Первая книга Паралипоменон (Первая книга Хроник, Первая Летопись), глава 14

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 14
14:1 См.: 🔗2Цар. 5:11	И посла Хирам царь Тирский послы к Давиду, и древа кедровл, и здателей стен, и древоделей, да созиждут ему дом.
14:2	И позна Давид, яко уготова его Господь царем над Израилем, яко воздвижеся в высоту царство его, ради людий его Израиля,
14:3 См.: 🔗2Цар. 5:13	и поят Давид еще жены во Иерусалиме: и родишася ему еще сынове и дщери.
14:4 См.: 🔗2Цар. 5:14 🔗1Пар. 3:5	И сия имена их, иже родишася ему во Иерусалиме: Саммаа и Совав, Нафан и Соломон,
14:5	и Иеваар и Елисуй и Елифааф
14:6	и Нагеф, и Нафаг и Иафие,
14:7	и Елисама и Валиада и Елифалет.
14:8 См.: 🔗2Цар. 5:17	И услышаша иноплеменницы, яко помазан бысть Давид в царя над всем Израилем, и изыдоша вси иноплеменницы взыскати Давида. И услыша Давид и изыде противу их.
14:9	Иноплеменницы же приидоша и разлияшася во юдоли Исполинов.
14:10	И вопроси Давид Бога, глаголя: аще взыду на иноплеменники, и предаси ли их в руки моя? И рече ему Бог: взыди, и предам их в руки твоя.
14:11 См.: 🔗2Цар. 5:20	И изыде во Ваал – Фарасин, и порази их тамо Давид. И рече Давид: разсече Бог враги моя рукою моею, якоже разсечение воды. Сего ради нарече имя месту тому Фарасин, Разсечение.
14:12 См.: 🔗Втор. 7:5	И оставиша тамо боги своя иноплеменницы, ихже Давид повеле сожещи огнем.
14:13 См.: 🔗2Цар. 5:22	И приложиша еще иноплеменницы, и разлияшася еще во юдоли Исполинов.
14:14	И вопроси паки Давид Бога. И рече ему Бог: не исходи за ними: отвратися от них, и приидеши на них прямо грушей:
14:15	и будет егда услышиши глас шума верхов грушей, тогда изыдеши на брань, яко изыде Бог пред тобою, да поразит полки иноплеменнически.
14:16 См.: 🔗2Цар. 5:25	И сотвори Давид, якоже повеле ему Бог: и порази полки филистимов от Гаваона даже до Газира.
14:17	И прославися имя Давидово во всех странах, и Господь даде страх его на вся языки.