Первая книга Царств (Первая книга Самуила), глава 2

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1 См.: 🔗Лк. 1:47 🔗Пс. 91:11	И помолися Анна и рече: утвердися сердце мое в Господе, вознесеся рог мой в Бозе моем, разширишася уста моя на враги моя, возвеселихся о спасении Твоем:
2:2 См.: 🔗Мф. 19:17 🔗Исх. 15:11	яко несть свят яко Господь, и несть праведен яко Бог наш, и несть свят паче Тебе:
2:3	не хвалитеся и не глаголите высокая в гордыни, ниже да изыдет велеречие из уст ваших: яко Бог разумов Господь, и Бог уготовляяй начинания Своя:
2:4 См.: 🔗Лк. 1:52	лук сильных изнеможе, и немощствующии препоясашася силою:
2:5 См.: 🔗Лк. 1:53	исполненнии хлеба лишишася, и алчущии пришелствоваша землю: яко неплоды роди седмь, и многая в чадех изнеможе:
2:6 См.: 🔗Втор. 32:39 🔗Тов. 13:2 🔗Прем. 16:13	Господь мертвит и живит, низводит во ад и возводит,
2:7 См.: 🔗Сир. 11:21	Господь убожит и богатит, смиряет и высит,
2:8 См.: 🔗Пс. 112:7	возставляет от земли убога и от гноища воздвизает нища посадити его с могущими людий, и престол славы дая в наследие им:
2:9 См.: 🔗Пс. 146:6	даяй молитву молящемуся и благослови лета праведнаго, яко не в крепости силен муж:
2:10 См.: 🔗Ис. 45:9	Господь немощна сотвори сопостата Его, Господь свят: да не хвалится премудрый премудростию своею, и да не хвалится сильный силою своею, и да не хвалится богатый богатством своим: но о сем да хвалится хваляйся, еже разумети и знати Господа, и творити суд и правду посреде земли: Господь взыде на небеса и возгреме: той судит концем земли, праведен сый, и даст крепость царем нашым и вознесет рог христа Своего.
2:11	И оставиша его тамо пред Господем и отидоша во Армафем в дом свой: отроча же бе служа лицу Господню пред лицем Илии жерца.
2:12 См.: 🔗Втор. 13:13	Сынове же Илии жерца (быша) сынове погибелнии, не ведуще Господа,
2:13 См.: 🔗Исх. 29:27 🔗Лев. 7:31 🔗Иез. 46:24	ни оправдания жреческа пред людьми всеми жрущими. И прихождаше отрок жреческ, егда варятся мяса, и удица трезубна в руку его,
2:14 См.: 🔗Лев. 7:34	и влагаше ю в коноб великий, или в медяный сосуд, или горнец, и все еже вонзеся на удицу, взимаше е себе жрец: и тако творяху всему Израилеви приходящему пожрети Господеви в Силоме.
2:15 См.: 🔗Лев. 3:3	И прежде каждения тука, прихождаше отрок жреческ и глаголаше мужеви жрущему: даждь мяса испещи жерцу, и не возму от тебе мяса варенаго от коноба.
2:16	И глаголаше муж жряй: да покадится первее тук, якоже подобает, и тогда возмеши себе от всех, еже хощет душа твоя. И рече: ни, ныне даждь: аще же не даси, возму силою.
2:17 См.: 🔗Рим. 2:24 🔗2Кор. 6:3	И бе пред Господем грех отроков велий зело, яко отметаху жертву Господню.
2:18	И Самуил бе служа пред Господем, отрочищь сый опоясан во ефуд льнян.
2:19	И хламиду малу сотвори ему мати его, и приношаше ему от дний во дни, егда восхождаше с мужем своим пожрети жертву дний.
2:20	И благослови Илий Елкану и жену его, глаголя: да воздаст ти Господь семя от жены сея за дар, егоже даровал еси Господеви. И отиде человек в место свое.
2:21 См.: 🔗Лк. 1:80 🔗Лк. 2:40	И посети Господь Бог Анну, и зача, и роди еще три сыны и дщери две. И возвеличися отрок Самуил пред Господем.
2:22	Илий же состареся зело: и услыша, яже творяху сынове его всем сыном Израилевым, и яко бываху с женами предстоящими у дверий скинии свидения,
2:23	и рече им: почто творите по глаголу сему, егоже аз слышу из уст всех людий Господних (о вас)?
2:24	Ни, чада, ни: яко не благ слух, егоже аз слышу о вас: не творите тако, яко не добры слухи, яже аз слышу, еже не работати людем Богу:
2:25 См.: 🔗Чис. 15:30 🔗3Цар. 12:16	аще согрешая согрешит муж мужеви, помолятся о нем ко Господу: аще же Господеви согрешит, кто помолится о нем? И не послушаста гласа отца своего, яко хотяй восхоте Господь погубити я.
2:26	Отрок же Самуил хождаше предуспевая, и бе благ пред Господем и человеки.
2:27 См.: 🔗Исх. 4:27 🔗Деян. 7:25	И прииде человек Божий ко Илию и рече: сия глаголет Господь: открываяся открыхся в дому отца твоего, сущым им в земли Египетстей рабом в дому фараони,
2:28 См.: 🔗Лев. 7:34 🔗Лев. 10:14	и избрах дом отца твоего от всех домов Израилевых Мне служити, еже восходити ко олтарю Моему и кадити кадилом и носити ефуд, и дах дому отца твоего вся, яже огня жертвенная сынов Израилевых, в снедь:
2:29	и почто ты воззрел еси на фимиам Мой и на жертву Мою безстудным оком, и прославил сыны твоя паче Мене, еже благословляти начаток всякия жертвы Израилевы предо Мною?
2:30 См.: 🔗Исх. 28:1 🔗Исх. 29:9 🔗Мал. 2:9	Сего ради сия глаголет Господь Бог Израилев, глаголя: рекох, дом твой и дом отца твоего прейдет предо Мною до века: а ныне глаголет Господь: никакоже Мне, зане токмо прославляющыя Мя прославлю, и уничижаяй Мя безчестен будет:
2:31 См.: 🔗3Цар. 2:27	се, дние идут, и потреблю семя твое и семя дому отца твоего, и не будет старца в дому твоем во вся дни,
2:32 См.: 🔗3Цар. 2:26	и узриши державу Мою во всех, имиже разблажает Израиля, и не будет старца в дому твоем во вся дни:
2:33 См.: 🔗Пс. 101:24 🔗Пс. 111:10	и мужа не истреблю тебе от олтаря Моего, во еже оскудети очесем его и истаяти души его: и вси прочии дому твоего падут оружием мужеским:
2:34 См.: 🔗1Цар. 4:11	и сие тебе знамение, еже приидет на оба сына твоя сия Офни и Финееса: в день един умрут оба:
2:35 См.: 🔗Чис. 25:13 🔗2Цар. 8:17 🔗1Пар. 29:22	и возставлю Себе жерца верна, иже вся яже в сердцы Моем и яже в души Моей сотворит, и созижду ему дом верен, и предидет пред христом Моим во вся дни:
2:36 См.: 🔗3Цар. 2:27 🔗Иез. 44:14	и будет всяк оставшийся в дому твоем приидет поклонитися ему с цатою сребра и хлебом единым, глаголя: приими мя к единому от священнослужений твоих, еже ясти хлеб.