Четвёртая книга Царств (Вторая книга Царей), глава 16

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 16
16:1	В лето седмоенадесять Факеа сына Ромелиина, воцарися Ахаз сын Иоафама царя Иудина:
16:2 См.: 🔗2Пар. 28:1	сын двадесяти лет бе Ахаз, егда нача царствовати, и шестьнадесять лет царствова во Иерусалиме, и не сотвори правое пред очима Господа Бога своего верно, якоже Давид отец его,
16:3 См.: 🔗4Цар. 8:18 🔗2Пар. 28:2 🔗Лев. 18:21	и ходи в пути Иеровоама сына Наватова царя Израилева, ксему и сына своего преведе сквозе огнь по мерзостем языков, ихже отят Господь от лица сынов Израилевых:
16:4	и жряше и кадяше на высоких и на холмех и под всяким древом частым.
16:5 См.: 🔗Ис. 7:1	Тогда взыде Раассон царь Сирск и Факей сын Ромелиин царь Израилев во Иерусалим на брань, и воеваста на Ахаза, и не можаста (ему) одолети.
16:6 См.: 🔗4Цар. 14:22	Во время оно возврати Раассон царь Сирский Елаф Сирии и изгна Иудеев из Елафа, и Идумее приидоша во Елаф и вселишася тамо даже до дне сего.
16:7 См.: 🔗2Пар. 28:16 🔗Ос. 7:11 🔗Иер. 50:17	И посла Ахаз послы к Фелгаффелласару царю Ассирийску, глаголя: раб твой и сын твой аз есмь, взыди и отими мя от руки царя Сирска и от руки царя Израилева, воставших на мя.
16:8 См.: 🔗3Цар. 15:18 🔗4Цар. 12:18 🔗Ис. 7:20	И взя Ахаз злато и сребро обретшееся в сокровищих дому Господня и в сокровищих дому царева, и посла царю Ассирийску дары.
16:9	И послуша его царь Ассирийский: и взыде царь Ассирийский в Дамаск, и взя его, и пресели его, и Раассона царя уби.
16:10 См.: 🔗2Пар. 28:23	И иде царь Ахаз на сретение Фелгаффелласару царю Ассирийску в Дамаск, и виде жертвенник в Дамасце: и посла царь Ахаз ко Урии иерею подобие жертвенника, и начертание, и все творение его.
16:11	И созда Уриа иерей жертвенник по всем, елика посла царь Ахаз от Дамаска.
16:12	И прииде царь Ахаз из Дамаска и виде жертвенник, и взыде на него,
16:13	и покади всесожжение свое и жертву свою и возлияние свое, и пролия кровь мирных на жертвенник,
16:14 См.: 🔗2Пар. 4:1	олтарь же медяный, иже пред Господем, принесе от лица дому Господня, и от среды жертвенника и от среды дому Господня: и постави его о едину страну жертвенника к северу.
16:15	И заповеда царь Ахаз Урии иерею, глаголя: на жертвеннице велицем приношаяй всесожжения утренняя, и жертву вечернюю, и всесожжения царева, и жертву его, и всесожжения всех людий, и жертву их, и возлияния их, и всяку кровь всесожжения, и всяку кровь жертвенную излиеши на нем: олтарь не медян да будет мне на утро.
16:16	И сотвори Уриа иерей по всем, елика заповеда ему царь Ахаз.
16:17 См.: 🔗3Цар. 7:23	И изсече Ахаз царь споения подставов, и пренесе от них умывалницу, и море низложи от волов медяных, иже беша под ним, и положи е на подставе каменнем:
16:18 См.: 🔗2Пар. 28:24	и основание седалища создано в дому Господни, и вход царев внешний обрати в дом Господень, от лица царя Ассирийска.
16:19 См.: 🔗2Пар. 28:1	И прочая словес Ахазовых, елика сотвори, не сия ли написана в книзе словес дний царей Иудиных:
16:20 См.: 🔗2Пар. 28:27 🔗Ис. 14:28	и успе Ахаз со отцы своими, и погребен бысть со отцы своими во граде Давидове. И воцарися Езекиа сын его вместо его.