Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 6 | |
6:1 | Во днех же сих, умножившымся учеником, бысть роптание Еллинов ко Евреом, яко презираемы бываху во вседневнем служении вдовицы их. |
6:2 | Призвавше же дванадесять множество ученик, реша: не угодно есть нам, оставльшым слово Божие, служити трапезам: |
6:3 | усмотрите убо, братие, мужы от вас свидетелствованы седмь, исполнены Духа Свята и премудрости, ихже поставим над службою сею: |
6:4 | мы же в молитве и служении слова пребудем. |
6:5 См.: 🔗Деян. 21:8 | И угодно бысть слово сие пред всем народом: и избраша Стефана, мужа исполнена веры и Духа Свята, и Филиппа, и Прохора и Никанора, и Тимона и Пармена, и Николаа пришелца Антиохийскаго, |
6:6 См.: 🔗Деян. 13:3 🔗1Тим. 4:14 | ихже поставиша пред Апостолы: и помолившеся возложиша на ня руце. |
6:7 | И слово Божие растяше, и множашеся число ученик во Иерусалиме зело: мног же народ священников послушаху веры. |
6:8 | Стефан же исполнь веры и силы творяше знамения и чудеса велия в людех. |
6:9 | Восташа же нецыи от сонма глаголемаго Ливертинска и Киринейска и Александрска, и иже от Киликии и Асии, стязающеся со Стефаном: |
6:10 См.: 🔗Лк. 21:15 | и не можаху противустати премудрости и Духу, Имже глаголаше. |
6:11 | Тогда подустиша мужы глаголющыя, яко слышахом его глаголюща глаголы хульныя на Моисеа и на Бога. |
6:12 | Сподвигоша же люди и старцы и книжники, и нападше восхитиша его и приведоша на сонмище, |
6:13 | поставиша же свидетели ложны глаголющыя, яко человек сей не престает глаголы хульныя глаголя на место святое сие и закон: |
6:14 См.: 🔗Дан. 9:26 | слышахом бо его глаголюща, яко Иисус Назорей сей разорит место сие и изменит обычаи, яже предаде нам Моисей. |
6:15 | И воззревше нань вси седящии в сонмищи, видеша лице его яко лице Ангела. |