Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 43 | |
43:1 См.: 🔗Пс. 18:2 🔗Рим. 1:20 | Слава высоты, твердь чистоты, зрак небесе в видении славы. |
43:2 См.: 🔗Пс. 135:8 | Солнце во явлении возвещающее во исходе сосуд дивен, дело Вышняго. |
43:3 См.: 🔗Пс. 18:7 | В полудни своем изсушает страну, и прямо вару его кто постоит? |
43:4 | пещь дышущее в делех вара, трегубо солнце пожигающее горы: воскурения огненная издышущее и простирающее лучи омрачает очи. |
43:5 См.: 🔗Прем. 13:3 | Велий Господь сотворивый е, и словесы Своими ускори шествие. |
43:6 См.: 🔗Пс. 135:9 🔗Рим. 1:20 | И луна всем во свое время являет лета и знамение века. |
43:7 | От луны знамение праздника: светило умаляющееся до конца. |
43:8 | Месяц по имени своему есть, возрастающь дивно во изменении. |
43:9 | Сосуд ополчений на высоте, на тверди небесней сияющь. |
43:10 | Доброта небесе, слава звезд, красота светящися на высоких Господних: |
43:11 | словесы Святаго станут по чину и не имут ослабети в стражбах своих. |
43:12 См.: 🔗Быт. 9:13 | Виждь дугу и благослови Сотворшаго ю, зело прекрасна сиянием своим: |
43:13 См.: 🔗Пс. 103:2 | окружи небо окружением славы, руце Вышняго простросте ю. |
43:14 | Повелением Его потщася снег, и ускоряет молнию судбою Своею. |
43:15 | Сего ради отверзошася сокровища, и парят облацы яко птицы. |
43:16 | Величием Своим укрепи облаки, и сокрушишася камение градное: |
43:17 См.: 🔗Наум. 1:5 | и воззрением Его подвижутся горы, и волею Его возвеет юг. |
43:18 | Глас грома Его порази землю, и буря северова и вихорь ветра. |
43:19 | Яко птицы парящыя сыплет снег, и якоже прузи садящиися спадения его. |
43:20 | Доброте белости его подивится око, и о дожди его ужаснется сердце. |
43:21 См.: 🔗Пс. 147:5 | И слану яко соль на землю сыплет, и смерзшися бывает на концы остра. |
43:22 | Студен ветр северный возвеет, и смерзнется лед от воды: на всяцем собрании воднем обитати имать, и аки во броню облечется вода. |
43:23 | Пояст горы и пустыни пожжет, и угасит траву яко огнь. |
43:24 | Изцеление всех со тщанием мгла: роса сретающая от вара утишит. |
43:25 См.: 🔗Иов. 38:10 | Мыслию его преста бездна, и насади в ней (Господь) островы. |
43:26 См.: 🔗Пс. 106:23 | Плавающии по морю поведают бедство его, и слухом ушес наших чудимся, |
43:27 См.: 🔗Пс. 103:25 | и тамо (суть) преславна и чудна дела его, различие всякаго животнаго, создание китов. |
43:28 | Им благополучный конец свой получают и словом Его составляются всяческая. |
43:29 | Много имамы рещи, и не имамы постигнути, и скончание словес: все есть Той. |
43:30 См.: 🔗1Кор. 15:28 🔗Пс. 70:15 | Славяще Его где укрепимся? Той бо велик паче всех дел Своих: |
43:31 См.: 🔗Пс. 95:4 | страшен Господь и велик зело, и чудно могутство Его. |
43:32 | Славяще Господа вознесите, елико аще можете, превзыдет бо и еще: |
43:33 | возносяще Его умножитеся крепостию: не трудитеся, не имате бо постигнути. |
43:34 См.: 🔗Пс. 105:2 | Кто виде Его и исповесть? И кто возвеличит Его, якоже есть? |
43:35 См.: 🔗1Кор. 13:9 | Многа сокровена суть вящшая сих: малая бо видехом дел Его. |
43:36 См.: 🔗Пс. 24:14 | Вся бо сотвори Господь и благочестивым даде премудрость. |