:23 | Проклят лежай со всяким скотом. И рекут вси людие: буди. |
27:22 См.: 🔗Лев. 18:9 | Проклят лежай с сестрою своею, дщерию отца своего или дщерию матере своея и рекут вси людие: буди. |
27:23 См.: 🔗Быт. 38:18 🔗Лев. 18:15 | Проклят лежай с тещею своею. И рекут вси людие: буди. Проклят лежай с сестрою жены своея. И рекут вси людие: буди. |
27:24 | Проклят бияй ближняго с лестию. И рекут вси людие: буди. |
27:25 См.: 🔗Исх. 23:8 | Проклят, иже возмет дары поразити душу крове неповинныя. И рекут вси людие: буди. |
27:26 См.: 🔗Гал. 3:10 | Проклят всяк человек, иже не пребудет во всех словесех закона сего, еже творити я. И рекут вси людие: буди. |